Rahul Gandhi defamation case : పాపం రాహుల్​ గాంధీ.. ఏదీ కలిసి రావట్లేదు!

Rahul Gandhi defamation case Live : రెండు దశాబ్దాల క్రితం.. రాహుల్​ గాంధీ రాజకీయ ఎంట్రీతో కాంగ్రెస్​ పార్టీ మురిసిపోయింది. 'వారసుడు వచ్చాడు' అంటూ సంబరాలు చేసుకుంది. కాంగ్రెస్​ పార్టీ భవిష్యత్తు రాహుల్​ గాంధీనేనని భావించింది. కానీ రెండు దశాబ్దాల తర్వాత పరిస్థితులు అందుకు పూర్తి భిన్నంగా ఉన్నాయి. తాజా పరిణామాలు చూస్తుంటే.. చాలా మంది 'పాపం రాహుల్​ గాంధీ' అనుకునే ఉంటారు! మొన్న ఎన్నికల్లో వరుస పరాజయాలు.. నిన్న ఈడీ కార్యాలయాల్లో గంటల కొద్ది ప్రశ్నలు.. నేడు ఏకంగా జైలు శిక్ష​! రాహుల్​ గాంధీకి, కాంగ్రెస్​ పార్టీకి ఏదీ కలిసి రావట్లేదని అనేందుకు ఈ ఉదాహరణలు చాలు. భారత్​ జోడో యాత్రతో ప్రజల మధ్య, వార్తల్లో నిలిచిన కాంగ్రెస్​ వారసుడు.. ఇప్పుడు ఏకంగా పార్లమెంట్​లో సీటు కోల్పోయారు. దాదాపు 8ఏళ్ల పాటు అసలు ఎన్నికల్లో పోటీ చేయలేని పరిస్థితి. రాహుల్​ గాంధీ అసలు బీజేపీకి పోటీగా నిలవగలరా? మోదీ మేనియాను తట్టుకుని నిలబడే శక్తి ఆయనకు ఉందా?

వారసుడు ఓడిపోయాడు..!

బీజేపీని, ముఖ్యంగా ప్రధాని మోదీని ఢీకొట్టి నిలిచే సత్తా రాహుల్​కు ఉందా అన్న ప్రశ్నలు నిత్యం ఉత్పన్నమవుతూనే ఉన్నాయి! అందుకు కారణాలు లేకపోలేదు. 2019 లోక్​సభ ఎన్నికల్లో ఘోర పరాభవం అనంతరం పార్టీ ఇచ్చిన 'అధ్యక్ష' పదవిని రాహుల్​ వదులుకోవాల్సి వచ్చింది. ఆ తర్వాత ఆ పీఠంపై ఆయన కూర్చునేందుకు ఇష్టపడనే లేదు. ఇక్కడ అత్యంత ఆందోళనకర విషయం.. వారసత్వంగా వచ్చిన ఉత్తర్​ప్రదేశ్​ అమేఠీ ఎంపీ సీటును ఆయన కోల్పోవడం! అప్పట్లో ఇది అందరిని షాక్​కు గురిచేసింది. కాంగ్రెస్​కు కంచుకోటగా ఉన్న అమేఠీ కూడా రాహుల్​ను ధిక్కరించడం గమనార్హం.

Rahul Gandhi defamation case : ఇక 'నేషనల్​ హెరాల్డ్​ కేసు' విచారణలో భాగంగా.. ఈడీ కార్యాలయాల చుట్టూ రాహుల్​ గాంధీ తిరగడం కొన్ని నెలల క్రితం హాట్​ టాపిక్​గా మారింది. ఉదయాన్నే ఢిల్లీలోని ఈడీ కార్యాలయానికి వెళ్లడం.. రాత్రికి తిరుగుపయనం అవ్వడం.. కొన్ని రోజుల పాటు రాహుల్​ గాంధీకి ఈ పరిస్థితులు తప్పలేదు. అనేక ప్రశ్నలతో ఆయన్ని ఈడీ అధికారులు ఉక్కిరిబిక్కరి చేశారు.

ఇవన్నీ పక్కన పెడితే.. రాహుల్​ గాంధీ చేసిన వ్యాఖ్యలు గతంలో అనేకమార్లు ఆయన్ని ఇరకాటంలో పెట్టాయి. ప్రధాని మోదీవైపు ఎక్కుపెట్టిన అస్త్రాలన్నీ.. చివరికి ఆయన్నే గాయపరిచాయి! ఆ మాటలే.. క్షమాపణల నుంచి శిక్ష వరకు తీసుకొచ్చాయి.

'చౌకీదార్​ చోర్​ హే'..

Rahul Gandhi disqualified from Lok Sabha : రఫేల్​ ఒప్పందపై సూప్రీంకోర్టును ఇచ్చిన తీర్పును ప్రస్తావిస్తూ.. ఓ సందర్భంలో 'చౌకీదార్​ చోర్​ హే'(ప్రధాని మోదీ దొంగ) అంటూ వ్యాఖ్యానించారు రాహుల్​ గాంధీ. ఈ విషయాన్ని సుప్రీంకోర్టే వెల్లడించిందన్నారు. ఇది అప్పట్లో తీవ్ర దుమారానికి దారి తీసింది. బీజేపీ శ్రేణులు రాహుల్​ గాంధీపై తీవ్రస్థాయిలో మండిపడ్డారు. రాహుల్​ గాంధీపై చర్యలు చేపట్టాలని సుప్రీంకోర్టులో కేసు వేశారు బీజేపీ ఎంపీ మీనాక్షి లేఖి. కొంత కాలం తర్వాత.. ఈ వ్యవహారంపై సుప్రీంకోర్టుకు క్షమాపణలు తెలిపాల్సి వచ్చింది.

'కమాండర్​ ఇన్​ థీఫ్​'..

Rahul Gandhi Modi surname : ప్రధాని మోదీపై రాహుల్​ గాంధీ చేసిన ఆరోపణలు అనేకమార్లు వివాదాస్పదమయ్యాయి. వీటిల్లో.. మోదీపై రాహుల్​ చేసిన 'కమాండర్​ ఇన్​ థీఫ్​' ఆరోపణ ఒకటి. రఫేల్​ ఒప్పందాన్ని ఉద్దేశించి ఈ విమర్శలు చేశారు కాంగ్రెస్​ సీనియర్​ నేత. ఈ విషయంపై ముంబైలోని ఓ కోర్టు రాహుల్​ గాంధీకి సమన్లు జారీ చేసింది.

'మహాత్మా గాంధీని ఆర్​ఎస్​ఎస్​ చంపేసింది'..

2014లో మహారాష్ట్ర ఠాణే భివాండి టౌన్​షిప్​లో ప్రసంగించారు రాహుల్​ గాంధీ. ఈ నేపథ్యంలో 'మహాత్మా గాంధీ హత్య వెనుక ఆర్​ఎస్​ఎస్​ హస్తం ఉంది' అని ఆరోపించారు. ఆ మాటలు విన్న స్థానిక ఆర్​ఎస్​ఎస్​ కార్యకర్త రాజేశ్​ కుంటే.. కాంగ్రెస్​ నేతకు వ్యతిరేకంగా కోర్టులో కేసు వేశాడు. 2018లో రాహుల్​ గాంధీపై కోర్టు అభియోగాలు మోపింది. కానీ ఆయన దోషిగా తేలలేదు. అనంతరం మహాత్మా గాంధీ హత్యపై ఆర్​ఎస్​ఎస్​ను తాను ఎప్పుడు విమర్శించలేదని వివరణ ఇచ్చారు.

మరో ఆర్​ఎస్​ఎస్​ కార్యకర్త అంజన్​ బోరా వేసిన కేసులో.. రాహుల్​ గాంధీకి సమన్లు పంపించింది గౌహతీలోని ఓ కోర్టు.

'రేప్​ ఇన్​ ఇండియా'..

Rahul Gandhi MP status : ప్రధాని మోదీ 'మేక్​ ఇన్​ ఇండియా' నినాదాన్ని ఉద్దేశించి.. రాహుల్​ గాంధీ చేసిన వ్యాఖ్యలు అప్పట్లో తీవ్ర దుమారానికి దారి తీశాయి. ఓ సందర్భంలో ఝార్ఖండ్​కు వెళ్లిన కాంగ్రెస్​ నేత.. 'ప్రధాని మోదీ మోదీ మేక్​ ఇన్​ ఇండియా అంటుంటే.. ఇక్కడ మాత్రం రేప్​ ఇన్​ ఇండియా పరిస్థితులు కనిపిస్తున్నాయి,' అని అన్నారు. రాహుల్​ మాటలు ప్రజల మనోభావాలను దెబ్బతీస్తున్నాయంటూ.. ఆయనపై కొందరు దేశద్రోహ కేసు వేశారు.

లండన్​లో ప్రసంగంపై వివాదం..

రాహుల్​ గాంధీ.. ఇటీవలే లండన్​ వెళ్లారు. అక్కడ బీజేపీకి వ్యతిరేకంగా పలు వ్యాఖ్యలు చేశారు. దేశంలో ప్రజాస్వామ్య వ్యవస్థ ప్రమాదంలో ఉందని ఆరోపించారు. దీనిపై బీజేపీ తీవ్రస్థాయిలో మండిపడింది. రాహుల్​ గాంధీ క్షమాపణలు చెప్పాలని పార్లమెంట్​ను స్తంభింపజేసింది.

Rahul Gandhi Surat court : ఇక ఇప్పుడు.. ‘దొంగలందరికి ఇంటి పేరు మోదీనే ఎందుకు ఉంటుంది?’ అని 2019లో రాహుల్​ గాంధీ చేసిన వ్యాఖ్యలపై ఆయనకు రెండేళ్ల జైలు శిక్ష పడింది. పార్లమెంట్​లో అనర్హత వేటు పడింది. అరెస్ట్​కు అడుగు దూరంలో నిలబడ్డారు.. కాంగ్రెస్​ వారసుడు!