US visa : స్టూడెంట్, టూరిస్ట్ వీసాల ఫీజును భారీగా పెంచిన అమెరికా!
09 April 2023, 11:35 IST
US Student visa cost hike : స్టూడెంట్, టూరిస్ట్తో పాటు పలు కేటగిరీల్లోని వీసాల ఫీజును పెంచింది అమెరికా. ఈ ధరలు ఈ ఏడాది మే 30 నుంచి అమల్లోకి రానున్నాయి.
స్టూడెంట్, టూరిస్ట్ వీసాల ధరలను పెంచిన అమెరికా
US increases Visa cost : అమెరికాలో చదువు లేదా పర్యటనల కోసం ప్లాన్ చేస్తున్న వారికి కీలక అప్డేట్! స్టూడెంట్, టూరిస్ట్తో పాటు పలు కేటగిరీల్లోని వీసాల ఫీజులను అగ్రరాజ్యం పెంచింది. ప్రాసెసింగ్ ఫీజు పెంపు ఇందుకు ప్రధాన కారణం. ఈ 15డాలర్లు- 110డాలర్ల ధరల పెంపు నిర్ణయం మే 30 నుంచి అమల్లోకి రానుంది.
వీటి ధరలు పెరిగాయి..
US increases student Visa cost : "బిజినెస్/ టూరిజం కోసం ఇచ్చే విజిటర్ వీసా (బీ1/బీ2), స్టూడెంట్, ఎక్స్ఛేంజ్ విజిటర్ వీసాల ఫీజును 160 డాలర్ల నుంచి 185డాలర్లకు పెంచడం జరిగింది," అని ప్రభుత్వం అధికారిక ప్రకటన విడుదల చేసింది.
తాత్కాలిక వర్కింగ్ వీసాలైన హెచ్, ఎల్, ఓ, పీ, క్యూ, ఆర్ కేటగిరీలకు సైతం ఫీజు పెరిగింది. తాజా పెంపుతో అది 190 డాలర్ల నుంచి 205 డాలర్లకు చేరింది. ట్రీటీ 'ఈ' కేటగిరీలోని ట్రేడర్, ట్రీటీ విజిటర్, ట్రీటీ అప్లికెంట్స్ ఫీజు 205 డాలర్ల నుంచి ఏకంగా 315 డాలర్లకు పెంచింది అమెరికా ప్రభుత్వం. తాజా నిర్ణయంతో ఇతర కాన్సులర్ ఫీజుల్లో మార్పులేం లేవని స్పష్టం చేసింది.
వీసాలే.. వీసాలు..
US tourist Visa cost hike : వీసా జారీ చేసే సమయాన్ని తగ్గించేందుకు ఇటీవలి కాలంలో అనేక కీలక నిర్ణయాలు తీసుకుంది అమెరికా. హెచ్1బీ వీసాల స్టాంపింగ్ దేశం బయట కూడా చేసే విధంగా పైలట్ ప్రాజెక్ట్ను చేపట్టాలని నిర్ణయించింది. ఇది రానున్న నెలల్లో అమల్లోకి వస్తుంది.
ప్రస్తుతం వర్కింగ్ వీసాల కోసం అప్లై చేస్తున్న భారతీయులు 60-280 రోజుల వరకు వెయిట్ చేయాల్సి వస్తోంది. ట్రావెలింగ్ వీసాకైతే ఏకంగా 1-ఒకటిన్నరేళ్ల వరకు సమయం పడుతోంది. గతేడాది 1,25,000 మంది భారతీయులకు స్టూడెంట్ వీసాలను జారీ చేసింది అమెరికా రాయబార కార్యాలయం. ఇదొక రికార్డు. అయితే ఈ ఏడాది ఈ రికార్డు బ్రేక్ అవుతుందని అంచనాలు ఉన్నాయి.