Vivo Y75s 5G । ఆకర్షణీయమైన రంగులు, ఆకట్టుకునే ఫీచర్లతో వచ్చిన వివో కొత్త ఫోన్‌!

స్మార్ట్‌ఫోన్ మేకర్ వివో తమ Y-సిరీస్‌ను ఎప్పటికప్పుడు సరికొత్త స్మార్ట్‌ఫోన్ మోడళ్లతో నింపేస్తుంది. తాజాగా మరొక కొత్త స్మార్ట్‌ఫోన్ విడుదల చేసింది. గతంలో Vivo Y75 పేరుతో 4G మొబైల్ మోడల్ విడుదల చేయగా, ఇప్పుడు ఈ మోడెల్‌లో 5G వెర్షన్ ఫోన్‌ను ప్రవేశపెట్టింది. సరికొత్త Vivo Y75s 5G ఒక ప్రీమియం మిడ్-రేంజ్ స్మార్ట్‌ఫోన్. ఇందులో 64MP ప్రైమరీ సెన్సార్ కలిగిన ట్రిపుల్ కెమెరా సెటప్, మెరుగైన బ్యాటరీ, ఫాస్ట్ ఛార్జింగ్‌ సపోర్ట్ మొదలైనవి చెప్పుకోదగ్గ అంశాలు.

ర్యామ్, స్టోరేజ్ ఆధారంగా Vivo Y75s 5G ఫోన్ రెండు కాన్ఫిగరేషన్‌లలో వస్తుంది. టాప్-స్పెక్ వేరియంట్లో గరిష్టంగా 12GB RAM అలాగే 256GB స్టోరేజ్ సామర్థ్యాన్ని కలిగి ఉంది. స్టోరేజ్ సామర్థ్యాన్ని మరింత విస్తరించుకునేందుకు మైక్రో SD కార్డ్ స్లాట్ అందిస్తున్నారు. ఈ ఫోన్ ఐరిస్ బ్లూ, స్టార్రీ నైట్ వంటి రెండు కలర్ ఆప్షన్లలో లభిస్తుంది.

ఇంకా ఇందులో ఎలాంటి ఫీచర్లు, స్పెసిఫికేషన్లు ఉన్నాయి. ధర ఎంత మొదలగు అన్ని వివరాలు ఇక్కడ తెలుసుకోండి..

Vivo Y75s 5G స్మార్ట్‌ఫోన్‌ ఫీచర్స్, స్పెసిఫికేషన్స్

• 60Hz రిఫ్రెష్ రేట్ కలిగిన 6.58 అంగుళాల FHD+ LCD డిస్‌ప్లే
• 8GB/12 RAM, 128GB/ 256GB ఇంటర్నల్ స్టోరేజ్ సామర్థ్యం
• మీడియాటెక్ డైమెన్సిటీ 700 ప్రాసెసర్
• వెనకవైపు 64MP+8MP+2MP ట్రిపుల్ కెమెరా, ముందు భాగంలో 8MP సెల్ఫీ షూటర్‌
• ఆండ్రాయిడ్ 12 ఆపరేటింగ్ సిస్టమ్
• 5000 mAh బ్యాటరీ సామర్థ్యం, 18W ఛార్జర్

కనెక్టివిటీ ఫీచర్లు 5G, Wi-Fi 802.11 ac, బ్లూటూత్ 5.1, GPS/ GLONASS, USB టైప్-C, 3.5mm ఆడియో జాక్, సైడ్-మౌంటెడ్ ఫింగర్ ప్రింట్ సెన్సార్‌ మొదలైనవి ఉన్నాయి.

ప్రస్తుతం ఈ ఫోన్ చైనా మార్కెట్లో అందుబాటులోకి వచ్చింది. అక్కడ Vivo Y75s 5G స్మార్ట్‌ఫోన్‌ ధరలను పరిశీలిస్తే.. బేస్ మోడల్ 8GB + 256GB ధర, CNY 1,899 (సుమారు రూ. 21,777). హై-ఎండ్ 12GB + 256GB వేరియంట్ ధర CNY 2,199 (సుమారు రూ. 25,200). ఈ ఫోన్ త్వరలో మిగతా మార్కెట్లలోనూ విడుదలయ్యే అవకాశం ఉంది.