Rahane Six: రహానే కొట్టిన భారీ సిక్స్ చూసి నోరెళ్లబెట్టిన గవాస్కర్
17 April 2023, 21:03 IST
Rahane Six: రహానే కొట్టిన భారీ సిక్స్ చూసి నోరెళ్లబెట్టాడు సునీల్ గవాస్కర్. ఈ సీజన్ ఐపీఎల్లో తన విశ్వరూపం చూపిస్తున్న రహానే సోమవారం (ఏప్రిల్ 17) ఆర్సీబీతో మ్యాచ్ లోనూ మరో మెరుపు ఇన్నింగ్స్ ఆడాడు.
ఫాఫ్ డుప్లెస్సి, అజింక్య రహానే
ఇక తాజాగా ఆర్సీబీతో మ్యాచ్ లోనూ మరో మెరుపు ఇన్నింగ్స్ ఆడాడు. కేవలం 20 బాల్స్ లో 37 రన్స్ చేసి ఔటయ్యాడు. అయితే ఈ ఇన్నింగ్స్ లో రహానే కొట్టిన ఓ సిక్స్ గవాస్కర్ లాంటి మాజీ క్రికెటర్ ను కూడా ఆశ్చర్యానికి గురి చేసింది. ఆర్సీబీ బౌలర్ విజయ్ కుమార్ వైశాక్ బౌలింగ్ లో రహానే లెగ్ సైడ్ లో ఓ భారీ సిక్స్ కొట్టాడు. అది కాస్త స్టేడియం రూఫ్ కి తగిలి మళ్లీ గ్రౌండ్ లోకి రావడం విశేషం.
ఈ సిక్స్ చూసి మాజీ క్రికెటర్లు సునీల్ గవాస్కర్, సంజయ్ మంజ్రేకర్ షాక్ తిన్నారు. నా కళ్లను నేనే నమ్మలేకపోతున్నాను అని గవాస్కర్ అన్నాడు. రహానే అద్భుతమైన వెర్షన్ ఇది అని సన్నీ అన్నాడు. ఈ షాట్ ఆర్సీబీ కెప్టెన్ ఫాఫ్ డుప్లెస్సిని కూడా ఆశ్చర్యానికి గురి చేసింది. అదే ఊపులో పార్నెల్ వేసిన తర్వాతి ఓవర్లో రహానే మరో రెండు ఫోర్లు, ఒక సిక్స్ కొట్టడం విశేషం. చివరికి 20 బంతుల్లో మూడు ఫోర్లు, రెండు సిక్స్ లతో 37 రన్స్ చేసి ఔటయ్యాడు.
గతేడాది ఐపీఎల్లోనూ విఫలమైన రహానే.. ఈసారి సీఎస్కే తరఫున వచ్చిన అవకాశాన్ని అందిపుచ్చుకుంటున్నాడు. మెరుపు వేగంతో స్కోరు చేస్తూ.. సీఎస్కే టీమ్ లో ప్రధాన బ్యాటర్ గా మారిపోయాడు. మూడు మ్యాచ్ లలోనూ అతడు మెరుపు ఇన్నింగ్స్ ఆడాడు. ముంబైపై 27 బాల్స్ లో 61, తర్వాత రాజస్థాన్ రాయల్స్ తో 19 బంతుల్లో 31, ఆర్సీబీతో 20 బంతుల్లో 37 రన్స్ చేశాడు.