Telangana rains : ఈ ప్రాంతాల్లో ఐదు రోజుల వరకు భారీ వర్షాలు..!
28 August 2022, 16:22 IST
- Heavy rainfall alert : తెలంగాణ సహా వివిధ ప్రాంతాల్లో రానున్న ఐదు రోజుల పాటు వర్షాలు పడతాయి. ఈ వివరాలను ఐఎండీ వెల్లడించింది.
రానున్న ఐదు రోజుల్లో.. ఈ ప్రాంతాల్లో భారీ వర్షాలు..
Heavy rainfall alert : దేశవ్యాప్తంగా రానున్న ఐదు రోజుల్లో భారీ వర్షాలు కురుస్తాయని భారత వాతావరణ శాఖ వెల్లడించింది. తెలంగాణ- రాయలసీమతో పాటు ఉత్తర కర్ణాటక ప్రాంతాల్లో ఈ నెల 28-29 మధ్య భారీ వర్షాలు కురుస్తాయని పేర్కొంది. ఆంధ్రప్రదేశ్ తీర ప్రాంతంలో 29 వరకు, దక్షిణ కన్నడతో పాటు తీర ప్రాంతాల్లో 31వరకు అతి భారీ వర్షాలు పడతాయని స్పష్టం చేసింది. తమిళనాడు, కేరళ, మాహేలో సైతం ఐదు రోజుల పాటు భారీ వర్షాలు కురుస్తాయని ఐఎండీ స్పష్టం చేసింది.
ఐఎండీ ప్రకారం.. నాగాలాండ్, మణిపూర్, మిజోరాం, త్రిపురలో ఆగస్టు 28,29, సెప్టెంబర్ 1 విస్తృతంగా వర్షాలు కురుస్తాయి. అరుణాచల్ప్రదేశ్, మేఘాలయలోని కొన్ని ప్రాంతాల్లో ఐదు రోజుల పాటు ఉరుములతో కూడిన వర్షాలు పడతాయి.
Telangana rains : ఇక బిహార్, ఉత్తర్ప్రదేశ్లో ఈ నెల 28-29న, ఝార్ఖండ్లో 28న, పశ్చిమ్ బెంగాల్, సిక్కింలో ఐదు రోజుల పాటు భారీ వర్షాలు కురుస్తాయి. ఉరుములు, మెరుపుల శబ్దాలతో ఆయా ప్రాంతాలు దద్దరిల్లుతాయి.
దేశవ్యాప్తంగా వర్షాలు కురుస్తున్నా.. ఢిల్లీలో మాత్రం ఎండలు ఉన్నాయి. ఆదివారం ఉదయం కూడా ఎండ ఉంది.