Ayman al-Zawahiri : సర్జన్ నుంచి అల్ఖైదా అధినేత వరకు.. ఇదీ అల్ జవహరి చరిత్ర
02 August 2022, 7:10 IST
- Ayman al-Zawahiri : అల్ఖైదా అధినేత అల్ జవహరి.. ఓ సర్జన్. ఈజిప్ట్ సైన్యంలో మూడేళ్లు పనిచేశాడు. అతడు.. బిన్ లాడెన్కు అత్యంత సన్నిహితుడు.
2001లో బిన్ లాడెన్తో అల్ జవహరి
Ayman al-Zawahiri : అమెరికా సైన్యం జరిపిన వైమానిక దాడిలో అల్ఖైదా అధినేత అయ్మన్ అల్ జవహరి హతమయ్యాడు. అతను.. కరుడుగట్టిన ఉగ్రవాది ఒసామా బిన్ లాడెన్కు అత్యంత సన్నిహితుడు. అంతే కాదు.. అతనొక సర్జన్ కూడా!
- అయ్మన్ అల్ జవహరి.. ఈజిప్ట్ దేశస్థుడు. 1951 జూన్ 19న గిజాలో జన్మించాడు. 2011లో ఒసామా బిన్ లాడెన్ను ప్రత్యేక ఆపరేషన్లో మట్టుబెట్టింది అమెరికా సైన్యం. ఆ తర్వాత.. అతని స్థానాన్ని అల్ జవహరి భర్తీ చేశాడు.
- బిన్ లాడెన్లాగే.. 71ఏళ్ల అల్ జవహరి కూడా విద్యావేత్త. బిన్ లాడెన్కు బిజినెస్- ఎకనామిక్స్ అడ్మినిస్ట్రేషన్లో డిగ్రీ ఉంది. అతను ఒక సివిల్ ఇంజినీర్ కూడా. ఇక అల్ జవహరి సైతం ఈజిప్ట్లో సర్జన్గా పనిచేశాడు. మూడేళ్ల పాటు ఈజిప్టు సైన్యానికి సేవలందించాడు.
- 1981లో ఈజిప్ట్ అధ్యక్షుడు అన్వర్ సాదత్ హత్య జరిగింది. ఈ ఘటనలో 100మందికిపైగా ప్రజలను అరెస్ట్ చేశారు. వారిలో అల్ జవహరి ఒకడు. అప్పుడు అతడి వయస్సు 30ఏళ్లు. ఆ సమయంలో అతడిని పోలీసులు జైలులో చిత్రహింసలకు గురిచేసినట్టు సమాచారం.
- ఈఐజే(ఈజిప్టియన్ ఇస్లామిక్ జిహాద్) సంస్థను స్థాపించిన అల్ జవహరి.. 1998లో దానిని అల్ఖైదాలో కలిపేశాడు. అతను బిన్ లాడెన్కు రైట్ హ్యాండ్! అందువల్ల బిన్ లాడెన్ ఉగ్ర కార్యకలాపాల్లో అల్ జవహరి చురుకుగా పనిచేశాడు. అమెరికాపై ఎన్నో దాడులకు తెగబడ్డాడు. 9/11 దాడులను విజయవంతం చేసేందుకు.. బిన్ లాడెన్కు తన వంతు కృషి చేశాడు.
- అల్ జవహరి తలపై 25మిలియన్ డాలర్ల రివార్డును ప్రకటించింది అమెరికా. 9/11 దాడుల తర్వాత ఈ నిర్ణయం తీసుకుంది.
ఇక అల్ జవహరి మరణాన్ని అమెరికా అధ్యక్షుడు జో బైడెన్ ధ్రువీకరించారు.
"నా ఆదేశాలతో.. అమెరికా సైన్యం.. శనివారం కాబుల్లో వైమానిక దాడి జరిపింది. ఈ ఘటనలో అల్ జవహరి హతమయ్యాడు. ఎంత కాలం గడిచిపోయినా, ఎవరు ఎక్కడ దాగి ఉన్నా.. ప్రజలకు మీరు ముప్పు అని తెలిస్తే.. మిమ్మల్ని అమెరికా వేటాడి చంపేస్తుంది. న్యాయం జరిగింది. బిన్ లాడెన్కు జవహరి అత్యంత సన్నిహుతుడు. 9/11 దాడుల్లో బిన్ లాడెన్కు జవహరి డిప్యూటీగా పనిచేశాడు. 9/11 దాడులకు ప్రణాళికలు రచించడంలో అతనిది కీలక పాత్ర. ఏడాది క్రితం.. అఫ్గానిస్థాన్లో అమెరికా సైన్యం కార్యకలాపాలను ముగించాలని నేను నిర్ణయించాను. 20ఏళ్ల తర్వాత అక్కడ మన సైన్యం అవసరం లేదనిపించింది. కానీ అమెరికా ప్రయోజనాల కోసం.. అఫ్గాన్తో పాటు ప్రపంచవ్యాప్తంగా ఉగ్రవాద వ్యతిరేక కార్యకలాపాలు కొనసాగిస్తానని ప్రజలకు మాట ఇచ్చాను. అల్ఖైదా అధినేత విషయంలో ఇప్పుడదే చేశాను" అని మీడియాకు జో బైడెన్ వెల్లడించారు.
టాపిక్