Ayman al-Zawahiri : అఫ్గాన్​లో అమెరికా వైమానిక దాడి.. అల్​ఖైదా అధినేత హతం-us kills al qaeda chief ayman al zawahiri in drone strike confirms president biden ,జాతీయ - అంతర్జాతీయ న్యూస్
తెలుగు న్యూస్  /  జాతీయ - అంతర్జాతీయ  /  Ayman Al-zawahiri : అఫ్గాన్​లో అమెరికా వైమానిక దాడి.. అల్​ఖైదా అధినేత హతం

Ayman al-Zawahiri : అఫ్గాన్​లో అమెరికా వైమానిక దాడి.. అల్​ఖైదా అధినేత హతం

Sharath Chitturi HT Telugu
Aug 02, 2022 06:30 AM IST

Ayman al-Zawahiri : అల్​ఖైదా అధినేత అల్​ జవహరిని అమెరికా సైన్యం మట్టుబెట్టినట్టు ఆ దేశాధ్యక్షుడు జో బైడెన్​ వెల్లడించారు. ఈ మేరకు అఫ్గాన్​లో వైమానిక దాడి జరిపినట్టు వివరించారు.

అఫ్గాన్​లో అమెరికా వైమానిక దాడి.. అల్​ఖైదా అధినేత హతం
అఫ్గాన్​లో అమెరికా వైమానిక దాడి.. అల్​ఖైదా అధినేత హతం (AFP)

Ayman al-Zawahiri : అఫ్గానిస్థాన్​లో అమెరికా జరిపిన వైమానిక దాడిలో అల్​ఖైదా అధినేత అయ్​మన్​ అల్​ జవహరి హతమయ్యాడు. ఈ విషయాన్ని అగ్రరాజ్యం అధ్యక్షుడు జో బైడెన్​ వెల్లడించారు.

"నా ఆదేశాలతో.. అమెరికా సైన్యం.. శనివారం కాబుల్​లో వైమానిక దాడి జరిపింది. ఈ ఘటనలో అల్​ జవహరి హతమయ్యాడు. ఎంత కాలం గడిచిపోయినా, ఎవరు ఎక్కడ దాగి ఉన్నా.. ప్రజలకు మీరు ముప్పు అని తెలిస్తే.. మిమ్మల్ని అమెరికా వేటాడి చంపేస్తుంది. న్యాయం జరిగింది," అని మీడియాకు జో బైడెన్​ వెల్లడించారు.

అమెరికా పౌరులు, దౌత్యవేత్తలు, సైన్యాధికారులను హత్య చేసే విధంగా అయ్​మన్​ అల్​ జవహరి కుట్ర పన్నినట్టు బైడెన్​ ఆరోపించారు.

"బిన్​ లాడెన్​కు జవహరి అత్యంత సన్నిహుతుడు. 9/11 దాడుల్లో బిన్​ లాడెన్​కు జవహరి డిప్యూటీగా పనిచేశాడు. 9/11 దాడులకు ప్రణాళికలు రచించడంలో అతనిది కీలక పాత్ర," అని జో బైడెన్​ వివరించారు.

"ఏడాది క్రితం.. అఫ్గానిస్థాన్​లో అమెరికా సైన్యం కార్యకలాపాలను ముగించాలని నేను నిర్ణయించాను. 20ఏళ్ల తర్వాత అక్కడ మన సైన్యం అవసరం లేదనిపించింది. కానీ అమెరికా ప్రయోజనాల కోసం.. అఫ్గాన్​తో పాటు ప్రపంచవ్యాప్తంగా ఉగ్రవాద వ్యతిరేక కార్యకలాపాలు కొనసాగిస్తానని ప్రజలకు మాట ఇచ్చాను. అల్​ఖైదా అధినేత విషయంలో ఇప్పుడదే చేశాను," అని జో బైడెన్​ పేర్కొన్నారు.

బైడెన్​ ప్రకటనకు ముందే.. అఫ్గాన్​లో అమెరికా వైమానిక దాడి జరిపినట్టు వార్తలు బయటకొచ్చాయి. జులై 31న కాబుల్​లో వాయుదాడి జరిగినట్టు తాలిబన్​ ప్రతినిధి జబిహుల్లా ముజిహిద్​ మీడియాకు తెలిపారు.

అయితే అమెరికా చర్యలపై తాలిబన్​ ప్రభుత్వం మండిపడింది. దోహా ఒప్పందాన్ని ఉల్లంఘిస్తూ దాడి చేయడాన్ని ఖండిస్తున్నట్టు పేర్కొంది.

IPL_Entry_Point

సంబంధిత కథనం

టాపిక్