Superfoods for Hair Loss । ఈ గింజలు, విత్తనాలు తింటే జుట్టు వేగంగా పెరుగుతుంది, జుట్టు రాలడం తగ్గుతుంది!

SUPERFOODS TO CURB HAIR LOSS: ఈరోజుల్లో జుట్టు రాలడం అనేది అన్ని వయసుల వారిని వేధిస్తున్న ఒక సమస్య. జుట్టు రాలడానికి దోహదపడే అంశాలు అనేకం ఉన్నప్పటికీ చాలా సార్లు పోషకాహార లోపం వల్ల తలెత్తుతుంది. జుట్టుకు సరైన పోషణ లేకపోవడం వల్లనే వెంట్రుకలు బలహీనంగా, నిర్జీవంగా మారి రాలిపోవడం ప్రారంభిస్తాయి. సరైన ఆహారాన్ని తీసుకోవడం ద్వారా జుట్టు రాలడాన్ని నియంత్రించవచ్చునని పోషకాహార నిపుణులు అంటున్నారు. గింజలు, విత్తనాలు జుట్టు పోషణకు సూపర్‌ఫుడ్‌లుగా పేర్కొంటున్నారు.

హెచ్‌టి డిజిటల్‌కి ఇచ్చిన ఇంటర్వ్యూలో న్యూట్రిషనిస్ట్ అనుపమ మీనన్ జుట్టు రాలడం తగ్గించటానికి, వెంట్రుకల పెరుగుదలను ప్రోత్సహించటానికి ఏ రకమైన గింజలు, విత్తనాలు తీసుకోవాలో సూచించారు. అవి ఇక్కడ తెలుసుకోండి.

1. గుమ్మడిగింజలు: గుమ్మడి గింజలు మీ జుట్టుకు అద్భుతాలు చేసే పోషకాల నిధి. జింక్, కాపర్, మెగ్నీషియం, సెలీనియం, కాల్షియం వంటి ముఖ్యమైన ఖనిజాలతో నిండిన ఈ చిన్న గింజలు అదనపు టెస్టోస్టెరాన్ ఉత్పత్తిని నియంత్రించి జుట్టు పల్చబడడాన్ని నిరోధించడంలో సహాయపడతాయి.

2. వాల్‌నట్‌లు: వాల్‌నట్‌లు రుచికరమైన, ఆరోగ్యకరమైన చిరుతిండి మాత్రమే కాదు, జుట్టు ఆరోగ్యాన్ని పెంపొందించే సహజ నివారణగా కూడా పనిచేస్తాయి. ఈ గింజలు అనామ్లజనకాలు, కొవ్వు ఆమ్లాల గొప్ప మూలం, ఇవి నిద్రాణమైన వెంట్రుకల కుదుళ్లను ప్రేరేపిస్తాయి జుట్టు పెరుగుదలను ప్రోత్సహిస్తాయి.

3. అవిసె గింజలు: అవిసెలు (Flaxseeds) అమితమైన పోషకాలకు పవర్‌హౌస్. ముఖ్యంగా ఒమేగా-3 ఫ్యాటీ యాసిడ్‌లు, లిగ్నన్‌లు పుష్కలంగా ఉంటాయి, ఇవి తలమీద రక్త ప్రసరణను మెరుగుపరుస్తాయి, హెయిర్ ఫోలికల్ ఇన్‌ఫ్లమేషన్‌ను నివారిస్తాయి.

4. పొద్దుతిరుగుడు విత్తనాలు: పొద్దుతిరుగుడు విత్తనాలు గామా-లినోలెనిక్ యాసిడ్లకు గొప్ప మూలం. ఇది మీ జుట్టు తంతువులను దృఢమైన స్థితికి తీసుకురావడానికి సహాయపడే శక్తివంతమైన పోషకం. జుట్టును మరింత మృదువుగా, మెరిసేలా చేస్తుంది. అదనంగా, నిద్రాణమైన హెయిర్ ఫోలికల్స్‌ను ఉత్తేజపరుస్తుంది, కొత్త జుట్టు పెరుగుదలను ప్రోత్సహిస్తుంది.

5. బాదం: బాదంపప్పు (Almonds) లో మెగ్నీషియం పుష్కలంగా ఉంటుంది, మంచి జుట్టు పెరుగుదలను ప్రోత్సహించడంలో, చుండ్రును నివారించడంలో, జుట్టు డ్యామేజ్‌ని అడ్డుకోవడంలో సహాయపడుతుంది.

6. సబ్జా గింజలు: సబ్జా గింజలు జుట్టు పెరుగుదలను ప్రోత్సహించడంతో పాటుగా, జుట్టు పల్చబడడాన్ని నిరోధించే పోషకాహారం. ఈ చిన్న గింజలు జింక్ , రాగితో నిండి ఉంటాయి, రెండు ముఖ్యమైన ఖనిజాలు మీ జుట్టును పోషించడానికి, ఆరోగ్యంగా ఉంచడానికి కలిసి పనిచేస్తాయి. అదనంగా, ఈ గింజలు ఫోలిక్యులర్ వాపుతో పోరాడటానికి సహాయపడే యాంటీ ఇన్ఫ్లమేటరీ లక్షణాలను కలిగి ఉంటాయి.

7. కొబ్బరి: కొబ్బరి మీ జుట్టు నాణ్యతను మెరుగుపరచడంలో సహాయపడే సహజమైన జుట్టు సంరక్షణ రెమెడీ. ఇందులోని అధిక కొవ్వు కంటెంట్ జుట్టు తంతువులను లోతుగా కండిషన్ చేయడానికి మరియు పోషణకు అనుమతిస్తుంది.

8. నువ్వులు: నువ్వులలో ఐరన్, ఫ్యాటీ యాసిడ్స్ పుష్కలంగా ఉంటాయి, ఇది మీ జుట్టు మూలాలను పోషించి కొత్త జుట్టు పెరుగుదలను ప్రేరేపిస్తుంది. అదనంగా, నువ్వులు యాంటీఆక్సిడెంట్లను కలిగి ఉంటాయి, ఇవి జుట్టు తెల్లబడటం, జుట్టు పల్చబడడాన్ని నిరోధించడంలో సహాయపడతాయి.

9. జనపనార గింజలు: ఒమేగా-3, 6, , 9 ఫ్యాటీ యాసిడ్స్‌తో ప్యాక్ చేయబడిన జనపనార గింజలు ఆరోగ్యకరమైన జుట్టు పెరుగుదలను ప్రోత్సహిస్తాయి. ఈ గింజలు తలలో రక్త ప్రసరణను మెరుగుపరుస్తాయి, ఇది జుట్టు పెరుగుదలను ప్రేరేపిస్తుంది మరియు జుట్టు మూలాలకు పోషణను అందిస్తుంది.

10. పిస్తాపప్పు: బయోటిన్‌లో పుష్కలంగా ఉన్న పిస్తాలు జుట్టు రాలడాన్ని ఎదుర్కోవడానికి, పొడి జుట్టుకు పోషణను అందించడంలో సహాయపడతాయి. ఇవి ఐరన్ పోషకానికి గొప్ప మూలం, ఇది ఆరోగ్యకరమైన జుట్టు పెరుగుదలకు అవసరం.

11. మెంతులు: జుట్టు రాలడం, సన్నబడటానికి కారణమయ్యే DHT (డైహైడ్రోటెస్టోస్టెరోన్) సామర్థ్యాన్ని నెమ్మదింపజేసే సమ్మేళనాలను మెంతులు కలిగి ఉంటాయి. DHT స్థాయిలను తగ్గించడం ద్వారా, మెంతులు (Fenugreek Seeds) ఆరోగ్యకరమైన జుట్టు పెరుగుదలను ప్రోత్సహిస్తాయి, జుట్టు రాలడాన్ని నిరోధించడంలో సహాయపడతాయి.