Hindustan Times Telugu News

uddhav thackeray resign for cm post: శివసేన అధినేత ఉద్దవ్ ఠాక్రే కీలక నిర్ణయం తీసుకున్నారు. బలపరీక్షపై సుప్రీంకోర్టు తీర్పు ఇచ్చిన కాసేపటికే ఫేస్ బుక్ లైవ్ ద్వారా మాట్లాడారు. సీఎం పదవికి ఉద్ధవ్ ఠాక్రే రాజీనామా చేస్తున్నట్లు ప్రకటించారు. బలపరీక్షపై సుప్రీం ఇచ్చిన తీర్పును గౌరవిస్తున్నట్లు వెల్లటించారు. ఈ సందర్భంగా మంత్రివర్గం తీసుకున్న నిర్ణయాలను వెల్లడించారు.

తన ఎమ్మెల్సీ పదవికి కూడా రాజీనామా చేస్తున్నట్లు ఉద్దవ్ ప్రకటించారు. తనకు మద్దతు నిలిచిన కాంగ్రెస్ తో పాటు ఎన్సీపీలకు ధన్యవాదాలు తెలిపారు. ఔరంగాబాద్ పేరు శంబాజీ నగర్ గా, ఉస్మాన్ బాద్ ను దారాశివ్ పేరు మార్చటం తనకు సంతృప్తిని ఇచ్చినట్లు పేర్కొన్నారు. తమ ప్రభుత్వానికి కొందరి దిష్టి తగిలిందన్న ఆయన.. సొంత పార్టీ వాళ్లే తమను మోసం చేశారని వ్యాఖ్యానించారు.

'ముఖ్యమంత్రి పదవితో పాటు ఎమ్మెల్సీ పదవికి రాజీనామా చేస్తున్నాను. అనూహ్య పరిణామాల మధ్య అధికారంలోకి వచ్చాను. అదే రీతిలో అధికారం నుంచి తప్పుకున్నాను. మహారాష్ట్ర ప్రజలతోనే ఉంటాను. ఎక్కడికి వెళ్లను. మళ్లీ శివసేన భవన్ లోనే కూర్చుంటాను… ప్రజలను కలుస్తాను' - ఉద్దవ్ ఠాక్రే, శివసేన అధినేత

బీజేపీలో సంబరాలు… సీఎంగా ఫడ్నవీస్..!

మరోవైపు బీజేపీ క్యాంప్ లో సంబరాలు మొదలయ్యాయి. సీఎంగా ఉద్ధవ్ రాజీనామా చేయటంతో… ఫడ్నవీస్ సీఎంగా ప్రమాణస్వీకారం చేయటం ఖాయంగానే కనిపిస్తోంది. ముంబైలోని ఓ హోటల్ లో సమావేశమైన ఫడ్నవీస్, బీజేపీ రాష్ట్ర అధ్యక్షుడు చంద్రకాంత్ పాటిల్... ఇతర నేతలతో సంబరాలు చేసుకున్నారు. స్వీట్లు తినిపించుకుంటూ సందడి చేశారు. ఫడ్నవీస్ కు మద్దతుగా పార్టీ నేతలు నినాదాలు చేశారు. ఇక ఏక్ నాథ్ షిండే డిప్యూటీ సీఎం అవుతారనే చర్చ నడుస్తోంది. రెబల్ ఎమ్మెల్యేల్లో 10 మందికి మంత్రి పదవులు వస్తాయన్న వార్తలు బయటికి వస్తున్నాయి.

రేపు మహారాష్ట్ర అసెంబ్లీలో బల పరీక్ష ఉన్న నేపథ్యంలో షిండే క్యాంప్ గౌహతి నుంచి బయల్దేరి గోవాకు చేరింది. రేపు మహారాష్ట్రకు చేరుకోనున్నారు. గురువారం జరిగే బలపరీక్షకు తిరుగుబాటు ఎమ్మెల్యేలు హాజరుకానున్న నేపథ్యంలో వారికి భారీ భద్రతను కల్పించనున్నారు. ఇక రాష్ట్రంలో ఎలాంటి అవాంఛనీయ ఘటనలు చోటు చేసుకోకుండా పటిష్టమైన భద్రతా చర్యలు చేపట్టారు.

SC On Maharashtra Floor Test: శివసేన పిటిషన్‌పై సుప్రీంకోర్టులో సుదీర్ఘ విచారణ కొనసాగింది. శివసేన తరపున అభిషేక్‌ సింఘ్వి, షిండే తరపున ఎంకే కౌల్‌ వాదనలు వినిపించారు. ఇరువైపు వాదనలు విన్న అత్యున్నత న్యాయస్థానం కీలక ఉత్తర్వులు జారీ చేసింది. బల పరీక్షకు గ్రీన్ సిగ్నల్ ఇచ్చింది. స్టే విధించేందుకు నిరాకరించింది. సుప్రీం ఆదేశాల నేపథ్యంలో గురువారం ఉదయం 11 గంటలకు మహారాష్ట్ర అసెంబ్లీలో బల పరీక్ష జరగనుంది.

మరోవైపు ఎమ్మెల్యేలపై అనర్హత వేటు విషయంలో దాఖలైన రిట్ పిటిషన్ కేసులో తుది నిర్ణయం స్పీకర్ పరిధిలో ఉందని.. ఈ నేపథ్యంలో తుది ఆదేశాలకు లోబడే రేపటి బలపరీక్ష జరగాల్సి ఉంటుందని సుప్రీంకోర్టు పేర్కొంది. ఇక జైలులో ఉన్న ఎమ్మెల్యేలు నవాబ్ మాలిక్, అనిల్ దేశ్ ముఖ్ దాఖలు చేసుకున్న పిటిషన్ పై కోర్టు విచారించిది. రేపటి బలపరీక్షకు హాజరయ్యేందుకు అనుమతి ఇచ్చింది.

ఒక రోజు సమయం సరికాదు - శివసేన తరపు న్యాయవాది

బల నిరూపణకు ఒక రోజు మాత్రమే సమయం ఇవ్వడం అన్యాయమని శివసేన లాయర్‌ సింఘ్వీ కోర్టు దృష్టికి తీసుకెళ్లారు. ఇద్దరు ఎమ్మెల్యేలకు కరోనా సోకిందని, మరికొంతమంది ఎమ్మెల్యేలు విదేశాల్లో ఉన్నారని వాదించారు. ఈ పరిస్థితుల్లో బల పరీక్ష ఎలా నిర్వహిస్తారని ప్రస్తావించారు. అనర్హత పిటిషన్‌ కోర్టు వద్ద పెండింగ్‌లో ఉందని పేర్కొన్నారు. ‘విశ్వాస పరీక్షకు సంబంధించిన లేఖపై జూన్ 28 అని ఉంది. కానీ ఈరోజు ఉదయం మాకు ఆ లేఖ వచ్చింది. రేపు సభలో విశ్వాస పరీక్ష అని లేఖలో ఉంది. ఒకవైపు ఎన్సీపీకి సంబంధించిన ఇద్దరు ఎమ్మెల్యేలు కోవిడ్ పాజిటివ్‌తో ఉన్నారు. ఒక కాంగ్రెస్ ఎమ్మెల్యే విదేశాల్లో ఉన్నారు. ఓటేసేందుకు ఎవరు అర్హులనేది తేల్చాల్సి ఉంది. కోర్టు ఈ అంశంపై విచారణను వాయిదా వేసింది. గవర్నర్ ఈ కోర్టు ప్రొసీడింగ్స్‌కు విరుద్ధంగా, అలాగే స్పీకర్ ప్రొసీడింగ్స్‌కు విరుద్ధంగా వెళ్లజాలరు..’ అని నివేదించారు. స్పీకర్‌కు ఉన్న సంకెళ్లు తెంచినా, లేక విశ్వాస పరీక్ష వాయిదా వేసినా న్యాయం జరుగుతుందని సింఘ్వీ తన వాదనలు ముగించారు.

బల పరీక్షను జరపాల్సిందే - షిండే తరపు న్యాయవాది

ఎట్టి పరిస్థితుల్లో బల పరీక్షను ఆపొద్దని ఏక్ నాథ్ షిండే లాయర్‌ ఎంకే కౌల్‌ వాదనలు వినిపించారు. గవర్నర్‌కు విచక్షణాధికారాలు ఉన్నాయని ప్రస్తావించారు. మెజార్జీ ఎమ్మెల్యేలు షిండే వైపే ఉన్నారని ధర్మాసనం దృష్టికి తీసుకెళ్లారు. మహారాష్ట్రలో సీఎం ఉద్దవ్‌ ఠాక్రే విశ్వాసాన్ని కోల్పోయారన్నారు. నబం రెబియా కేసులో తీర్పును ప్రస్తావిస్తూ నీరజ్ కిషన్ కౌల్ తన వాదనలు ప్రారంభించారు. సభాపతి తొలగింపుపై నిర్ణయం పూర్తయ్యేవరకు అనర్హత ప్రొసీడింగ్స్‌లో నిర్ణయం తీసుకోజాలరని ఈ కేసులో తీర్పును ఉటంకించారు. ముందుగా స్పీకర్ తన పదవిలో ఉండేందుకు అర్హుడా లేదా అన్నదానిపై నిర్ణయం తీసుకోవాల్సి ఉందని నివేదించారు. ముఖ్యమంత్రి విశ్వాస పరీక్షకు సిద్ధంగా లేరంటేనే ఆయన మెజారిటీ కోల్పోయారని ప్రాథమికంగా అవగతమవుతోందని కౌల్ నివేదించారు. విశ్వాస పరీక్ష ఎదుర్కోవడమంటే రాజకీయ జవాబుదారీతనం కలిగి ఉండడమని, రాజకీయ నైతికత కలిగి ఉండడమని కౌల్ నివేదించారు. ఈ సందర్భంగా జస్టిస్ సూర్యకాంత్ కౌల్ ను ప్రశ్నిస్తూ అసమ్మతి గ్రూపులో ఎంతమంది ఎమ్మెల్యేలు ఉన్నారని అన్నారు. 55 మందిలో 39 మంది ఎమ్మెల్యేలు అసమ్మతి వర్గంలో ఉన్నారని కౌల్ నివేదించారు. అందుకే విశ్వాస పరీక్షకు ముఖ్యమంత్రి సిద్ధంగా లేరని చెప్పారు.తాము (ఎమ్మెల్యేలు) శివ సేనను వీడడం లేదని, తామే శివసేన అని అసమ్మతి వర్గం ఎమ్మెల్యేల తరపు న్యాయవాది కౌల్ నివేదించారు. కేవలం 14 మంది మాత్రమే తమను విభేదిస్తున్నారని విన్నవించారు.

మొత్తంగా 3 గంటలకు పైగా వాదనలు ఉన్న సుప్రీంకోర్టు ధర్మాసనం…. బలపరీక్షకు అనుకూలంగా తీర్పునిచ్చింది.

ప్రతిపక్ష నేత దేవేంద్ర ఫడణవిస్ వచ్చి కోరిన వెంటనే గవర్నర్ భగత్ కోష్యార్ విశ్వాస పరీక్షకు పిలవడం రాజ్యాంగ విరుద్ధమని చీఫ్ విప్ సునీల్ ప్రభు పిటిషన్ దాఖలు చేశారు. మరోవైపు డిప్యూటీ స్పీకర్ రెబల్ ఎమ్మెల్యేలకు ఇచ్చిన అనర్హత నోటీసులపై నిర్ణయం పెండింగ్‌లో ఉండగానే విశ్వాస పరీక్ష జరపడాన్ని తప్పుపట్టారు.

కాగా ఇంతకుముందు డిప్యూటీ స్పీకర్ ఇచ్చిన అనర్హత నోటీసులను సవాలు చేస్తూ ఏక్‌నాథ్ షిండే వర్గం దాఖలు చేసిన పిటిషన్‌‌పై నిన్న విచారించిన సుప్రీం కోర్టు.. ఆ నోటీసులపై జవాబు ఇచ్చేందుకు జూలై 12 వరకు గడువు ఇచ్చింది.

ఆ వెంటనే ప్రతిపక్ష నేత దేవేంద్ర ఫడణవీస్ ఢిల్లీ వెళ్లొచ్చారు. ఆ వెంటనే గవర్నర్‌ను కలిసి ముఖ్యమంత్రిని విశ్వాస పరీక్ష పిలవాలని కోరారు. ఆ వెంటనే గవర్నర్ విశ్వాస పరీక్షకు పిలిచారు.

దీనిని సవాలు చేస్తూ దాఖలైన పిటిషన్‌ను సుప్రీం కోర్టు బుధవారం సాయంత్రం 5 గంటల నుంచి విచారణ జరుపుతోంది.

పిటిషనర్ సునీల్ ప్రభు తరపున సీనియర్ న్యాయవాది అభిషేక్ మను సింఘ్వీ వాదనలు వినిపిస్తున్నారు. ఏక్‌నాథ్ షిండే తరపున వాదనలు వినిపించేందుకు సీనియర్ న్యాయవాది నీరజ్ కిషన్ కౌల్ హాజరయ్యారు. గవర్నర్ తరపున సొలిసిటర్ జనరల్ తుషార్ మెహతా హాజరయ్యారు.

అభిషేక్ మను సింఘ్వి వాదనలు వినిపిస్తూ ‘విశ్వాస పరీక్షకు సంబంధించిన లేఖపై జూన్ 28 అని ఉంది. కానీ ఈరోజు ఉదయం మాకు ఆ లేఖ వచ్చింది. రేపు సభలో విశ్వాస పరీక్ష అని లేఖలో ఉంది. ఒకవైపు ఎన్సీపీకి సంబంధించిన ఇద్దరు ఎమ్మెల్యేలు కోవిడ్ పాజిటివ్‌తో ఉన్నారు. ఒక కాంగ్రెస్ ఎమ్మెల్యే విదేశాల్లో ఉన్నారు..’ అని నివేదించారు. ‘ఇది సూపర్ సోనిక్ స్పీడ్‌తో నిర్వహిస్తున్న ఫ్లోర్ టెస్ట్’ అని సింఘ్వి నివేదించారు.

‘ఎమ్మెల్యేలు పార్టీ ఫిరాయింపు అభియోగాలను ఎదుర్కొంటున్నారు. ఒకవేళ ఏక్ ‌నాథ్ షిండే పిటిషన్‌ను సుప్రీం కోర్టు కొట్టేస్తే.. రేపటి బలపరీక్ష జూలై 11 నాటి సుప్రీం కోర్టు ఆదేశాలకు లోబడి ఉంటుందా?’ అని వాదించారు.

‘ఓటేసేందుకు ఎవరు అర్హులనేది తేల్చాల్సి ఉంది. కోర్టు ఈ అంశంపై విచారణను వాయిదా వేసింది..’ అని సింఘ్వీ నివేదించారు.

‘గవర్నర్ ఈ కోర్టు ప్రొసీడింగ్స్‌కు విరుద్ధంగా, అలాగే స్పీకర్ ప్రొసీడింగ్స్‌కు విరుద్ధంగా వెళ్లజాలరు..’ అని నివేదించారు.

‘న్యాయస్థానం ఏక్‌నాథ్ షిండే పిటిషన్ కొట్టివేసిందనుకుందాం. ఎమ్మెల్యేలపై అనర్హత వేటు పడుతుంది. అలాంటప్పుడు రేపటి బలపరీక్షను రద్దు చేస్తారా?’ అని వాదించారు.

‘ఎమ్మెల్యేలకు డిప్యూటీ స్పీకర్ జూన్ 21న అనర్హత నోటీసులు జారీచేశారు. ఒకవేళ అనర్హతకు గురైతే ఆ తేదీ నుంచి వారి అనర్హత వర్తిస్తుంది..’ అని సింఘ్వీ నివేదించారు. ‘అంటే కోర్టు జూన్ 21న అనర్హతకు గురైన వారిని విశ్వాస పరీక్షలో ఓటేసేందుకు అనుమతించినట్టవుతుంది..’ అని నివేదించారు.

‘అనర్హత వేటు పడాల్సిన సభ్యులు ఓటేస్తే అది ప్రజాస్వామ్య మూలాలపై వేటేసినట్టే.. అలాగే చాలా వేగంగా నిర్ణయాలు తీసుకుంటున్నారు. గవర్నర్ ముఖ్యమంత్రి సలహా మేరకు నడుచుకోవాల్సి ఉంటుంది. అలా జరుగుతోందా లేదో తెలియదు. కానీ ప్రతిపక్ష నేత సలహా మేరకు నడుచుకోరాదు..’ అని నివేదించారు.

‘ఇలాంటి పరిస్థితి వస్తే తమను సంప్రదించవచ్చని మొన్నటి కేసు సందర్భంగా మాకు స్వేచ్ఛనిచ్చారు. ఊహించిన దాని కంటే వేగంగా ఆ పరిస్థితి వచ్చింది..’ అని సింఘ్వీ నివేదించారు.

‘34 మంది ఎమ్మెల్యేలు గవర్నర్‌కు లేఖ ఇచ్చారు. ఆ లేఖ ఇవ్వడమంటే స్వయంగా తమ సభ్యత్వాన్ని స్వచ్ఛందంగా వదులుకున్నట్టే.. ఈ మేరకు సుప్రీం కోర్టు తీర్పులు కూడా ఉన్నాయి..’ అని సింఘ్వీ నివేదించారు.

‘తమ పార్టీ గురించి గవర్నర్‌ను కలవడం, ఫిర్యాదుచేయడం అంటేనే స్వచ్ఛందంగా సభ్యత్వాన్ని వదులుకోవడం.. ఈమేరకు సుప్రీం కోర్టు మూడు కేసుల్లో తీర్పు ఇచ్చింది..’ అని సింఘ్వీ నివేదించారు.

ఈ సందర్భంలో జస్టిస్ సూర్యకాంత్ జోక్యం చేసుకుంటూ గవర్నర్ చర్యను ఎందుకు అనుమానించాలని ప్రశ్నించారు. దీనికి సింఘ్వి జవాబు ఇస్తూ.. గవర్నర్ ప్రతి చర్య కూడా న్యాయ సమీక్షకు లోబడి ఉంటుందని బొమ్మై కేసులో సుప్రీం కోర్టు ఇచ్చిన తీర్పును ప్రస్తావించారు.

డిస్‌క్వాలిఫికేషన్ ప్రొసీడింగ్‌పై స్టే ఉండి, ఆ వెంటనే ఫ్లోర్ టెస్ట్ ప్రకటన చేసిన సందర్భాలేవీ లేవని సింఘ్వీ నివేదించారు.

తిరిగి జస్టిస్ సూర్యకాంత్ జోక్యం చేసుకుంటూ ‘ప్రభుత్వానికి మెజారిటీ లేదని గవర్నర్‌కు తెలుసనుకుందాం. ప్రభుత్వం స్పీకర్‌ను ఉపయోగించుకుని అనర్హత నోటీసులు ఇప్పించిందనుకుందాం.. అప్పుడు గవర్నర్ ఏం చేయాలి? గవర్నర్ తన విచక్షణను ఉపయోగించవచ్చా?’ అని ప్రశ్నించారు.

దీనికి సింఘ్వీ బదులిస్తూ గవర్నర్ ఎలాంటి వెరిఫికేషన్ చేయలేదని, కోవిడ్ నుంచి ఆయన రెండు రోజుల క్రితమే కోలుకున్నారని నివేదించారు. స్పీకర్‌పై అనర్హత కోరుతూ దాఖలు చేసిన తీర్మానం కూడా వెరిఫై చేయలేని సోర్సెస్ నుంచి మెయిల్ ద్వారా వచ్చినందున తిరస్కరణకు గురైందని నివేదించారు. పదో షెడ్యూలు ద్వారా దఖలు పడిన అధికారాలను తప్పించేందుకు వారు స్పీకర్‌పై అవిశ్వాసం నోటీసు ఇచ్చారని నివేదించారు.

గవర్నర్ నిర్ణయాలపై న్యాయ సమీక్ష జరపవచ్చని, ఆర్టికల్ 361 ద్వార వచ్చే ఇమ్యూనిటీ కేవలం కోర్టు గవర్నర్‌ను ప్రతివాదిగా చేయకుండా ఉండడమేనని, అందుకే సెక్రటరీని పార్టీగా చేర్చుతారని సింఘ్వీ నివేదించారు.

‘మధ్య ప్రదేశ్ కేసులో లాగా ఇక్కడ సభాపతికి స్వేచ్ఛ లేకుండా పోయింది. సభ్యుల రాజీనామాల విషయంలో గానీ, అనర్హత విషయంలో గానీ సభాపతి నిర్ణయం తీసుకోకుండా ఏదీ ఆపలేదు. విశ్వాస పరీక్షకు పిలిచినప్పటికీ ఇందులో మార్పుండదు..’ అని సింఘ్వీ మధ్యప్రదేశ్ కేసు తీర్పును ఉఠంకించారు. కానీ ఈరోజు స్పీకర్ చేతులు కట్టేసి ఉన్నాయని సింఘ్వీ వాదించారు.

స్పీకర్‌కు ఉన్న సంకెళ్లు తెంచినా, లేక విశ్వాస పరీక్ష వాయిదా వేసినా న్యాయం జరుగుతుందని సింఘ్వీ తన వాదనలు ముగించారు.

నీరజ్ కిషన్ కౌల్ వాదనలు ప్రారంభం..

నబం రెబియా కేసులో తీర్పును ప్రస్తావిస్తూ నీరజ్ కిషన్ కౌల్ తన వాదనలు ప్రారంభించారు. సభాపతి తొలగింపుపై నిర్ణయం పూర్తయ్యేవరకు అనర్హత ప్రొసీడింగ్స్‌లో నిర్ణయం తీసుకోజాలరని ఈ కేసులో తీర్పును ఉటంకించారు.

ముందుగా స్పీకర్ తన పదవిలో ఉండేందుకు అర్హుడా లేదా అన్నదానిపై నిర్ణయం తీసుకోవాల్సి ఉందని నివేదించారు.

ఎమ్మెల్యే రాజీనామా చేశాడా? లేక పదో షెడ్యూలు కింద అనర్హత వర్తిస్తుందా? వంటి అంశాల కారణంగా విశ్వాస పరీక్షలో జాప్యం తగదని సుప్రీం కోర్టు చెప్పిందని కౌల్ ప్రస్తావించారు.

ఈ సందర్భంలో జస్టిస్ సూర్యకాంత్ జోక్యం చేసుకుంటూ.. ఈ కేసులో ప్రొసీడింగ్స్‌ను స్పీకర్ స్వచ్ఛందంగా నిలిపివేయలేదని, కోర్టు ఆదేశాలతోనే ఆపేశారని గుర్తు చేశారు.

ఈ సందర్భంలో కౌల్ వాదనలు కొనసాగిస్తూ.. తాము ఈ విషయంలో కోర్టుకు వచ్చినప్పుడు తమకు సంపూర్ణ మెజారిటీ ఉందని, సభాపతి సభ విశ్వాసం కోల్పోయారని కూడా తాము లేఖ రాశామని గుర్తు చేశారు. జూన్ 24న సభాపతి తమకు అనర్హత నోటీసులు జారీచేశారని నివేదించారు.

‘సభాపతికి అర్హత లేదనేదే నా ప్రధాన వాదన. ఇది సుప్రీం కోర్టు రాజ్యాంగ ధర్మాసనం కూడా ఇదివరకే తేల్చింది..’ అని కౌల్ వాదించారు.

‘సాధారణంగా పార్టీలు విశ్వాస పరీక్ష జరిగేలా కోర్టును ఆశ్రయిస్తాయి. కానీ ఇక్కడ విరుద్ధంగా జరుగుతోంది..’ అని కౌల్ ధర్మాసనం దృష్టికి తెచ్చారు.

విశ్వాస పరీక్షలో జాప్యం రాజ్యాంగానికి ప్రమాదకరం అని నివేదించారు. గవర్నర్ విశ్వాస పరీక్ష నిర్వహించడం ఇక్కడ అహేతుకమా? అని వాదించారు.

ప్రభుత్వం మెజారిటీ కోల్పోయిందని తెలిసి, సభాపతి ద్వారా అనర్హత నోటీసులు జారీచేయించే పరిస్థితి ఉత్పన్నమవుతుందా? అని జస్టిస్ సూర్యకాంత్ ఈ సందర్భంలో ప్రశ్నించారు.

దీనికి కౌల్ జవాబు ఇస్తూ నబం రబియా కేసు ఇదే చెబుతోందని ప్రస్తావించారు.

అనర్హత ప్రొసీడింగ్స్, విశ్వాస పరీక్ష.. రెండూ వేర్వరని, సభాపతి అనర్హత ప్రొసీడింగ్స్ కొనసాగించలేరని సుప్రీం కోర్టు వేర్వేరు కేసుల్లో స్పష్టంచేసిందని కౌల్ నివేదించారు.

ముఖ్యమంత్రి విశ్వాస పరీక్షకు సిద్ధంగా లేరంటేనే ఆయన మెజారిటీ కోల్పోయారని ప్రాథమికంగా అవగతమవుతోందని కౌల్ నివేదించారు.

విశ్వాస పరీక్ష ఎదుర్కోవడమంటే రాజకీయ జవాబుదారీతనం కలిగి ఉండడమని, రాజకీయ నైతికత కలిగి ఉండడమని కౌల్ నివేదించారు.

ఈ సందర్భంగా జస్టిస్ సూర్యకాంత్ కౌల్ ను ప్రశ్నిస్తూ అసమ్మతి గ్రూపులో ఎంతమంది ఎమ్మెల్యేలు ఉన్నారని అన్నారు.

55 మందిలో 39 మంది ఎమ్మెల్యేలు అసమ్మతి వర్గంలో ఉన్నారని కౌల్ నివేదించారు. అందుకే విశ్వాస పరీక్షకు ముఖ్యమంత్రి సిద్ధంగా లేరని అన్నారు.

వారిలో ఎంతమందిపై అనర్హత నోటీసులు ఇచ్చారని న్యాయమూర్తి ప్రశ్నించగా 16 మందికి ఇచ్చినట్టుగా కౌల్ వివరించారు.

తాము (ఎమ్మెల్యేలు) శివ సేనను వీడడం లేదని, తామే శివసేన అని అసమ్మతి వర్గం ఎమ్మెల్యేల తరపు న్యాయవాది కౌల్ నివేదించారు. కేవలం 14 మంది మాత్రమే తమను విభేదిస్తున్నారని విన్నవించారు.

సీనియర్ అడ్వొకేట్ మణిందర్ సింగ్ రాత్రి 7.30కి తన వాదనలు ప్రారంభించారు.

ఎప్పుడైనా విశ్వాస పరీక్ష కోరుతూ వచ్చే పిటిషన్ల కోసం పనివేళల అనంతరం కూడా విచారించారని, విశ్వాస పరీక్ష వద్దని కోరుతూ రావడం ఇదే తొలిసారని నివేదించారు. విశ్వాస పరీక్ష కోసం గవర్నర్‌కు మంత్రి మండలి సలహా అక్కర్లేదని వాదించారు.

ప్రస్తుత పిటిషన్‌ను తిరస్కరించడం ద్వారా కోర్టు పదో షెడ్యూలు ఉద్దేశాలను కాపాడినట్టవుతుందని సింగ్ అన్నారు. రిట్ పిటిషన్ 55 మంది సభ్యుల్లోని 16 మంది మద్దతుతో మాత్రమే దాఖలైందని గుర్తు చేశారు.

ఈ సందర్భంలో జస్టిస్ సూర్యకాంత్ జోక్యం చేసుకుంటూ.. ఈ అంశం అసంబద్ధమవుతుందని తాము అనుకోవడం లేదని, అర్హత లేకుండా విశ్వాస పరీక్షలో పాల్గొనే అవకాశం కల్పించామనుకుంటే.. అనర్హత తేలినప్పుడు దానిని రద్దు చేయొచ్చు కదా అని అభిప్రాయపడ్డారు.

గవర్నర్ తరపు న్యాయవాది వాదనలు ప్రారంభం

గవర్నర్ తరపున సొలిసిటర్ జనరల్ వాదనలు ప్రారంభించారు. స్పీకర్‌ను సుప్రీం కోర్టు అడ్డుకున్నదన్న వాదన సరికాదని, చట్టంలోనే అలా ఉందని అన్నారు. సభాపతి విశ్వాస పరీక్షకు ఓటర్ల జాబితాను నిర్ణయించలేరని అన్నారు. ఎలక్టోరల్ కాలేజ్‌ను నిర్ణయించలేరని నివేదించారు.

విశ్వాస పరీక్షకు ఆదేశిస్తూ గవర్నర్ తీసుకున్న నిర్ణయాన్ని సవాలు చేసేందుకు తగిన కారణాలు లేవని నివేదించారు.

తిరిగి వాదనలు ప్రారంభించిన సింఘ్వీ

శివసేన చీఫ్ విప్ తరపున అభిషేక్ మను సింఘ్వీ తిరిగి వాదనలు కొనసాగించారు. అనర్హతపై నిర్ణయం తీసుకోకుండా సభాపతి చేతులు కట్టేశారని, ఒకవైపు పదో షెడ్యూలుపై నిర్ణయం తీసుకోకుండా ఇంకోవైపు విశ్వాస పరీక్ష నిర్వహించమంటున్నారని వాదించారు. సభాపతిపై విశ్వాస పరీక్షకు తీర్మానాన్ని కేవలం అసెంబ్లీ కొలువుదీరినప్పుడు మాత్రమే సాధ్యమని నివేదించారు. అలాగే సభాపతి తొలగింపునకు తగిన అభియోగాలు మోపాలని, కానీ ఇక్కడ ఎలాంటి అభియోగాలు లేవని నివేదించారు.

గవర్నర్లు దైవదూతలు కాదని, వారూ మనుషులేనని, అందుకే బొమ్మై కేసులో తీర్పు వెలువడిందని నివేదించారు. కోర్టులో ఉన్న అంశాల్లో గవర్నర్ చర్య తీసుకోలేరని, వెరిఫై చేయలేరని నివేదించారు. ముఖ్యమంత్రి అభిప్రాయాన్ని కూడా తీసుకోలేదని నివేదించారు.

నబం రబియా కేసులో తీర్పును ఇక్కడ నేరుగా అప్లై చేస్తే పదో షెడ్యూలు కథ ముగిసినట్టేనని నివేదించారు. ఫిరాయింపుదారు ఎల్లప్పుడూ స్పీకర్ తొలగింపు కోసం రిజల్యూషన్ పంపగలడని వాదించారు. వాస్తవాలను పట్టించుకోకుండా ఈ తీర్పును వర్తింపజేస్తే ఇక పదో షెడ్యూలుకు అర్థమే ఉండదని వాదించారు.

ధర్మాసనం ముందు ఇరుపక్షాల వాదనలు రాత్రి 8.25కు ముగిశాయి.

కాగా ఈ పిటిషన్‌పై ఉత్తర్వులను రాత్రి 9 గంటలకు వెలువరించనున్నట్టు ధర్మాసనం వెల్లడించి విరామం ప్రకటించింది.

మీరు ఇప్పటివరకు ఎన్నో రకాల పవర్ బ్యాంక్‌లను చూసుంటారు. వాటన్నింటి గరిష్ట సామర్థ్యం 20000mAh వరకు ఉండవచ్చు. అయితే ఇప్పుడు అంతకుమించిన శక్తితో బాహుబలి పవర్ బ్యాంక్ ఒకటి మార్కెట్లోకి వచ్చేసింది. దీనిని తయారుచేసింది కూడా ఇండియన్ కంపెనీ కావడం మరొక విశేషం.

మొబైల్ యాక్సెసరీస్ బ్రాండ్ ఆంబ్రేన్.. Stylo Max పేరుతో మొట్టమొదటి హెవీ-డ్యూటీ, పవర్-ప్యాక్డ్ పవర్ బ్యాంక్‌ను ఆవిష్కరించింది. ఏకంగా 50,000mAh భారీ బ్యాటరీ సామర్థ్యంతో స్టైలో మ్యాక్స్ పవర్ బ్యాంక్‌ను విడుదల చేసింది. దీనిని ప్రత్యేకంగా హైకర్‌లు, క్యాంపర్‌ల కోసం ఆంబ్రేన్ రూపొందించింది. ఇది డిజిటల్ కెమెరాలు, ల్యాప్‌టాప్‌ల వంటి పెద్దసైజ్ పరికరాలకు కూడా బ్యాటరీ బ్యాకప్ అందించగలదు. సుదూర ప్రయాణాలు చేసేటపుడు ఈ పవర్ బ్యాంక్ ఎంతో ఉపయుక్తంగా ఉంటుంది. ఇది మీ స్మార్ట్‌ఫోన్‌కు అనేకసార్లు పూర్తి ఛార్జింగ్‌ను అందివ్వగలదు.

Ambrane Stylo Max పవర్ బ్యాంక్ ఫీచర్లు

ఈ పవర్ బ్యాంక్ 50000 mAh Li-Polymer బ్యాటరీతో వస్తుంది. క్విక్ ఛార్జ్ 3.0 కోసం ఇది 20W ఫాస్ట్ ఛార్జింగ్‌కు సపోర్ట్ చేస్తుంది. అలాగే హై-స్పీడ్ టూ-వే ఛార్జింగ్‌కు ఈ పవర్ బ్యాంక్ సపోర్ట్ చేస్తుంది. దీనికి కనెక్ట్ చేసిన ప్రతి పరికరాన్ని సురక్షితంగా ఛార్జ్ చేయడానికి పవర్ అవుట్‌పుట్‌ని స్వయంచాలకంగా నియంత్రిస్తుంది.

ఈ Stylo Max పవర్‌ బ్యాంక్ ఒకే సమయంలో ఎక్కువ పరికరాలను ఛార్జ్ చేయగలదు. దీనికి రెండు USB పోర్టులు, అలాగే ఒక టైప్-C కనెక్షన్‌తో ఇచ్చారు. ఇది భద్రతపరంగానూ నాణ్యమైనదిగా ఉంది. హీటింగ్ సమస్య, షార్ట్ సర్క్యూట్లను నిరోధించడం కోసం ఈ పవర్ బ్యాంక్‌ను 9 లేయర్లతో తయారుచేశారు. అంతేకాకుండా దీనిని హై-గ్రేడియంట్ మాట్ మెటాలిక్ కేసింగ్‌లో పొందుపరిచారు. దీంతో ఇది ఎంతో దృఢంగా ఉంటుంది.

ధర ఎంతంటే..

అల్ట్రా-హై కెపాసిటీ 50000mAh కలిగిన ఆంబ్రేన్ స్టైలో మ్యాక్స్ పవర్ బ్యాంక్ ధర రూ. 3999/- మాత్రమే. ఇది నీలం, నలుపు రంగులలో లభ్యం అవుతోంది. కంపెనీ దీనికి 180 రోజుల వారంటీని కూడా ఇస్తోంది. ఈ పవర్ బ్యాంకును వినియోగదారులు Amazon, Flipkartతో పాటు Embraine వెబ్‌సైట్ నుంచి కొనుగోలు చేయవచ్చు.

ఒకవైపు బరువు తగ్గాలని కఠినమైన వ్యాయామాలు చేస్తూ మరోవైపు బిర్యానీలు, పులావులు తింటే ఇంకా లావు అవుతారు తప్ప ఎలాంటి ప్రయోజనం ఉండదు. ఫిట్‌గా ఉండేందుకు వ్యాయామంతో పాటు సరైన డైట్ కూడా ముఖ్యమే. ఇటీవల కాలంలో కీటో డైట్, ఫ్లెక్సిటేరియన్ డైట్, అట్కిన్స్ డైట్ అంటూ రకరకాల డైట్‌లను అవలంబిస్తున్నారు. అయితే వీటన్నింటికంటే వేగన్ డైట్ ఎంతో ప్రభావవంతమైనదని ప్రాచుర్యంలోకి వచ్చింది. నేడు ప్రపంచవ్యాప్తంగా అనేక మందిసెలబ్రిటీలు తమనితాము ఫిట్‌గా ఉంచుకునేందుకు వేగన్ డైట్‌కు మారిపోతున్నారు.

బరువు తగ్గడానికి, ఆపై తగ్గిన బరువును మెయింటెయిన్ చేయడానికి, శరీరాన్ని ఫిట్‌గా, ఆరోగ్యంగా ఉంచుకోవడానికి వేగన్ డైట్ చాలా మంచి ఆప్షన్ అని చెబుతున్నారు. ఇంతకీ ఈ వేగన్ డైట్ అంటే ఏమిటి, ఏమేం తినాలి? ఎలాంటి ప్రయోజనాలు ఉంటాయో ఇక్కడ తెలుసుకోండి.

వేగన్ డైట్‌లో ఎలాంటి ఆహారం ఉంటుంది

వేగన్ డైట్ అంటే పూర్తిగా వెజిటేరియన్ డైట్ అని అర్థం. సంపూర్ణమైన శాఖాహారం మాత్రమే తీసుకోవాల్సి ఉంటుంది. వేగన్ డైట్‌లో భాగంగా శాకాహార ఉత్పత్తులైన ఆకుపచ్చ కూరగాయలతో పాటు పండ్లు, గింజలు ఉంటాయి. అలాగే కాయధాన్యాలు, నట్స్, చపాతీలు తీసుకోవచ్చు. వండుకోవటానికి నూనె కూడా వెజిటెబుల్ ఆయిల్ అయి ఉండాలి.

వేగన్ డైట్ పాటిస్తున్నపుడు మాంసాహారానికి పూర్తిగా దూరంగా ఉండాలి. కనీసం గుడ్లు, పాలు, ఇతర పాలపదార్థాలు, తేనే, మయోనీస్ సాస్, ఐస్ క్రీమ్ లాంటివి కూడా ఎట్టి పరిస్థితుల్లో తీసుకోవద్దు. జంతువులు నుంచి వచ్చే పాలకు ప్రత్యామ్నాయంగా శాఖాహార పాలు అయినటువంటి స్వచ్ఛమైన బాదాంపాలు, సోయాపాలు, కొబ్బరిపాలు తీసుకోవాల్సి ఉంటుంది.

ఈ వేగన్ డైట్‌లోనూ రకాలు కూడా ఉంటాయి. ఇంకా కఠినంగా పాటించేవారు కనీసం కార్బోహైడ్రేట్స్ ఎక్కువగా ఉండే బియ్యం, బంగాళాదుంపలు, అలాగే కొవ్వు కలిగిన ఆహారాలు కూడా ఫైబర్ అధికంగా ఉండేలా పచ్చికూరగాయలు, పండ్లు మాత్రమే తీసుకుంటారు.

వేగన్ డైట్ ద్వారా కలిగే ఆరోగ్య ప్రయోజనాలు

• వేగన్ డైట్‌లో కాంప్లెక్స్ కార్బోహైడ్రేట్స్ అధికంగా ఉంటాయి, ఈ ఆహారంలో రక్తంలో చక్కెర స్థాయి పెరిగే పదార్థాలేవీ ఉండవు. ఈ కారణంగా రక్తపోటు అదుపులో ఉంటుంది.
• పండ్లు, కూరగాయలు, నట్స్ మొదలగు వాటిలో యాంటీ ఆక్సిడెంట్లు, ఒమేగా 3 వంటి పోషకాలు పుష్కలంగా ఉంటాయి. డిప్రెషన్, ఆందోళన వంటి సమస్యలను అధిగమించవచ్చు. తద్వారా మానసిక ఆరోగ్యం మెరుగవుతుంది.
• ఈ ఆహారంలో ప్రొటీన్లు, మినరల్స్ పుష్కలంగా ఉంటాయి. ఈ కారణంగా మంచి శక్తి లభిస్తుంది, అలసట అనేది ఉండదు. శరీరాన్ని డిటాక్స్‌ చేస్తుంది.
• ఈ ఆహారం బరువు తగ్గడానికి ఎంతో ఉత్తమమైనదని. దీని వల్ల శరీరానికి కావాల్సిన మొత్తంలో కేలరీలు అందుతాయి కానీ కొవ్వు పేరుకుపోదు. ఆరోగ్యకరమైన రీతిలో బరువు తగ్గించడంలో ఈ డైట్ అత్యంత ప్రభావవంతంగా ఉంటుంది.
• శాకాహారులు మంచి గుండె ఆరోగ్యాన్ని కలిగి ఉంటారని, అలాగే వీరికి కొన్ని వ్యాధులు వచ్చే అవకాశాలు తక్కువగా ఉన్నాయని అధ్యయనాలు చూపిస్తున్నాయి. ఊబకాయం, గుండె జబ్బులు, అధిక కొలెస్ట్రాల్, అధిక రక్తపోటు, మధుమేహం సమస్యలు తలెత్తవు.
• కొన్ని రకాల క్యాన్సర్ వ్యాధులు వచ్చే అవకాశం కూడా తక్కువగా ఉంటుంది. ముఖ్యంగా స్త్రీలలో GI ట్రాక్ట్ , రొమ్ము క్యాన్సర్, అండాశయాలు, గర్భాశయం క్యాన్సర్లు రాకుండా రక్షణ ఉంటుంది.
• జీవితకాలం మెరుగుపడుతుంది.

రిస్క్ కూడా ఉంటుంది

పూర్తిగా వేగన్ డైట్ పాటిస్తే మాంసం, పాలు ఇతర పదార్థాల ద్వారా లభించే పోషకాలు అందవు. ముఖ్యంగా కాల్షియం లేమి ఏర్పడి దంత సమస్యలు వస్తాయి, ఎముకలు బలహీనం అవుతాయి, పోటీన్ లేమితో కణాలు వృద్ధి చెందవు. కాబట్టి ఎదిగే పిల్లలకు, గర్భిణీ స్త్రీలకు ఈ డైట్ శ్రేయస్కరం కాదు.

ఓవైపు బాలీవుడ్‌ షెహన్‌షా అమితాబ్‌ బచ్చన్‌.. మరోవైపు పాన్‌ ఇండియా స్టార్‌ ప్రభాస్‌.. ఇంకోవైపు కేజీఎఫ్‌ డైరెక్టర్‌ ప్రశాంత్‌ నీల్‌.. వీళ్లకుతోడు నేచురల్‌ స్టార్‌ నాని, మలయాళ సూపర్‌స్టార్‌ దుల్కర్‌ సల్మాన్‌.. వీళ్లంతా ఒకే దగ్గర చేరితే ఎలా ఉంటుంది. ఈ మధ్య హైదరాబాద్‌లో వైజయంతీ మూవీస్‌ 50 ఏళ్ల సంబరాల సందర్భంగా ఈ స్టార్లు కలిశారు. పార్టీ ఎంజాయ్‌ చేశారు. కబుర్లతో కాలక్షేపం చేశారు.

ఈ వీడియోను బుధవారం (జూన్‌ 29) వైజయంతీ మూవీస్‌ ట్వీట్‌ చేయడం విశేషం. నిజానికి కొన్ని రోజుల ముందే ఈ ఈవెంట్‌ ఫొటోలు సోషల్‌ మీడియాలో వైరల్‌ అయ్యాయి. వీళ్లందరితో అమితాబ్‌ ఫొటోలకు పోజులివ్వడం, అటు నాని కూడా బిగ్‌ బీతో దిగిన ఫొటోలు షేర్‌ చేసుకోవడంతో ఈ పార్టీ గురించి తెలిసింది. అయితే ఇప్పుడు వైజయంతీ మూవీసే అధికారికంగా ఆ వీడియో రిలీజ్‌ చేశారు.

ఇందులో అమితాబ్‌ బచ్చన్‌తో కలిసి ప్రభాస్‌.. వైజయంతీ మూవీస్‌ కొత్త ఆఫీస్‌ను ప్రారంభించాడు. ఆ తర్వాత ఆఫీస్‌ అంతా తిరుగుతూ, ఈ నిర్మాణ సంస్థ 50 ఏళ్ల ప్రస్థానానికి సంబంధించిన ఫొటోలు చూస్తూ గడిపారు. ప్రస్తుతం ప్రభాస్‌, అమితాబ్‌ బచ్చన్‌, దీపికా పదుకోన్‌ నటిస్తున్న ప్రాజెక్ట్ కేను వైజయంతీ మూవీసే నిర్మిస్తోంది. ఈ ప్రాజెక్ట్‌ కే మూవీకి నాగ్‌ అశ్విన్‌ దర్శకుడు. ఇదొక సైన్స్ ఫిక్షన్‌ మూవీ.

బర్మింగ్‌హామ్‌: ఇంగ్లండ్‌తో ఐదో టెస్ట్‌లో రోహిత్‌ శర్మ ఆడటం లేదని, అతని స్థానంలో బుమ్రా కెప్టెన్సీ వహిస్తాడని వార్తలు వచ్చిన విషయం తెలుసు కదా. కరోనా బారిన పడిన రోహిత్‌కు బుధవారం ఆర్టీ-పీసీఆర్‌ టెస్ట్‌ నిర్వహించగా మరోసారి పాజిటివ్‌గా వచ్చిందని, దీంతో అతడు మ్యాచ్ ఆడే అవకాశం లేదని ఓ బీసీసీఐ అధికారి పీటీఐకి చెప్పారు. అయితే తాజాగా కోచ్‌ రాహుల్‌ ద్రవిడ్‌ మాత్రం దీనిపై మరోలా స్పందించాడు.

రోహిత్‌ శర్మకు ఇంకా ఛాన్స్‌ ఉందని, మ్యాచ్‌కు ఇంకా 36 గంటలు ఉన్న విషయాన్ని గుర్తు చేశాడు. "అతన్ని ఇండియన్‌ టీమ్‌ పర్యవేక్షిస్తోంది. రోహిత్‌ ఇంకా మ్యాచ్‌ నుంచి తప్పుకోలేదు. మ్యాచ్‌కు ఇంకా 36 గంటల సమయం ఉంది. బుధవారం రాత్రి, గురువారం ఉదయం మరోసారి పరీక్షలు నిర్వహిస్తారు. అతని విషయంలో మెడికల్‌ టీమ్‌, స్పోర్ట్స్‌ సైన్స్‌ తుది నిర్ణయం తీసుకుంటుంది" అని ద్రవిడ్‌ స్పష్టం చేశాడు.

ఒకవేళ రోహిత్‌ శర్మ ఆడకపోతే కెప్టెన్‌గా ఎవరుంటారు అన్న ప్రశ్నకు ద్రవిడ్‌ నేరుగా సమాధానం ఇవ్వలేదు. దీనిపై బీసీసీఐ సెలక్టర్ల నుంచి అధికారిక ప్రకటన వస్తుందని అన్నాడు. ఇక ఇంతమంది కెప్టెన్లతో పని చేయాల్సి రావడంపై ద్రవిడ్‌ స్పందిస్తూ.. "నేను బాధ్యతలు చేపట్టినప్పుడు ఇంతమంది కెప్టెన్లతో పని చేయాల్సి వస్తుందని అనుకోలేదు. కానీ దురదృష్టవశాత్తూ గాయాలయ్యాయి. కొన్నిసార్లు ప్లేయర్స్‌పై పని భారం తగ్గించాల్సి వచ్చింది. కెప్టెన్లు మారతారని ఊహించలేం కానీ.. మారినప్పుడు అందుకు తగినట్లు స్పందించి వాళ్లకు తగిన వ్యూహాలు రచించాల్సి ఉంటుంది" అని ద్రవిడ్‌ చెప్పాడు.

ycp mla maddisetti venugopal sensational comments: ప్రకాశం జిల్లా దర్శికి చెందిన వైసీపీ ఎమ్మెల్యే కీలక వ్యాఖ్యలు చేశారు. జగన్ బటన్ నొక్కితే సీఎం గ్రాఫ్ పెరుగుతుంది తప్ప ఎమ్మెల్యేలది కాదన్నారు. ఎమ్మెల్యేల గ్రాఫ్ పెరగాలంటే నాలుగు సీసీ రోడ్లు వేయాలన్న ఆయన.. వైసీపీకి అండగా ఉన్న కార్యకర్తలను ఆదుకోవాలని కామెంట్స్ చేశారు. కార్యకర్తలకు పనులు ఇచ్చి వారిని అప్పుల పాలు చేశానని చెప్పుకొచ్చారు. తన నియోజకవర్గంలో పనులన్నీ వైసీపీ కార్యకర్తలకే అప్పగించానని.. ప్రభుత్వం బిల్లులు విడుదల చేయకపోవడంతో వారంతా అప్పులపాలయ్యారని పార్టీ కోసం కష్టపడి పనిచేసిన వారిని ఆదుకోవాల్సిన అవసరముందని వ్యాఖ్యానించారు.

దర్శి నియోజకవర్గంలో పనులు చేసిన కార్యకర్తలకు రూ.100కోట్ల బిల్లులు పెండింగ్ లో ఉన్నాయని ఎమ్మెల్యే మద్దిశెట్టి తెలిపారు. ప్రభుత్వం నుంచి కార్యకర్తలకు రావాల్సిన పేరుకుపోయిన బిల్లులు మంజూరు చేయాలని కోరారు. కార్యకర్తల్లో బయటకి కనిపిస్తున్న ఆనందం.. వారి జీవితాల్లో లేదని ఆవేదన వ్యక్తం చేశారు. అంతేకాదు గడపగడపకు వెళ్తే ప్రజలు సమస్యలపై నిలదీస్తున్నారని చెప్పుకొచ్చారు. అయితే జిల్లా ప్లీనరీలో ఎమ్మెల్యే ఇలాంటి కామెంట్స్ చేయడం పార్టీలో చర్చనీయాంశమైంది.

ఇదిలా ఉంటే పార్టీలోని పరిణామాలపై మాజీ మంత్రి బాలినేని శ్రీనివాస్ రెడ్డి, నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి సంచలన కామెంట్స్ చేసిన సంగతి తెలిసిందే. పార్టీలో కొందరు ముఖ్యనేతలు తనపై కుట్రలు చేస్తున్నారని ఆయన ఆరోపించారు. పక్క నియోజకవర్గానికి చెందిన వారు తన నియోజకవర్గంలో వేలు పెడుతున్నారని.. వారు వెనక్కి తగ్గితే మంచిదని లేదంటే బుద్ధి చెబుతానని హెచ్చరించారు. అంతేకాదు తన నియోజకవర్గంపై చూపే శ్రద్ధ మీ సొంత నియోజకవర్గాలపై చూపుకోవాలని హితవుపలికారు. ఇక ప్రకాశం జిల్లాకే చెందిన మాజీ మంత్రి బాలినేని శ్రీనివాస్ రెడ్డి కూడా.. పార్టీలో తనపై కుట్రలు చేస్తున్నారని కామెంట్ చేశారు. వైసీపీలో ఎమ్మెల్యేలు తరచూ ఇలాంటి కామెంట్స్ చేయడంపై పార్టీ అధిష్టానం ఎలా స్పందిస్తుందో చూడాలి.

న్యూఢిల్లీ: ఇండియాలోనే కాదు టీమిండియా ఏ టూర్‌కెళ్లినా పేస్‌ బౌలింగ్‌ భారాన్ని బుమ్రాతో కలిసి పంచుకునేది మహ్మద్‌ షమీనే. ఏ ఫార్మాట్‌ అయినా తన పేస్‌తో ప్రత్యర్థిని గడగడలాడించే సత్తా ఉన్న బౌలర్‌ అతడు. అయితే అలాంటి బౌలర్‌ను టీ20 వరల్డ్‌కప్‌కు పక్కన పెట్టాలని టీమిండియా భావిస్తున్నట్లు వార్తలు వస్తున్నాయి. ప్రముఖ న్యూస్‌ ఏజెన్సీ ఏఎన్‌ఐలో వచ్చిన రిపోర్ట్‌ ప్రకారం.. వరల్డ్‌కప్‌కు టీమ్‌ అతన్ని పరిగణనలోకి తీసుకునే అవకాశం లేదు.

గతేడాది టీ20 వరల్డ్‌కప్‌లోనూ బుమ్రా, షమి టీమిండియా పేస్‌ బౌలింగ్‌ అటాక్‌లో కీలకంగా వ్యవహరించారు. ఈ ఏడాది ఐపీఎల్‌లో గుజరాత్‌ టైటన్స్‌ తరఫున ఆడిన షమి.. ఆ టీమ్‌ టైటిల్‌ గెలవడంలో తన వంతు పాత్ర పోషించాడు. ఈ సీజన్‌లో 20 వికెట్లు తీసుకున్నాడు. 2021లో 19 వికెట్లు, 2020లో 20 వికెట్లు తీశాడు. ఆ లెక్కన టీ20ల్లో అతని ప్రదర్శన నిలకడగానే ఉంది.

అయినా ఆస్ట్రేలియాలో జరగబోతున్న టీ20 వరల్డ్‌కప్‌లో మాత్రం భువనేశ్వర్‌, బుమ్రాలే టీమ్‌ పేస్‌ బౌలింగ్‌ను లీడ్‌ చేసే అవకాశం కనిపిస్తోంది. టీ20 ఫార్మాట్‌కు షమి ఫిట్‌ కాడని సెలక్టర్లు భావిస్తున్నట్లు ఆ రిపోర్ట్ వెల్లడించింది. "టీ20 వరల్డ్‌కప్‌ కోసం సెలక్టర్లు షమి పేరును పరిశీలించడం లేదు. అతడు ఈ ఫార్మాట్‌కు ఫిట్‌ కాడని వాళ్లు భావిస్తున్నారు. ఆస్ట్రేలియాలో వరల్డ్‌కప్‌కు ముందు యువ బౌలర్లకు ఎక్కువ అవకాశాలు ఇవ్వాలని అనుకుంటున్నారు. సీనియర్‌ బౌలర్‌గా భువనేశ్వర్‌ను ఎంపిక చేసినా.. షమీకి మాత్రం ఈసారి అవకాశం దక్కకపోవచ్చు" అని బోర్డు వర్గాలు వెల్లడించినట్లు ఏఎన్‌ఐ తన రిపోర్ట్‌లో చెప్పింది.

telangana schools academic calendar: 2022-23 విద్యా సంవ‌త్స‌రానికి సంబంధించిన‌ అకడమిక్ క్యాలెండ‌ర్‌ విడుదలైంది. ఈ మేరకు తెలంగాణ స్కూల్ ఎడ్యుకేష‌న్ డిపార్ట్‌మెంట్ వివరాలను వెల్లడించింది. ఈ విద్యా సంవ‌త్స‌రంలో ఒక‌టి నుంచి ప‌దో త‌ర‌గ‌తి వ‌ర‌కు మొత్తం 230 ప‌ని దినాలు ఉంటాయ‌ని పేర్కొంది. వ‌చ్చే ఏడాది ఏప్రిల్ 24వ తేదీ వ‌ర‌కు పాఠ‌శాల‌లు కొన‌సాగ‌నున్నాయి.

ముఖ్య వివరాలు....

24-04-2023 స్కూల్ లాస్ట్ వర్కింగ్ డే.

230 రోజులు పాఠశాల పని దినాలు.

25-04-2023 నుంచి 11-6-2023 వరకు వేసవి సెలవులు.

9am నుంచి 4pm వరకు ప్రైమరీ స్కూల్.

9am నుంచి 4.15pm వరకు ప్రాథమికోన్నత పాఠశాల.

9.30am నుంచి 4.45pm వరకు ఉన్నత పాఠశాల క్లాస్ లు జరుగుతాయి.

సెప్టెంబరు 26 నుంచి అక్టొబర్ 10 వరకు దసరా సెలవులు(14 రోజులు).

జనవరి 13 నుంచి జనవరి 17 వరకు సంక్రాంతి సెలవులు(5 రోజులు).

క్రిస్మ‌స్ సెల‌వులు – డిసెంబ‌ర్ 22 నుంచి 28 వ‌ర‌కు(7 రోజులు).

రేపు పది ఫలితాలు….

telangana ssc results 2022: తెలంగాణ ప‌దో త‌ర‌గ‌తి ఫ‌లితాలు రేపు(జూన్ 30న) విడుద‌ల కానున్నాయి. ఎస్ఎస్ సీ బోర్డు అధికారులు దీనికోసం ఏర్పాట్లు చేస్తున్నారు. గురువారం ఉదయం 11గంటలకు హైదరాబాద్‌లోని మర్రి చెన్నారెడ్డి మానవ వనరుల కేంద్రంలో పదో తరగతి ఫలితాలను విద్యాశాఖ మంత్రి సబితా ఇంద్రారెడ్డి విడుదల చేస్తారు. విద్యార్ధులు అధికారిక వెబ్‌సైట్‌ www.bse.telangana.gov.in లేదా www.bseresults.telangana.gov.in లో ఫలితాలను చెక్ చేసుకోవచ్చు.

మే 23 నుంచి మే 25 వరకు పదో తరగతి పరీక్షలు జరిగాయి. రాష్ట్ర వ్యాప్తంగా 2,861 పరీక్షా కేంద్రాల్లో పరీక్షలు నిర్వహించారు. మొత్తం 5,09,275 మంది విద్యార్థులు పరీక్షలకు హాజరు అయ్యారు. వీరిలో 2,58,098 మంది బాలురు, 2,51,177 మంది బాలికలు ఉన్నారు. కరోనా నేపథ్యంలో విద్యార్థుల ఆరోగ్యం, సిలబస్ వంటి విషయాలను దృష్టిలో ఉంచుకుని పరీక్షల్లో మార్పులు చేసింది తెలంగాణ ఎస్ఎస్సీ బోర్డు. సిలబస్ ను 80 శాతం తగ్గించింది. ఈ మేరకు పరీక్షా పేపర్ లను 11 నుంచి 6 పేపర్లకు కుదించారు. ఫిజిక్స్, బయాలజీ పేపర్లకు వేర్వేరుగా పరీక్షలు నిర్వహించారు.

ఈ ఏడాది పదో తరగతి పరీక్షలు జూన్‌ 1తో ముగియగా.. ఆ తర్వాతి.. రెండో రోజు జూన్‌ 2 నుంచి టెన్త్ ఎగ్జామ్స్ స్పాట్‌ వ్యాల్యుయేషన్‌ మెుదలైంది. ఇక ఈ పరీక్షలకు సంబంధించిన ఫలితాలను జూన్‌ 30న ప్రకటించాలని విద్యాశాఖ ముమ్మరంగా కసరత్తు చేసి ఈ మేరకు నిర్ణయం తీసుకుంది. రెండేళ్ల తర్వాత ఈ జరిగిన పదో తరగతి పరీక్షల ఫలితాలపై ఆసక్తి నెలకొంది.

బర్మింగ్‌హామ్‌: భయపడినంతా జరిగింది. ఇంగ్లండ్‌తో చివరి టెస్ట్‌కు రోహిత్‌ శర్మ దూరమయ్యాడు. వామప్‌ మ్యాచ్‌ జరుగుతుండగానే కరోనా పాజిటివ్‌గా తేలిన అతనికి.. బుధవారం మరోసారి ఆర్టీ-పీసీఆర్‌ పరీక్ష నిర్వహించగా మరోసారి పాజిటివ్‌ అని వచ్చింది. దీంతో రోహిత్‌ స్థానంలో జస్‌ప్రీత్‌ బుమ్రా ఈ మ్యాచ్‌కు కెప్టెన్‌గా వ్యవహరించనున్నాడు. కపిల్‌ దేవ్‌ తర్వాత ఇండియన్‌ టీమ్‌కు కెప్టెన్సీ వహిస్తున్న పేస్‌బౌలర్‌ బుమ్రానే కావడం విశేషం.

1987 వరల్డ్‌కప్‌లో చివరిసారి ఇండియన్‌ టీమ్‌కు కపిల్‌ దేవ్‌ కెప్టెన్‌గా ఉన్నాడు. అంటే 35 ఏళ్ల తర్వాత మళ్లీ ఇప్పుడు ఓ పేస్‌ బౌలర్‌ టీమ్‌కు కెప్టెన్‌ అయ్యాడు. "రోహిత్‌ ఈ మ్యాచ్‌ ఆడటం లేదు. అతని ఆర్టీ-పీసీఆర్‌ టెస్ట్‌ మళ్లీ పాజిటివ్‌గానే వచ్చింది. అతడు ఇంకా ఐసోలేషన్‌లోనే ఉన్నాడు. వైస్‌ కెప్టెన్‌గా ఉన్న జస్‌ప్రీత్‌ బుమ్రా ఈ మ్యాచ్‌లో టీమ్‌ను లీడ్‌ చేస్తాడు" అని ఓ బీసీసీఐ అధికారి పీటీఐకి వెల్లడించారు.

టెస్టుల్లో ఇండియన్‌ టీమ్‌కు కెప్టెన్సీ వహిస్తున్న 36వ క్రికెటర్‌గా బుమ్రా నిలవనున్నాడు. బుమ్రా ఇప్పటి వరకూ 29 టెస్టులు ఆడి 123 వికెట్లు తీసుకున్నాడు. టీమ్‌లోకి అడుగుపెట్టిన చాలా తక్కువ కాలంలోనే బెస్ట్‌ ఫాస్ట్ బౌలర్లలో ఒకడిగా ఎదగడంతోపాటు ఇప్పుడు కెప్టెన్సీ చేపట్టనుండటం విశేషం. రోహిత్‌ ఆడకపోతే బుమ్రా లేదా పంత్‌లలో ఒకరికి కెప్టెన్సీ దక్కే అవకాశం ఉందని ముందు నుంచీ భావిస్తున్నదే. చివరికి బోర్డు మాత్రం బుమ్రా వైపే మొగ్గు చూపింది.

ఇక ఇప్పుడు రోహిత్ స్థానంలో ఓపెనింగ్‌ ఎవరు చేస్తారన్నది చూడాల్సి ఉంది. మయాంక్‌ అగర్వాల్‌ను హుటాహుటిన ఇంగ్లండ్‌కు రప్పించినా.. అతన్ని ఆడించేది అనుమానమే అని బోర్డు వర్గాలు వెల్లడించాయి. ఈ నేపథ్యంలో శుభ్‌మన్‌ గిల్‌తో కలిసి పుజారా ఓపెనర్‌గా వచ్చే అవకాశం ఉంది. బ్యాటింగ్‌ లైనప్‌లో పుజారా, గిల్‌, విరాట్‌ కోహ్లి, శ్రేయస్‌ అయ్యర్‌, విహారీ, రిషబ్‌ పంత్‌ ఉండనున్నారు.

అయితే తుది జట్టులో రెండో స్పిన్నర్‌ ఉంటాడా లేక నాలుగో పేస్‌ బౌలరా అన్నది ఇంకా నిర్ణయించలేదు. బుమ్రాతోపాటు సిరాజ్‌, షమి టీమ్‌లో ఉంటారు. మరో ప్లేస్‌ కోసం శార్దూల్‌ ఠాకూర్‌ పోటీ పడనున్నాడు. ఒకవేళ ఇద్దరు స్పిన్నర్లు అశ్విన్‌, జడేజా ఉంటే మాత్రం శార్దూల్‌కు చోటు దక్కదు.

మహారాష్ట్ర మంత్రి మండలి ఔరంగాబాద్ సిటీ పేరు మార్చేసింది. శంభాజీనగర్‌గా పేరు పెట్టింది. అలాగే ఒస్మానాబాద్ సిటీకి ధారాశివ్‌గా నామకరణం చేసింది.

రేపు విశ్వాస పరీక్ష ఎదుర్కోవాల్సి ఉండగా ఆకస్మికంగా సమావేశమైన ఉద్దవ్ థాకరే మంత్రిమండలి ఈ సంచలన నిర్ణయాలు తీసుకుంది.

మరోవైపు విశ్వాస పరీక్షకు నిలబడాలంటూ గవర్నర్ ఇచ్చిన ఆదేశాలను సవాలు చేస్తూ శివసనే చీఫ్ విప్ దాఖలు చేసిన పిటిషన్‌పై సుప్రీం కోర్టు ఈ సాయంత్రం 5 గంటల నుంచి విచారణ జరుపుతోంది.

విచారణలో సునీల్ ప్రభు తరపున అభిషేక్ మను సింఘ్వీ, రెబల్ ఎమ్మెల్యేల తరపున నీరజ్ కిషన్ కౌల్ వాదనలు వినిపిస్తున్నారు.

విరాట పర్వం మూవీ జూన్‌ 17న రిలీజైంది. ఈ సినిమాకు పాజిటివ్‌ టాకే వచ్చింది. అయితే బాక్సాఫీస్‌ దగ్గర మాత్రం ఊహించిన మేర కలెక్షన్లు రాబట్టలేకపోయింది. దీంతో చాలా త్వరగానే ఈ సినిమాను ఓటీటీలోకి తీసుకురావాలని మేకర్స్‌ నిర్ణయించారు. విరాట పర్వం ఈ శుక్రవారమే (జులై 1) నెట్‌ఫ్లిక్స్‌లో రిలీజ్‌ కాబోతోంది. ఈ విషయాన్ని నెట్‌ఫ్లిక్స్‌ తన అధికారిక ఇన్‌స్టాగ్రామ్‌ ద్వారా వెల్లడించింది.

తెలుగు, మలయాళం, తమిళం భాషల్లో ఈ సినిమా నెట్‌ఫ్లిక్స్‌లో అందుబాటులో ఉండనుంది. విరాట పర్వం ప్రపంచాన్ని అనుభూతి చెందడానికి సిద్ధంగా ఉండండి. జులై 1న తెలుగు, మలయాళం, తమిళ భాషల్లో నెట్‌ఫ్లిక్స్‌లోకి వస్తోంది అని ఈ గ్లోబల్‌ ఓటీటీ ఇన్‌స్టాలో పోస్ట్‌ చేసింది.

ఈ సినిమా చాలా త్వరగా ఓటీటీలోకి వస్తుండటంపై ఫ్యాన్స్‌ సంతోషం వ్యక్తం చేశారు. అయితే కొంతమంది ఈ సినిమాను హిందీలోనూ డబ్‌ చేసి రిలీజ్‌ చేయాలని కోరడం విశేషం. ఈ సినిమా చాలా బాగుంది.. దయచేసి హిందీలో రిలీజ్‌ చేయండి అని ఓ యూజర్‌ కోరాడు.

సినిమా రిలీజైన తొలిరోజే చాలా వరకూ పాజిటివ్‌ రివ్యూలే వచ్చాయి. ముఖ్యంగా సాయి పల్లవి నటనకు ప్రేక్షకులు ఫిదా అయ్యారు. తొలిసారి ఓ భిన్నమైన పాత్రలో ఆమెను చూశారు. పైగా ఈ మూవీ హీరోయిన్‌ చుట్టూ తిరిగే కథే. దీంతో సాయి పల్లవి తన నట విశ్వరూపం చూపించింది. తెలంగాణలో 1990లనాటి నక్సల్‌ ఉద్యమాన్ని ఈ సినిమా కళ్లకు కట్టింది.

న్యూఢిల్లీ: మత పరమైన అంశాలపై తరచూ ట్విటర్‌ వేదికగా స్పందిస్తుంటాడు టీమిండియా మాజీ క్రికెటర్‌ ఇర్పాన్‌ పఠాన్‌. ఆ మధ్య ఇదే విషయమై మరో మాజీ క్రికెటర్‌ అమిత్ మిశ్రాతోనూ ట్విటర్‌లో వాదనకు దిగాడు. అయితే తాజాగా ఉదయ్‌పూర్‌లో నుపుర్‌ శర్మ వ్యాఖ్యలను సమర్థించిన దర్జీని హత్య చేసిన ఉదంతంపై కూడా ఇర్ఫాన్‌ ఓ ట్వీట్‌ చేశాడు.

ఇది కాస్తా అభిమానుల ఆగ్రహానికి కారణమైంది. ఈ ఉదంతంపై ఇర్ఫాన్‌ స్పందిస్తూ.. "ఏ ధర్మాన్ని అనుసరిస్తున్నా సరే, ఓ అమాయక ప్రాణాన్ని హింసించడం అంటే మొత్తం మానవాళిని హింసించడమే అవుతుంది" అని అన్నాడు. ఈ ట్వీట్‌పై నెగటివ్‌ కామెంట్సే ఎక్కువగా వచ్చాయి. ఏ ధర్మమైనా ఏంటి.. ఆ హత్య చేసిన వాళ్ల ధర్మమేంటో చెప్పొచ్చుగా అంటూ ఓ యూజర్‌ కామెంట్‌ చేశాడు.

నీ నీతి వచనాలు ఇక ఆపు అంటూ మరో యూజర్‌ ఘాటుగానే స్పందించాడు. ఉదయ్‌పూర్‌లో కన్హయ్యలాల్‌ అనే దర్జీని ఇద్దరు వ్యక్తులు హత్య చేసిన విషయం తెలిసిందే. హత్యను వీడియో కూడా తీయడం గమనార్హం. ఇస్లాంను అవమానించిన వారికి ఇదే గతి పడుతుందంటే ఆ ఇద్దరూ తర్వాత మరో వీడియోను కూడా సోషల్‌ మీడియాలో పోస్ట్‌ చేయడం కలకలం రేపింది. ఏకంగా ప్రధాని నరేంద్ర మోదీని కూడా వీళ్లు హెచ్చరించారు.

కస్టమర్లుగా సదరు దర్జీ షాపులోకి వెళ్లారు ఆ ఇద్దరు వ్యక్తులు. వీళ్లలో ఒకరి కొలతలను కన్హయ్యాలాల్ తీసుకుంటుండగా.. అతడు సడెన్‌గా కత్తితో దాడి చేశాడు. దీంతో కన్హయ్య గొంతు తెగిపోయింది. ఆ సమయంలో మరో వ్యక్తి వీడియో తీశాడు. ఆ తర్వాత ఇద్దరూ అక్కడి నుంచి పారిపోయి మరో బెదిరింపు వీడియోను సోషల్‌ మీడియాలో పోస్ట్‌ చేశారు.

జబర్దస్త్‌లాంటి కామెడీ షోకు గ్లామర్‌ మెరుగులు అద్దిన యాంకర్‌ అనసూయ భరద్వాజ్‌. ఈ షో ఎంత హిట్‌ అయిందో అంతకుమించిన పేరు అనసూయకు వచ్చింది. దాదాపు ఈ కామెడీ షో ప్రారంభమైనప్పటి నుంచీ ఆమె ఈ షోతోనే ఉంది. ఆమె కోసమే ఈ షోను ఫాలో అయ్యే అభిమానులు కూడా ఉన్నారంటే అతిశయోక్తి కాదు. అయితే అలాంటి జబర్దస్త్‌ షోకి ఆమె గుడ్‌బై చెప్పిందా అన్న సందేహాలు కలుగుతున్నాయి.

మంగళవారం (జూన్‌ 28) తన ఇన్‌స్టాగ్రామ్‌ స్టోరీలో ఆమె చేసిన ఓ పోస్ట్‌ వైరల్‌గా మారింది. ఇందులో నేరుగా తాను జబర్దస్త్‌ షోను వదిలేస్తున్నట్లు అనసూయ చెప్పలేదు కానీ.. కెరీర్‌లో పెద్ద నిర్ణయం తీసుకున్నానని, దానిని ఇప్పటికే అమలు చేసినట్లు కూడా చెప్పింది. "నా కెరీర్‌లో పెద్ద నిర్ణయం తీసుకొని ఇవాళే అమలు చేశాను. నాతోపాటు ఎన్నో జ్ఞాపకాలను తీసుకెళ్తున్నాను. అందులో చాలా మంచి జ్ఞాపకాలు, కొన్ని చెడు, మరికొన్ని చేదు జ్ఞాపకాలు కూడా ఉన్నాయి. మీరు నాతో పాటు ఉండి ఎప్పటిలాగే నన్ను ఇష్టపడతారని ఆశిస్తున్నాను" అన్నది అనసూయ పోస్ట్‌ సారాంశం.

ఇది చూసి ఆమె జబర్దస్త్‌ షోకి గుడ్‌బై చెప్పిందని అభిమానులు ఫిక్సయిపోయారు. ఆమెకు క్రమంగా సినిమా అవకాశాలు పెరుగుతుండటం, ఇతర ఛానెళ్ల నుంచి కూడా షోలు రావడంతో ఈ నిర్ణయం తీసుకున్నట్లు భావిస్తున్నారు. జబర్దస్త్‌ కంటే ముందు అనసూయ పేరు ఎవరికీ తెలియదు. అంతకుముందు సాక్షి టీవీలాంటి న్యూస్‌ ఛానెల్స్‌లో న్యూస్‌ రీడర్‌గా పని చేసింది. అయితే జబర్దస్త్‌ షో ద్వారా ప్రతి తెలుగు ఇంటికీ సుపరిచితమైన ఆమె.. క్రమంగా సినిమాల్లోనూ అవకాశాలు అందుకునే స్థాయికి చేరింది.

Camera Day | ప్రముఖ కెమెరా మేకర్ నికాన్ తమ Z సిరీస్‌లో సరికొత్త కెమెరాను మార్కెట్లో విడుదల చేసింది. Nikon Z 30 పేరుతో విడుదలైన కెమెరా కంపెనీ నుంచి విడుదలైన అతిచిన్న, తేలికైన మిర్రర్‌లెస్ కెమెరా. దీని బరువు కేవలం 350 గ్రాములు మాత్రమే. ఇది Sony ZV-1 లాంటి కెమెరాతో పోటీ పడుతుంది.

నికాన్ కంపెనీ ఈ కెమెరాను ప్రత్యేకంగా వ్లాగర్‌లు, కంటెంట్ క్రియేటర్స్, స్మార్ట్‌ఫోన్ కెమెరాలో అప్‌గ్రేడర్‌లను ఆశించేవారికోసం రూపొందించింది. ఇటీవల చాలామంది యువత యూట్యూబ్ వ్లాగ్స్, ఇన్‌స్టాగ్రామ్‌ రీల్స్ అంటూ వీడియోలను రూపొందిస్తున్నారు. వారికి ఈ ఈ Nikon Z 30 కెమెరా ఉపయుక్తంగా ఉంటుంది. అయితే ఇది మిర్రర్‌లెస్ Nikon D3500 బిగినర్స్ కెమెరాకు రీప్లేస్‌మెంట్ మాత్రం కాదు.

Z 30 కెమెరాలో EN-EL25 రీయూజేబుల్ బ్యాటరీని ప్యాక్ ఇస్తున్నారు. ఒక్క ఫుల్ ఛార్జ్ మీద వినియోగదారులకు 125 నిమిషాల వరకు షూటింగ్ సమయం పొందవచ్చు. అలాగే స్లో-మోషన్ వీడియోల కోసం సెకనుకు 120 ఫ్రేమ్‌ల వరకు పూర్తి HD వీడియోలను కూడా షూట్ చేయవచ్చు. ఇది 35 నిమిషాల వరకు 4K UHD వీడియో రికార్డింగ్‌ను కూడా అందిస్తుంది. ఈ కెమెరాకు వ్యూఫైండర్ లేదు కానీ వ్యారీ-యాంగిల్ కలిగిన 3-అంగుళాల టచ్-సెన్సిటివ్ LCD ఉంది.

వ్లాగర్స్ కోసం ఎలాంటి ప్రత్యేకతలు ఉన్నాయి?

Vlogging కోసం నికాన్ Z 30లో అంతర్నిర్మిత స్టీరియో మైక్రోఫోన్‌ను కలిగి ఉంది. కావాలనుకుంటే అదనపు మైక్రోఫోన్‌ను కూడా వినియోగదారులు అమర్చుకోవచ్చు. దృశ్యం కోసం పారామీటర్స్ అడ్జస్ట్ చేయటానికి వివిధ రకాల పిక్చర్ కంట్రోల్ ఫంక్షన్‌లను కలిగి ఉంది. మొత్తంగా ఈ కెమెరాలో 20 క్రియేటివ్ పిక్చర్ కంట్రోల్స్ ఉన్నాయి. ఇవి స్టాక్ ఫిల్టర్‌లుగా పని చేస్తాయి. కాబట్టి వీడియోను పోస్ట్-ప్రాసెస్ చేయవలసిన అవసరం ఉండదు. పింక్, మార్నింగ్, మెలాంచోలిక్, సండే మొదలైనవి ఇందులోని పాపులర్ పిక్చర్ కంట్రోల్ ఫిల్టర్స్.

ఈ కెమెరాలో 20MP APS-C సెన్సార్‌తో కూడిన ఐ-డిటెక్షన్ ఆటో ఫోకస్, ఫుల్-టైమ్ ఆటో ఫోకస్ (AF-F) వంటి ఫీచర్లను కలిగి ఉంది. ఇవి మాత్రమే కాకుండా మాన్యువల్ ఫోకస్, సింగిల్ ఆటోఫోకస్, కంటిన్యూ ఆటోఫోకస్ ఫీచర్లను ఎంచుకోవచ్చు. ఈ ఫోకస్ మోడ్‌లకు అదనంగా Nikon యానిమల్-డిటెక్షన్ AF సపోర్ట్ కూడా ఉంది. తద్వారా జంతువుల ఫోటోలు లేదా వీడియోలను రికార్డ్ చేస్తున్నప్పుడు ఫోకస్ ఫ్రేమింగ్ కోసం వాటి కళ్ళను గుర్తిస్తుంది.

Nikon Z 30 కెమెరా జూలై 14 నుండి కొనుగోలుదారులకు అందుబాటులో ఉంటుంది. దీని ధర సుమారు రూ. 55 వేల నుంచి ప్రారంభమవుతుంది. మార్కెట్లోని ఇలాంటి ఇతర కెమెరాలో పోలిస్తే ఈ ధర చాలా తక్కువ అని చెప్పవచ్చు.

ఇండియన్ స్ట్రీట్ ఫుడ్ అంటే నచ్చనివారు ఎవరూ ఉండరు. ఏ సీజన్‌లోనైనా తినకుండా ఉండలేరు. కానీ వర్షాకాలంలో మీరు బయట లభించే చిరుతిళ్లకు దూరంగా ఉండాలని ఉన్నా ఉండలేకపోతే.. మీకు ఇంట్లోనే సులభంగా, మరెంతో రుచికరంగా చేసుకునే ఎన్నో అద్భుతమైన రెసిపీలు ఇప్పుడు అందుబాటులో ఉన్నాయి.

ఈ వర్షాకాలంలో నూనెతో చేసే పదార్థాల కంటే ఇంగువ, కరివేపాకు, టొమాటో, ఎర్ర మిరపకాయలు, కొబ్బరి, ఆవాలు, ఉల్లిపాయలు, వెల్లుల్లి, అల్లం వంటి పదార్థాలను కలిపి వేడివేడిగా చేసుకునే రసం, సూప్ వంటివి మంచి ఆరోగ్య ప్రయోజనాలను కలిగి ఉంటాయి.

అయితే మీకు ద్రవాలు కాకుండా పొడిగా ఉండే స్నాక్స్ కావాలనుకుంటే ఈ మాన్ సూన్ సీజన్ లో మొక్కజొన్న మరొక మంచి ప్రత్యామ్నాయంగా ఉంటుంది. మొక్కజొన్నను ఉడికించుకొని తినొచ్చు, కాల్చుకొని తినొచ్చు మరెన్నో రకాలుగా రుచికరమైన వంటకాలుగా తయారుచేసుకొని తినొచ్చు.

అయితే మీరు ఎప్పుడైనా 'బటరీ కార్న్ ఆన్ ద కాబ్' తిన్నారా? దీనిని చేసుకోవడం చాలా సులభం. మొక్కజొన్న కంకికి వెన్నపూసి, ఉప్పుకారం రాసి తినడమే. ఇలా ఎంతో రుచికరంగా ఉంటుంది కూడా. మరి దీనిని ఎలా తయారు చేసుకోవాలో పూర్తి రెసిపీని ఇక్కడ అందిస్తున్నాం. మీరు కూడా తప్పకుండా చేసుకోండి.

కావాల్సిన పదార్థాలు

• 2 స్వీట్ కార్న్ కంకులు
• 4 స్పూన్ల కరిగించిన వెన్న
• రుచికి తగినంత
• రుచికి తగినంత కారం పొడి
• 1 నిమ్మకాయ

తయారీ విధానం

1. ముందుగా మొక్కజొన్న కంకులపై 1 టీస్పూన్ కరిగించిన వెన్నపూయండి.
2. అనంతరం ఈ మొక్కజొన్న కంకులను మైక్రోవేవ్‌లో 5 నిమిషాల పాటు బేక్ చేయండి లేదా పెనంపై బోలు మూతపెట్టి చిన్న మంటతో వేదిచేయండి.
3. ఆ తర్వాత బయటకు తీసి రెండు కంకులపై మళ్లీ సమానంగా కరిగించిన వెన్నపూసి ఆపై ఉప్పు, కారం చల్లి. నిమ్మరసం పిండుకోండి.
4. ఇలా వేడివేడిగా ఉన్నప్పుడే వెంటనే సర్వ్ చేసుకోండి.

ఇది తింటుంటే వెన్నపూస మెత్తదనం, మొక్కజొన్న తియ్యదనం, కారం, ఉప్పు, పులుపు ఇలా అన్ని రుచులు వెచ్చగా నోటికి తగిలి ఒక గొప్ప అనుభూతిని పొందుతారు.

ఎండాకాలంలో ఎండలతో ఆకులు రాలిపోయి, కొమ్మలు వాడిపోయి మోడువారినట్లు ఉన్న వనాలన్నీ ఇప్పుడు వర్షపు చినుకులతో మళ్లీ చిగురిస్తున్నాయి. సుగంధభరితమైన మట్టివాసనలతో, సుస్వరాలు పలికించే జలపాతాలతో పుడమంతా ఇప్పుడు పచ్చని రంగేసుకుంది.

ఈ వర్షాకాలంలో జూలై నెలలో వాతావరణం మరింత ఆహ్లాదకరంగా మారుతుంది. ఈ సమయంలో ఎంతో మంది జంటలు అద్భుతమైన ప్రదేశాలలో విహరిస్తూ ప్రేమానుభూతులకు లోనవుతారు. చల్లగా కురిసే జల్లులలో ఒకరి స్పర్శలో ఒకరు తడిసి ముద్దవుతారు. వెచ్చటి శృంగార రసాన్ని ఆస్వాదించటానికి కూడా ఇది అద్భుతమైన సమయం.

మరి మీరూ మీ భాగస్వామితో కలిసి ఈ జూలై నెలలో ఏదైనా విహారయాత్రకు ప్లాన్ చేసుకుంటున్నారా? ఈ వర్షకాలంలో మన భారతదేశంలో విహరించదగ్గ ఎన్నో అద్భుతమైన ప్రదేశాలు ఉన్నాయి. ఎత్తైన పచ్చని కొండలు, వాటి మధ్య పారే జలపాతాల నుంచి సముద్రపు తీరంలో ముత్యపు చిప్పలను ఏరుకునే ప్రదేశాల వరకు జంటలు డ్యుఎట్ పాడుకోవడానికి అనువైన ప్రాంతాలు ఎన్నో ఉన్నాయి. అందులో కొన్ని మీకు ఇక్కడ తెలియజేస్తున్నాం.

గోవా

జూలై నెలలో మీ భాగస్వామితో కలిసి సందర్శించడానికి గోవా ఒక ఉత్తమమైన గమ్యస్థానంగా చెప్పవచ్చు. వర్షాకాలంలో గోవా బీచ్‌లలో నడవడం గొప్ప అనుభూతిగా చాలా మంది భావిస్తారు. అయితే ఎక్కడైనా తీరప్రాంతాల్లో వర్షాలు పడేటపుడు తగు జాగ్రత్తలు తీసుకోవడం మంచిది. ఇక గోవాలో వర్షాకాలం ట్రెక్కింగ్ చేయటానికి, సీ- ఫుడ్ తినటానికి ఇతర ఆఫ్‌బీట్ కార్యకలాపాలకు బాగుంటుంది.

మౌంట్ అబూ

మౌంట్ అబూ రాజస్థాన్‌లోని ప్రసిద్ధ హిల్ స్టేషన్. జూలై నెలలో ఇక్కడికి వెళ్లడం చాలా సరదాగా ఉంటుంది. ఆరావళి కొండలలోని ఎత్తైన శిఖరంపై ఉన్న ఈ హిల్ స్టేషన్ వద్ద ప్రకృతి సౌందర్యం, ఇక్కడి వాతావరణం అందరినీ కట్టిపడేస్తుంది.

సిమ్లా

జూలై నెలలో కూడా సిమ్లాను సందర్శించవచ్చు. ఇక్కడ వాతావరణం ఎల్లప్పుడూ ఆహ్లాదకరంగా ఉంటుంది . అడపాదడపా కురిసే వర్షాలు శీతల అనుభూతిని కలిగిస్తాయి. మీ భాగస్వామితో కలిసి ఇక్కడి మాల్ రోడ్‌ని సందర్శించడం భిన్నమైన అనుభూతిని ఇస్తుంది. ఇది కాకుండా, కుఫ్రి, నరకంద వంటి ఇతర ప్రదేశాలూ ఉన్నాయి. ఇక్కడ మీరు మీ భాగస్వామి భుజం మీద చెయ్యి వేసి నడకకు రొమాంటిక్ గా ఉంటుంది.

మహాబలేశ్వర్

మహారాష్ట్రలో నెలవైన ఒక అందమైన హిల్ స్టేషన్ మహాబలేశ్వర్‌లో ఈ జూలై మాసంలో మీ భాగస్వామితో కలిసి షికారు చేయడం మీకు గొప్ప అనుభూతిని ఇస్తుంది. వర్షాకాలంలో ఇక్కడి ప్రకృతి అందాలు మీ కనుచూపు మేర వరకు కనిపిస్తాయి. భాగస్వామితో రొమాంటిక్ వెకేషన్ కోసం ఈ స్థలం ఉత్తమమైనదిగా చెప్పవచ్చు. ఇదే కాకుండా వెన్నా సరస్సు, వాటర్ ఫాల్స్, విల్సన్ పాయింట్, ప్రతాప్‌ఘర్ కోట, ఖండాలా మొదలైన వాటిని కూడా సందర్శించవచ్చు.

నైనిటాల్

ఉత్తరాఖండ్ రాష్ట్రంలో ఎన్నో అద్భుతమైన పర్యాటక ప్రదేశాలు ఉన్నాయి. అయితే ఇక్కడి నైనిటాల్‌ హిల్ స్టేషన్ సందర్శించేందుకు ఇదే ఉత్తమ సమయం. వర్షాకాలంలో ఏకాంతాన్ని ఇష్టపడేవారికి నైనిటాల్ ఉత్తమ పర్యాటక ప్రదేశాలలో ఒకటిగా చెప్పవచ్చు.

కొడైకెనాల్

ఎక్కడో దూరంగా వెళ్లడం వద్దనుకుంటే మన దక్షిణ భారతదేశంలోనే అరకు, ఊటి, మున్నార్.. అఫ్ కోర్స్ పైన చెప్పుకున్న గోవా, ఇలా ఎన్నో ఉన్నాయి. అయితే జూలైలో కొడైకెనాల్ సందర్శించడం ఉత్తమంగా చెప్తారు. వర్షాకాలంలో ఇక్కడికి వెళ్లడం భిన్నమైన ఆనందాన్ని కలిగిస్తుంది. ఇక్కడి ప్రకృతి సౌందర్యానికి మీరు ముగ్ధులవుతారు.

Rupee falls: రూపాయి విలువ డాలరుతో పోలిస్తే బుధవారం మరో 19 పైసలు బలహీనపడి 79.04కు పడిపోయింది. గత కొద్ది రోజులుగా వరుసగా ఆల్ టైమ్ దిగువకు జారుకుంటూ రికార్డులు బ్రేక్ చేస్తోంది.

సౌదీ అరేబియా, యూఏఈ తదితర దేశాలు చమురు ఉత్పత్తిని గరిష్ట సామర్థ్యంతో చేపడుతున్నామని ప్రకటించడంతో చమురు ధరల్లో మళ్లీ పెరుగుదల నమోదవుతోంది.

చమురు ధరల పెరుగుదలతో పాటు విదేశీ సంస్థాగత ఇన్వెస్టర్లు నిరంతరాయంగా తమ ఈక్విటీ వాటాలను తెగనమ్ముతుండడం కూడా రూపాయి సెంటిమెంటును బలహీనపరుస్తూ వస్తోంది.

ఇంటర్ బ్యాంక్ ఫారిన్ ఎక్స్ఛేంజ్ మార్కెట్లో రూపాయి బుధవారం 78.86 వద్ద ఓపెన్ అయ్యింది. చివరకు క్రితం రోజు ముగింపుతో పోలిస్తే 19 పైసలు కోల్పోయి 79.04 వద్ద ముగిసింది. సెషన్ సమయంలో ఒక దశలో 79.05కు పడిపోయింది. కాగా శుక్రవారం 48 పైసల మేర బలహీనపడిన రూపాయి 78.85 వద్ద స్థిరపడింది.

రూపాయి విలువ ఈనెలలో 1.97 శాతం మేర పతనమైంది. ఈ ఏడాది ప్రారంభం నుంచి ఇప్పటి వరకు 6.39 శాతం మేర బలహీనపడింది.

కాగా డాలర్ ఇండెక్స్ 0.13 శాతం పెరిగి 104.64 పాయింట్ల వద్ద స్థిరపడింది. ‘బలహీనమైన ప్రాంతీయ కరెన్సీలు, రిస్క్ సెంటిమెంట్ల కారణంగా రూపాయి విలువ పతనమైంది. డాలర్ హైడిమాండ్, లిక్విడిటీ.. రూపాయిపై ప్రభావం చూపాయి..’ అని హెచ్‌డీఎఫ్‌సీ సెక్యూరిటీ రీసెర్చ్ అనలిస్ట్ దిలీప్ పర్మర్ తెలిపారు.

మరోవైపు దేశీయ మార్కెట్లు బుధవారం మళ్లీ నష్టాల బాట పట్టాయి. సెన్సెక్స్ 134.31 పాయింట్లు కోల్పోయి 53,026 పాయింట్ల వద్ద క్లోజవగా, నిఫ్టీ 32.95 పాయింట్లు కోల్పోయి 15,799.10 పాయింట్ల వద్ద ముగిసింది.

బుధవారం స్టాక్ మార్కెట్లలో టాప్ గెయినర్స్‌గా ఓఎన్జీసీ, ఎన్టీపీసీ, రిలయన్స్, కోల్ ఇండియా నిలిచాయి.

టాప్ లూజర్స్ జాబితాలో హెచ్‌డీఎఫ్‌సీ లైఫ్, స్టార్ హెల్త్, హెచ్‌యూఎల్, అపోలో హాస్పిటల్, యాక్సిస్ బ్యాంక్, టాటా కన్జ్యూమర్స్ ప్రొడక్ట్స్, బజాజ్ ఫిన్‌సర్వ్, యూపీఎల్, టైటాన్ కంపెనీ, కోటక్ మహీంద్రా, విప్రో, గ్రాసిం, హెచ్‌సీఎల్ టెక్, ఇన్ఫోసిస్, బజాజ్ ఫైనాన్స్ తదితర స్టాక్స్ నిలిచాయి.

కాగా క్యాపిటల్ మార్కెట్ నుంచి విదేశీ సంస్థాగత ఇన్వెస్టర్లు మంగళవారం రూ. 1,244 కోట్ల మేర విక్రయాలు జరిపారని స్టాక్ ఎక్స్ఛేంజీ డేటా వెల్లడించింది.