Vegan Moon Milk । ఈ పాలు తాగితే.. వెన్నెల్లో హాయిగా నిద్రపోయిన అనుభూతి!

ప్రశాంతమైన రాత్రి నిద్ర అనేది ప్రతీ వ్యక్తికి చాలా ముఖ్యం. సరైన నిద్ర ఉన్నప్పుడే ఉదయం వేళ హుషారుగా ఉంటుంది, శక్తివంతంగా ఉంటారు. మీ మెదడు, మీ శరీరం సరిగ్గా పనిచేయగలుగుతుంది. నిద్రపోవటాని కొందరికి ఎలాంటి ఇబ్బంది లేదు, అయితే చాలా మంది రాత్రిపూట నిద్రపోవడానికి తీవ్ర ఇబ్బందులు పడుతున్నారు. ఈ నిద్రలేమి వారిని మానసికంగా మరింత బలహీనంగా మారుస్తుంది, భావోద్వేగాలు నియంత్రించుకోలేకపోవడం, జ్ఞాపకశక్తి మందగించడం మొదలైన ఇబ్బందులను ఎదుర్కొంటున్నారు.

మీరూ నిద్రపోవడంలో ఇబ్బందులు ఎదుర్కొంటున్నారా? అయితే వెంటనే నిద్రపోవడానికి చాలా టెక్నిక్‌లు ఉన్నప్పటికీ కొన్ని పానీయాలు తాగడం ద్వారా కూడా మంచిగా నిద్రపడుతుంది. మూన్ మిల్క్ గురించి విన్నారా? నిద్రపోయే ముందు ఒక్క కప్పు ఈ పానీయం తాగితే చాలు. ఇది తాగిన వెంటనే మీరు రిలాక్స్‌గా అనుభూతి చెందుతారు, ఆ తర్వాత హాయిగా గాఢ నిద్రలోకి జారుకుంటారు.

ఈ పానీయం ఎక్కడ దొరుకుతుందని ఆలోచిస్తున్నారా? మీకు మీరుగా ఇంట్లోనే సులభంగా తయారు చేసుకోవచ్చు. వీగన్ మూన్ మిల్క్ రెసిపీని ఈ కింద ఇచ్చాం చూడండి.

Vegan Moon Milk Recipe కోసం కావలసినవి

• 1 కప్పు వాల్‌నట్‌ మిల్క్ ( బాదం పాలు, జీడిపప్పు పాలు వంటివి ఉపయోగించవచ్చు)
• 1/2 టీస్పూన్ దాల్చినచెక్క పొడి
• 1/4 టీస్పూన్ పసుపు
• 1/4 టీస్పూన్ అశ్వగంధ
• చిటికెడు ఏలకుల పొడి
• చిటికెడు జాజికాయ పొడి
• కొద్దిగా నల్ల మిరియాల పొడి
• 1 టీస్పూన్ పచ్చి కొబ్బరి నూనె లేదా నెయ్యి
• 1 టీస్పూన్ తేనె
• చిటికెడు అల్లం (ఐచ్ఛికం)

మూన్ మిల్క్ తయారీ విధానం

1. ముందుగా మీడియం నుంచి తక్కువ మంట మీద వాల్‌నట్‌ పాలు వేడిచేయండి.
2. అందులో దాల్చిన చెక్క, పసుపు, అశ్వగంధ, ఏలకులు, అల్లం, జాజికాయ, మిరియాలు మొదలైన పొడులన్నీ వేసి బాగా కలపండి.
3. ఇప్పుడు మంటను కనిష్ట స్థాయికి తగ్గించి పచ్చి కొబ్బరి నూనె లేదా నెయ్యి వేసి 5-10 నిమిషాలు ఉడికించండి.
4. ఆ తర్వాత ఒక కప్పులోకి పోసుకొని, కాస్త చల్లబరచండి.
5. చివరగా తేనె వేసి కలుపుకొని గోరువెచ్చగా తాగండి.

ఇక, మంచం మీదకి ఎక్కండి. దుప్పటి కప్పుకొని పడుకోండి. నిద్రలో తియ్యని కలలను ఆస్వాదించండి.