ప్రపంచంలో అత్యంత సంతోషంగా జీవించే దేశం ఏదో తెలుసా?
18 March 2022, 18:03 IST
- ప్రపంచంలో అత్యంత సంతోషంగా ఉండే దేశాల జాబితాను విడుదల చేశారు. తొలి స్థానంలో ఏ దేశం ఉందంటే..
అత్యంత సంతోషంగా ఉండే దేశం ఏదంటే…
World's Happiest Nation | ప్రపంచవ్యాప్తంగా అత్యంత సంతోషంగా జీవించే దేశంగా ఐదోసారి ఫిన్ల్యాండ్ ఎంపికైంది. మరోవైపు అత్యల్ప సంతోషం కలిగిన దేశంగా అఫ్గానిస్థాన్ నిలిచింది.
ఐక్యరాజ్య సమితి ప్రోత్సాహంతో గత పదేళ్ల నుంచి 'వరల్డ్ హాపియెస్ట్ కంట్రీ' నివేదికను రూపొందిస్తున్నారు. సంతోషం, ఆనందంపై ప్రజల వ్యక్తిగత అభిప్రాయాలు, ఆర్థిక- సామాజిక, జీడీపీ, సామాజిక సహాయం, వ్యక్తిగత స్వేచ్ఛ, అవినీతి స్థాయికి సంబంధించిన డేటాను పరిశీలించి ఈ నివేదికను రూపొందిస్తారు. 0-10 మధ్యలో, మూడేళ్ల కాలానికి సగటు తీసి ర్యాంకులు ఇస్తారు. రష్యా- ఉక్రెయిన్ యుద్ధానికి ముందే ఈ ఏడాది నివేదిక పూర్తయింది.
ఫిన్ల్యాండ్ టాప్ సీటు దక్కించుకోగా.. డెన్మార్క్ రెండో స్థానంలో నిలిచింది. అనేక ఉత్తర యూరోప్ దేశాలు తొలి 10 ర్యాంకుల్లో చోటుదక్కించుకోవడం విశేషం. అమెరికాకు 16, బ్రిటన్కు 17, ఫ్రాన్స్కు 20వ ర్యాంకు దక్కింది.
ఇక అత్యల్ప సంతోషకర దేశంగా అఫ్గానిస్థాన్ అట్టడుగు స్థానంలో కొనసాగుతోంది. లెబనాన్, వెనుజువెలాలు ఈసారి దారుణంగా పతనమయ్యాయి. ఆయా దేశాల్లో సంక్షోభం భారీ స్థాయిలో ఉండటం గమనార్హం.
ఈసారి.. కొవిడ్ ముందు, తర్వాతి పరిస్థితుల్లో ప్రజల ఎమోషన్లపైనా అధ్యయనం జరిగింది. ఇందుకోసం సామాజిక మాధ్యమాన్ని వేదికగా పరిగణించారు. '18 దేశాల ప్రజల్లో ఒత్తిడి, బాధ పెరిగింది' అని అధ్యయనంలో బయటపడింది.