Gaslight Trailer: వీల్‌చెయిర్‌లో సారా.. తన తండ్రిని మర్డర్ చేసిన వాళ్లను పట్టుకుంటుందా.. గ్యాస్‌లైట్ ట్రైలర్

Gaslight Trailer: ఓటీటీలోకి మరో థ్రిల్లర్ మూవీ రాబోతోంది. బాలీవుడ్ నటి సారా అలీ ఖాన్ నటించిన గ్యాస్‌లైట్ మూవీ ట్రైలర్ మంగళవారం (మార్చి 14) రిలీజైంది. సారాతోపాటు చిత్రాంగదా సింగ్, విక్రాంగ్ మస్సీ నటించిన ఈ మూవీ ట్రైలర్ ఆసక్తికరంగా ఉంది. ఈ మూవీలో మిషా అనే నడవలేని అమ్మాయి పాత్రలో సారా నటించింది.

వీల్ చెయిర్ కే పరిమితమైన మిషా.. కనిపించకుండా పోయిన తన తండ్రి కోసం వెతుకుతూ ఉంటుంది. ఈ క్రమంలో ఇంట్లో వాళ్ల ప్రవర్తన తనను ఆశ్చర్యానికి, భయానికి గురి చేస్తుంది. తన తండ్రి తనకు కనిపిస్తున్నాడని చెప్పినా ఎవరూ నమ్మరు. ఒక రోజు తన తండ్రి హత్యకు గురయ్యాడని, అతని శవాన్ని కారులో చూశాననీ చెబుతుంది.

అసలు ఆమె తండ్రిది హత్యేనా? ఇంకా ఏదైనా జరిగిందా? హత్య అయితే ఎవరు చేశారు? ఈ మిస్టరీని మిషా ఎలా చేజ్ చేసింది అన్నదే గ్యాస్‌లైట్ మూవీ. ట్రైలర్ ఒళ్లు గగుర్పొడిచేలా ఉంది. ఒకరకంగా దీనిని థ్రిల్లర్ కమ్ హారర్ మూవీగా చెప్పొచ్చు. ఈ సినిమాలో మిషా పాత్ర పోషించిన సారాకు తన తండ్రి అసిస్టెంట్ గా నటించిన కపిల్ (విక్రాంత్ మస్సీ) సాయం చేస్తుంటాడు.

తండ్రి హత్యకు గురయ్యాడని తెలిసిన తర్వాత ఎవరిని చూసిన అనుమానాస్పదంగా కనిపిస్తారు. ఇలాంటి పరిస్థితుల్లో ఈ ఇద్దరూ కలిసి హంతకులను ఎలా పట్టుకుంటారన్నదే ఈ మూవీ కథ. ప్రముఖ ఓటీటీ డిస్నీ ప్లస్ హాట్‌స్టార్ దీనిని తెరకెక్కించింది. ఈ మూవీ ట్రైలర్ ను సారా కూడా తన ఇన్‌స్టాగ్రామ్ లో షేర్ చేసుకుంది.

"అనుమానం మరింత బలపడుతూ వెళ్తోంది.. ఇంతకీ ఎవరు హంతకుడు? ట్రైలర్ ఇప్పుడే చూడండి" అనే క్యాప్షన్ తో సారా ఈ ట్రైలర్ ను పోస్ట్ చేసింది. పవన్ క్రిప్లానీ డైరెక్ట్ చేసిన ఈ మూవీకి రమేష్ తురానీ ప్రొడ్యూసర్. ఈ సినిమా మార్చి 31న డిస్నీ ప్లస్ హాట్‌స్టార్ లో రిలీజ్ కానుంది.