New electric scooters : బజాజ్​ ఆటో నుంచి కేటీఎం వరకు.. అందరి ఫోకస్​ ఎలక్ట్రిక్​ స్కూటర్లపైనే!

New electric scooters in India : ఇండియా మార్కెట్​లో ఎలక్ట్రిక్​ వాహనాలకు డిమాండ్​ పెరుగుతోంది. 2 వీలర్​ ఎలక్ట్రిక్​ సెగ్మెంట్​కు సైతం ఆదరణ లభిస్తోంది. ఈ నేపథ్యంలో తమ పోర్ట్​ఫోలియోను పెంచుకునేందుకు ప్రముఖ ఆటోసంస్థలు దృష్టిసారించాయి. బజాజ్​ ఆటో నుంచి కేటీఎం వరకు.. అనేక సంస్థలు ఈవీలపై ఫోకస్​ చేశాయి. ఈ నేపథ్యంలో ఇండియా మార్కెట్​లో లాంచ్​ అయ్యే అవకాశాలు ఉన్న కొత్త ఎలక్ట్రిక్​ స్కూటర్ల వివరాలను ఇక్కడ తెలుసుకుందాము..

బజాజ్​ ఆటో నుంచి రెండు ఎలక్ట్రిక్​ స్కూటర్లు..

బజాజ్​ ఆటో నుంచి స్వింగర్​, జీనీ పేర్లతో రెండు ఎలక్ట్రిక్​ స్కూటర్లు రాబోతున్నట్టు మార్కెట్​లో ఊహాగానాలు జోరుగా సాగుతున్నాయి. ఇండియా పేటెంట్స్​ డిజైన్​ అండ్​ ట్రైడ్​మార్క్స్​ వెబ్​సైట్​లో స్వింగర్​, జీనీ పేర్లు మే నెలలో కనిపించాయి. వీటిని బజాజ్​ ఆటో ట్రైడ్​మార్క్​ చేసుకున్నట్టు తేలింది. వీటికి సంబంధించిన ఇతర వివరాలేవీ అందుబాటులో లేవు. కానీ ఇవి ఎలక్ట్రిక్​ స్కూటర్లని మార్కెట్​లో అంచనాలు మొదలయ్యాయి.

బజాజ్​ ఆటోకు ప్రస్తుతం చేతక్​ ఈవీ ఉంది. ఇక స్వింగర్​, జీనీ కూడా చేతక్​ సరసన చేరే అవకాశం ఉంది.

ఓలా కొత్త ఎలక్ట్రిక్​ స్కూటర్​..

ఎలక్ట్రిక్​ స్కూటర్​ అంటే ముందుగా గుర్తొచ్చే పేరు ఓలా ఎలక్ట్రిక్​. ఈ సంస్థ నుంచి త్వరలోనే ఓ ఈవీ మార్కెట్​లోకి వచ్చే అవకాశం ఉంది. సంస్థ సీఈఓ భవిష్​ అగర్వాల్​ కొన్ని రోజుల క్రితం చేసిన ట్వీట్​పై అందరిలో ఆసక్తి పెరిగింది. జులైలో కొత్త ప్రాడక్ట్​ లాంచ్​ ఈవెంట్​ ఉంటుంది అన్నట్టుగా ఆయన ట్వీట్​ చేశారు.

ప్రస్తుతం ఓలా ఎలక్ట్రిక్​ పోర్ట్​ఫోలియోలో.. ఓలా ఎస్​1, ఓలా ఎస్​1 ప్రో, ఓలా ఎస్​1 ఎయిర్​ వంటి ప్రాడక్ట్స్​ ఉన్నాయి. వీటి ఎక్స్​షోరూం ధరలు వరుసగా రూ. 1.30లక్షలు, రూ. 1.40లక్షలు, రూ. 99,999. మరి జులైలో కొత్త ప్రాడక్ట్​ను చూపిస్తారా.. లేక ఈవెంట్​ ఎప్పుడు జరుగుతుంది? అన్న విషయాన్ని వచ్చే నెలలో చెబుతారా? అన్నది వేచిచూడాలి.

సింపుల్​ ఎనర్జీ నుంచి ఈవీలు..

ఇండియా మార్కెట్​లోకి త్వరలోనే 2 కొత్త ఎలక్ట్రిక్​ స్కూటర్లను లాంచ్​ చేయనున్నట్టు ప్రకటించింది సింపుల్​ ఎనర్జీ సంస్థ. ఇవి.. ఇప్పటికే మార్కెట్​లో ఉన్న సింపుల్​ 1 కన్నా తక్కువ ధరలో ఉంటాయని వెల్లడించింది. ప్రస్తుతం సింపుల్​ 1 ఎక్స్​షోరూం ధర రూ. 1.45లక్షలు- రూ. 1.5లక్షల మధ్యలో ఉంది.

ఈ కొత్త ఈవీల్లో బ్యాటరీ ప్యాక్​ చిన్నగా ఉండే అవకాశం ఉంది. ఫలితంగా రేంజ్ కూడా తగ్గొచ్చు. తక్కువ ధరతో వస్తుండటంతో ఈ సింపుల్​ ఎనర్జీ ఎలక్ట్రిక్​ స్కూటర్లలో ఫీచర్స్​ కూడా పెద్దగా ఉండకపోవచ్చు. లుక్​ అట్రాక్టివ్​గా ఉండే అవకాశం ఉంది.

హోండా నుంచి కూడా..!

హోండా సంస్థ ఇండియా 2 వీలర్​ ఎలక్ట్రిక్​ వాహనాలపై ఫోకస్​ పెంచినట్టు కనిపిస్తోంది. ఈ క్రమంలోనే కొత్తగా రెండు స్కూటర్లకు పేటెంట్​లు ఫైల్​ చేసింది. వీటి పేర్లు డాక్స్​ ఈ, జూమర్​ ఈ అని తెలుస్తోంది. ఈ ఎలక్ట్రిక్​ స్కూటర్ల వర్షెన్​లు మాడెర్న్​గా ఉంటాయని సమాచారం. సైజు పరంగా రెండు చిన్నవే! అయితే వీటిల్లో బాష్​ హబ్​ మోటార్​ ఉంటుందని తెలుస్తోంది. ఇదే నిజమైతే వీటిని ఒక్కసారి ఛార్జ్​ చేస్తే 80కి.మీల రేంజ్​ రావొచ్చు. 25కేఎంపీహెచ్​ టాప్​ స్పీడ్​ ఉండొచ్చు.

కేటీఎం తొలి ఎలక్ట్రిక్​ స్కూటర్​..

దిగ్గజ ఆటోమొబైల్​ సంస్థ కేటీఎం.. ఓ ఎలక్ట్రిక్​ స్కూటర్​ను రూపొందిస్తున్నట్టు తెలుస్తోంది. ఇటలీ మిలాన్​లో ఈ ఏడాదిలో జరగనున్న ఈఐసీఎంఏ షోలో దీనిని.. సంస్థ ప్రదర్శిస్తుందని తెలుస్తోంది. ఇది జరిగిన కొన్ని నెలలకే.. కేటీఎం ఎలక్ట్రిక్​ స్కూటర్​ ఇండియాలో అడుగుపెట్టే అవకాశం ఉంది. ఇండియాలో దీనిని బజాజ్​ ఆటో రూపొందిస్తుందని తెలుస్తోంది. ఇండియాలో తయారు చేసి అంతర్జాతీయ విపణిలోకి ఎగుమతి చేసే యోచనలో సంస్థ ఉన్నట్టు సమాచారం