Sprouts Upma Recipe । మొలకలతో ఉప్మా.. దీని రుచి విభిన్నం, ఆరోగ్యం పదిలం!

Healthy Breakfast Recipes: ఉప్మా గురించి తెలియని వారుండరు, ఇది సులభంగా తయారు చేసుకోగలిగే ఒక ఆరోగ్యకరమైన అల్పాహారం. అభిరుచిని బట్టి క్యారెట్లు, టొమాటోలు, బీన్స్ అంటూ వివిధ రకాల వెజిటెబుల్స్ వేసి కూడా ఈ వంటకాన్ని చేసుకోవచ్చు. ఇలాంటి ఉప్మాను మీరు చాలా సార్లు తినే ఉంటారు. అయితే మీరెపుడైనా మొలకలతో చేసిన ఉప్మా తిన్నారా? మొలకెత్తిన పెసర్లు, ఉసిరి కలిపి విభిన్నమైన ఫ్లేవర్ లో ఉప్మాను చేసుకోవచ్చు. దీని రుచి ప్రత్యేకమైనది, ఈ అల్పాహారం కూడా ఎంతో ఆరోగ్యకరమైనది. మొలకల ఉప్మా రెసిపీని ఇక్కడ అందిస్తున్నాం. మీరూ ఓ సారి ప్రయత్నించి చూడండి.

Sprouts Upma Recipe కోసం కావలసినవి

• రవ్వ - 1.5 కప్పులు
• పెసరి మొలకలు - 1 కప్పు
• బీన్స్ - 200 గ్రాములు
• క్యారెట్ - 1
• ఉల్లిపాయలు - 1
• కరివేపాకు - 1 రెమ్మ
• ఉసిరికాయ తురుము లేదా నిమ్మరసం - 1 టీస్పూన్
• పచ్చిమిర్చి - 1
• కొత్తిమీర - 1 టేబుల్ స్పూన్
• ఉప్పు, మిరియాల పొడి - రుచికి తగినంత
• మినపపప్పు - 1 టీస్పూన్
• ఆవాలు - 1 టీస్పూన్
• నూనె - 1 టేబుల్ స్పూన్
• నీరు - 3.5 కప్పులు

మొలకల ఉప్మా తయారీ విధానం

1. ముందుగా బీన్స్, క్యారెట్, ఉల్లిపాయలను కడిగి చిన్నని ముక్కలుగా కట్ చేసుకోవాలి. కరివేపాకును కడిగి ఆరబెట్టుకోవాలి.
2. మొదటగా ఒక కడాయిలో, ఒక టేబుల్ స్పూన్ నూనె వేడి చేసి, అందులో ఆవాలు, మినపపప్పు వేసి దోరగా వేయించండి.
3. ఆపైన తరిగిన ఉల్లిపాయలు, బీన్స్, క్యారెట్, పచ్చిమిర్చి, కరివేపాకు వేసి ఉడికించండి, పైనుంచి పెసర్ల మొలకలు వేసి మృదువుగా కలపండి.
4. కొద్దిగా ఉడికిన తర్వాత రోస్ట్ చేసిన రవ్వ, తురిమిన ఉసిరి వేయండి, రవ్వ బంగారు-గోధుమ రంగులోకి వచ్చే వరకు మీడియం మంట మీద కలుపుతుండండి.
5. ఇప్పుడు నీరు పోసి, రుచికి తగినంత ఉప్పు, మిరియాల పొడి వేసి కలపండి, కలుపుతూ ఉడికించండి.
6. చివరగా కొత్తిమీరతో గార్నిష్ చేసుకోవాలి. అంతే మొలకల ఉప్మా రెడీ.

ఈ ఉప్మాను నేరుగా లేదా మీకు నచ్చిన చట్నీ, ఊరగాయతో కలుపుకొని తినవచ్చు. మొలకలతో ఇడ్లీ కూడా చేసుకోవచ్చు. ఆ రెసిపీని లింక్ క్లిక్ చేసి చూడొచ్చు.