AP Cabinet Meeting : ఇవాళ ఏపీ కేబినెట్ భేటీ - చర్చించే కీలక అంశాలివే...!

ఇవాళ ఏపీ కేబినెట్ భేటీ జరగనుంది. అమ‌రావతి స‌చివాల‌యం ఒక‌టో బ్లాక్‌లోని కేబినెట్ హాల్‌లో ఉద‌యం 11 గంట‌ల‌కు ఈ సమావేశం ప్రారంభమవుతుంది. రాష్ట్ర ముఖ్య‌మంత్రి నారా చంద్ర‌బాబు నాయుడు అధ్యక్ష‌త‌న జ‌రిగిన ఈ స‌మావేశంలో కీల‌క‌మైన ప‌లు అంశాల‌పై చ‌ర్చ జ‌రిగే అవ‌కాశం ఉంది.

కీలక అంశాలపై చర్చ…!

• దీపావ‌ళికి సూప‌ర్ సిక్స్‌లో భాగ‌మైన మ‌హిళ‌ల‌కు ఉచిత గ్యాస్ సిలిండ‌ర్లు అమ‌లు చేస్తామ‌ని ఇప్ప‌టికే క‌ర్నూలు స‌భ‌లో రాష్ట్ర ముఖ్య‌మంత్రి చంద్ర‌బాబు నాయుడు ప్ర‌క‌టించారు. క‌నుక రాష్ట్ర మంత్రి వ‌ర్గ స‌మావేశంలో మ‌హిళ‌ల‌కు ఉచిత గ్యాస్ అంశంపై ఒక నిర్ణ‌యం తీసుకోనే అవకాశం ఉందని తెలుస్తోంది.
• అలాగే మ‌హాత్మా గాంధీ జ‌యంతి రోజున సీఎం చంద్రబాబు మ‌చిలీప‌ట్నంలో మాట్లాడుతూ చెత్త‌ ప‌న్ను ర‌ద్దు చేస్తామ‌ని, రాష్ట్ర వ్యాప్తంగా చెత్త ప‌న్ను వ‌సూలు చేయొద్ద‌ని అధికారుల‌కు ఆదేశించారు. దీనిపై కూడా రాష్ట్ర మంత్రి వ‌ర్గం నిర్ణ‌యం తీసుకోనుంది. అలాగే జ‌ల్ జీవ‌న్ మిష‌ణ్ ద్వారా ఇంటింటికి మంచినీటి కుళాయి ఏర్పాటు, పోల‌వ‌రం ప్రాజెక్టు నిర్మాణం, రాజ‌ధాని అమ‌రావ‌తి పునఃనిర్మాణం వంటి అంశాల‌పై రాష్ట్ర మంత్రి వ‌ర్గంలో చ‌ర్చ జ‌ర‌గ‌నుంది.
• వరద ప్రభావిత ప్రాంతాల్లో రుణాల రీషెడ్యూల్‌లో స్టాంపు డ్యూటీ, రిజిస్ట్రేషన్ ఫీజుల మినహాయింపుపై కేబినెట్ నిర్ణయించే అవకాశం ఉంది. చె
• 13 కొత్త మున్సిపాలిటీల్లో 190 కొత్త పోస్టుల భర్తీ ప్రతిపాదనపై కేబినెట్ చర్చించనుంది. రాష్ట్రంలోని వివిధ దేవాలయాలకు పాలక మండళ్ల నియామకంలో చట్ట సవరణకు కేబినెట్ ముందుకు ప్రతిపాదన రానుంది.
• దేవాలయాల పాలక మండలిని 15 మంది నుంచి 17 మందికి పెంచే ప్రతిపాదనపైనా ఏపీ మంత్రివర్గం చర్చించే అవకాశం ఉంది. మరికొన్ని కీలక నిర్మయాలు ఉండొచ్చని సమాచారం.
• రాష్ట్ర శాసనసభ నిర్వహణపై కూడా కేబినెట్ లో చర్చకు వచ్చే అవకాశం ఉంది. ఈ ఆర్థిక సంవత్సరంలో మిగిలిన ఆరు నెలల కాలానికి బడ్జెట్ ప్రవేశ పెట్టే అంశంపై చర్చిస్తారని తెలుస్తోంది.
• మరోవైపు రాష్ట్రంలో త్వరలో కొత్త రేషన్‌ కార్డులు ఇచ్చేందుకు ఏపీ ప్రభుత్వం సిద్ధమవుతోంది. ఇప్పటికే ఉన్న కార్డుల్లో కుటుంబసభ్యుల మార్పులు, చేర్పులకు రాష్ట్ర ప్రభుత్వం కసరత్తు చేస్తోంది. ఇవాళ జరిగే కేబినెట్ భేటీలో దీనిపై నిర్ణయం తీసుకునే అవకాశం ఉంది.
• వాహనాల ద్వారా రేషన్‌ సరకుల పంపిణీపై ప్రభుత్వం త్వరలో కీలక నిర్ణయం తీసుకోనుంది. మంత్రివర్గ సమావేశంలో దీనిపై చర్చించే అవకాశం ఉంది.
• 6 వేల రేషన్‌ డీలర్ల ఖాళీలను భర్తీ చేయడంతో పాటు కొత్తగా 4 వేలకు పైగా దుకాణాలు ఏర్పాటు చేయాలని సర్కార్ భావిస్తోంది. దీనిపై ఏపీ మంత్రివర్గం నిర్ణయం తీసుకునే అవకాశం ఉంది.