Kolkata dr news: ‘‘గుర్తు తెలియని మృతదేహాలను అమ్ముకునేవాడు’’- కోల్ కతా మెడికల్ కాలేజీ ప్రిన్సిపాల్ పై సంచలన ఆరోపణలు

కోల్ కతాలో దేశవ్యాప్తంగా సంచలనం సృష్టించిన ట్రైనీ డాక్టర్ హత్యాచారం నేపథ్యంలో సంచలన విషయాలు వెలుగులోకి వస్తున్నాయి. ప్రభుత్వ ఆధ్వర్యంలోని ఆర్జీ కర్ మెడికల్ కాలేజ్ అండ్ హాస్పిటల్ మాజీ ప్రిన్సిపాల్ సందీప్ ఘోష్ మృతదేహాల అమ్మకంతో సహా అనేక చట్టవ్యతిరేక కార్యకలాపాలకు పాల్పడ్డారని ఆసుపత్రి మాజీ ఉద్యోగి ఒకరు ఆరోపించారు. ఆస్పత్రిలోని సెమినార్ హాల్ లో ట్రైనీ డాక్టర్ పై అత్యాచారం, హత్య తర్వాత డాక్టర్ సందీప్ ఘోష్ వ్యవహరించిన తీరుపై సీబీఐ (CBI) విచారణ చేపట్టింది. మృతదేహాన్ని అప్పగించే ముందు బాధితురాలి తల్లిదండ్రులను మూడు గంటల పాటు ఎందుకు నిరీక్షించేలా చేశారని పలుమార్లు విచారణ సందర్భంగా ఆయనను ప్రశ్నించింది.

చాలా నేరాలు చేశాడు..

బయోమెడికల్ వ్యర్థాలు, వైద్య సామాగ్రిని బంగ్లాదేశ్ కు అక్రమంగా రవాణా చేయడంలో డాక్టర్ సందీప్ ఘోష్ ప్రమేయం ఉందని ఆర్జీ కర్ మెడికల్ కాలేజీ మాజీ డిప్యూటీ సూపరింటెండెంట్ అక్తర్ అలీ తెలిపారు. ఆసుపత్రికి వచ్చిన క్లెయిమ్ చేయని మృతదేహాలతో వ్యాపారం చేసేవాడని అక్తర్ అలీ ఆరోపించారు. సందీప్ ఘోష్ తన అదనపు భద్రతలో భాగమైన వారికి బయోమెడికల్ వ్యర్థాలను విక్రయించేవాడని అక్తర్ అలీ చెప్పారు. ఆ తర్వాత వాటిని బంగ్లాదేశ్ కు అక్రమంగా పంపించేవారని తెలిపారు.

హైకోర్టులో పిటిషన్

ఆసుపత్రికి వచ్చిన క్లెయిమ్ చేయని మృతదేహాలతో వ్యాపారం చేస్తాడని కోల్ కతా ఆర్జీ కర్ మెడికల్ కాలేజ్ అండ్ హాస్పిటల్ మాజీ ప్రిన్సిపాల్ సందీప్ ఘోష్ పై ఆరోపణలు చేస్తూ ఆయన మాజీ సహోద్యోగి, ఆ కాలేజీ మాజీ డిప్యూటీ సూపరింటెండెంట్ అక్తర్ అలీ కలకత్తా హై కోర్టులో పిటిషన్ వేశారు. దీనిపై ఈడీతో విచారణ జరిపించాలని కోరారు. సందీప్ ఘోష్ దుశ్చర్యల గురించి తాను రాష్ట్ర విజిలెన్స్ కమిషన్ కు సమాచారం ఇచ్చానని అక్తర్ అలీ పేర్కొన్నారు. సందీప్ ఘోష్ ను దోషిగా తేల్చిన దర్యాప్తు కమిటీలో తాను కూడా ఉన్నానని చెప్పారు.

విద్యార్థుల నుంచి లంచాలు..

పరీక్షల్లో ఉత్తీర్ణత సాధించడానికి డాక్టర్ సందీప్ ఘోష్ విద్యార్థుల నుంచి లంచాలు డిమాండ్ చేశాడని అక్తర్ అలీ ఆరోపించారు. సందీప్ ఘోష్ ప్రతి టెండర్ లో 20 శాతం కమీషన్ తీసుకునేవారని ఆయన పేర్కొన్నారు. ఆర్ జీ కర్ ఆస్పత్రిలో ఆర్థిక అవకతవకలపై కోల్ కతా పోలీసులు దర్యాప్తు ప్రారంభించారు. ఆసుపత్రిలో జరిగిన ఆర్థిక అవకతవకలపై విచారణ జరిపేందుకు నలుగురు సభ్యులతో కూడిన సిట్ ను ఏర్పాటు చేశారు. "ఆర్ జి కర్ మెడికల్ కాలేజ్ అండ్ హాస్పిటల్ లో ఘోష్ ఆర్థిక అవకతవకలకు పాల్పడినట్లు ఆరోపణలు ఉన్నాయి. త్వరలోనే అతడిని విచారించేందుకు అధికారులు సమన్లు జారీ చేయనున్నారు' అని ఓ అధికారి తెలిపారు.