KGF 2 | సలాం రాకీ భాయ్.. బాహుబలి 2ని మించిపోయిన కేజీఎఫ్‌ 2

సలాం రాఖీభాయ్‌ అంటోంది ఇప్పుడు ఇండియన్‌ సినిమా. కేజీఎఫ్‌ ఛాప్టర్‌ 2 ఒక్కో రికార్డు బద్ధలు కొట్టుకుంటూ వెళ్తుంటే.. గత సినిమాలన్నీ అలా చూస్తుండిపోతున్నాయి. బాక్సాఫీస్‌పై ఇప్పటికే ఆ సినిమా దండయాత్ర కొనసాగిస్తూ ప్రపంచవ్యాప్తంగా రూ.1200 కోట్లకుపైగా వసూలు చేసింది. తొలి పార్ట్ సక్సెస్‌ కావడంతో ఈ మూవీపై మొదటి నుంచీ అంచనాలు భారీగానే ఉన్నాయి.

అయితే ఆ ఫస్ట్‌ పార్ట్ ప్రపంచవ్యాప్తంగా కేవలం రూ.200 కోట్లు మాత్రమే వసూలు చేయగా.. ఈ సెకండ్‌ ఛాప్టర్‌ మాత్రం అంతకు ఆరింతలు చేయడమే అసలైన రికార్డు. ఇక ఇప్పుడు రాజమౌళి అద్భుతం బాహుబలి 2 రికార్డును కూడా కేజీఎఫ్‌ 2 మించిపోయింది. అయితే అది కలెక్షన్ల పరంగా కాదు. ఇంకా దానికి ఈ మూవీ చాలా దూరంలోనే ఉంది.

టికెట్‌ బుకింగ్ పోర్టల్‌ అయిన బుక్‌మైషోలో ఈ తాజా రికార్డు నమోదు చేసింది కేజీఎఫ్‌ 2. ఇప్పటివరకూ ఈ పోర్టల్‌లో కేజీఎఫ్‌ ఛాప్టర్‌ 2 టికెట్లు 1.71 కోట్లు అమ్ముడుపోవడం విశేషం. ఇది ఆల్‌టైమ్‌ రికార్డు. ఈ విషయంలో బాహుబలి 2ని ఈ సినిమా మించిపోయింది. ఇన్ని టికెట్లు ఇదొక్క పోర్టల్‌ ద్వారానే అమ్ముడయ్యాయంటే మొత్తంగా ఈ సినిమా రేంజ్‌ ఏంటో అర్థం చేసుకోవచ్చు.

ప్రస్తుతం కేజీఎఫ్‌ ఛాప్టర్‌ 2 అమెజాన్‌ ప్రైమ్ వీడియోలో అందుబాటులో ఉంది. అయితే దీనిని ఎర్లీ యాక్సెస్‌ పేరుతో రూ.199 చెల్లించిన వారు మాత్రమే రెంట్ రూపంలో చూడొచ్చు. ప్రైమ్‌ వీడియో సబ్‌స్క్రైబర్లందరికీ ఉచితంగా ఎప్పుడు అందుబాటులోకి వస్తుందో మాత్రం ఇంకా తెలియలేదు.