KGF-2 Collections Record | కేజీఎఫ్-2 అరుదైన రికార్డు.. కలెక్షన్ల సునామీ
17 May 2022, 8:00 IST
- కేజీఎఫ్ ఛాప్టర్-2 అరుదైన ఘనత సాధించింది. బాహుబలి-2, దంగల్ సినిమా తర్వాత అత్యధిక వసూళ్లను రాబట్టిన చిత్రంగా రికార్డు సృష్టించింది. ఈ సినిమా అమెజాన్ ప్రైమ్ వీడియోలో కూడా అందుబాటులో ఉంది.
కేజీఎఫ్ ఛాప్టర్ 2
ప్రశాంత్ నీల్ దర్శకత్వంలో కన్నడ హీరో యశ్ నటించిన చిత్రం కేజీఎఫ్ ఛాప్టర్-2. కేజీఎఫ్ చిత్రానికి సీక్వెల్గా వచ్చిన ఈ సినిమా గత నెల 14న విడుదలై అఖండ విజయాన్ని సొంతం చేసుకున్న సంగతి తెలిసిందే. పాన్ఇండియా స్థాయిలో వసూళ్ల వర్షాన్ని కురిపించింది. తాజాగా ఈ సినిమా అరుదైన ఘనత సాధించింది. రూ.1200 కోట్ల మార్కును అధిగమించి దంగల్, బాహుబలి-2 తర్వాత అత్యధిక వసూళ్లను సాధించిన చిత్రంగా రికార్డు సృష్టించింది.
సినిమా విడుదలై నెల రోజులు దాటిన వసూళ్లు మాత్రం ఆగడం లేదు. 500, 1000 కోట్లను ధాటి తాజాగా రూ.1200 కోట్ల మార్కును అధిగమించింది. ఇప్పటి వరకు ఈ క్లబ్లో చేరిన సినిమా దంగల్, బాహుబలి-2 మాత్రమే. తాజాగా ఈ రెండింటి తర్వాత ఆ మార్కును అందుకున్న సినిమాగా కేజీఎఫ్ ఛాప్టర్-2 అవతరించింది.
కన్నడతో పాటు తెలుగు, తమిళం, హిందీ, మలయాళ భాషల్లో ఏకకాలంలో రిలీజైన ఈ సినిమాకు ప్రేక్షకులు బ్రహ్మరథం పట్టారు. ముఖ్యంగా హిందీ బెల్టులో ఈ సినిమా విశేష ఆదారణ లభిస్తోంది. విడుదలై నెల రోజులు కావస్తున్నా.. కలెక్షన్ల వర్షం మాత్రం ఇంకా కురుస్తూనే ఉంది.
అయితే అమెజాన్ ప్రైమ్ వీడియోలో అప్పుడే ఈ సినిమా స్ట్రీమింగ్ మొదలైంది. కేజీఎఫ్ ఛాప్టర్ 1 అందుబాటులో ఉన్న అమెజాన్ ప్రైమ్ వీడియోలోనే ఈ ఛాప్టర్ 2 కూడా వచ్చేసింది. ఈ విషయాన్ని సోమవారం ప్రైమ్ వీడియోనే ట్విటర్ ద్వారా అనౌన్స్ చేసింది. అయితే ఇక్కడే ఓ ట్విస్ట్ ఉంది. ప్రైమ్ వీడియో సబ్స్క్రిప్షన్ ఉన్నంత మాత్రాన ఈ సినిమాను ఫ్రీగా చూసే ఛాన్స్ లేదు. ఎర్లీ యాక్సెస్ పేరుతో ఈ సినిమాను తీసుకొచ్చిన అమెజాన్.. రెంట్ మీద మాత్రమే అందిస్తోంది.
అంటే ఈ సినిమా చూడాలనుకునేవాళ్లు రూ.199 చెల్లించాల్సి ఉంటుంది. ఒకసారి మూవీని రెంట్కు తీసుకుంటే అది 30 రోజుల వరకూ వేలిడిటీ ఉంటుంది. అయితే సినిమా చూడటం ప్రారంభిస్తే 48 గంటల్లోపే పూర్తి చేయాలి. కొన్నిరోజుల పాటు ఈ సినిమా పే పర్ వ్యూ బేస్ మీద నడిపించిన తర్వాత అందరి సబ్స్క్రైబర్లకు అందుబాటులోకి తెచ్చే అవకాశముంది. అయితే ఇది ఎప్పుడనేది మాత్రం తెలియాల్సి ఉంది.
టాపిక్