Pushpa Team in Russia: రష్యాలో పుష్ప టీమ్ సందడి.. అల్లు అర్జున్, రష్మిక తగ్గేదేలే

Pushpa Team In Russia: స్టైలిష్ స్టార్ అల్లు అర్జున్ నటించిన పుష్ప ఎంతటి ఘనవిజయం సాధించిందో ప్రత్యేకంగా చెప్పనక్కర్లేదు. సుకుమార్ దర్శకత్వం వహించిన ఈ సినిమా గతేడాది విడుదైలన చిత్రాన్నింటిలోనూ అద్బుత విజయాన్ని సొంతం చేసుకుంది. రష్మిక మందన్నా హీరోయిన్‌గా చేసింది. ఈ సినిమా రిలీజై ఏడాది అవుతున్నప్పటికీ దీని ప్రభావం ఏమాత్రం తగ్గలేదు. ఇప్పుడు ఈ సినిమా రష్యాలో విడుదలకు సిద్ధంగా ఉంది. డిసెంబరు 8న అక్కడ థియేటర్లలో రష్యా ప్రేక్షకులను పలకరించనుంది. దీంతో ప్రమోషన్ల కోసం చిత్రబృందం రష్యా చేరుకుంది.

అల్లు అర్జున్‌తో పాటు రష్మికా మందన్నా, దర్శకుడు సుకుమార్ రష్యాకు వెళ్లారు. చిత్ర ప్రమోషన్లలో భాగంగా రష్యాలో పలు ప్రీమియర్లకు వీరు హాజరుకాబోతున్నారు. ఇప్పటికే రష్యన్ ట్రైలర్‌ను కూడా విడుదల చేసింది చిత్రబృందం. రష్యా చేరుకున్న పుష్ప టీమ్‌కు సాదర స్వాగతం లభించింది. అక్కడ విడుదలకు ఇంకా వారం రోజులు మాత్రమే ఉండటంతో ప్రీమియర్ షోలను ప్రదర్శించనున్నారు.

డిసెంబరు 1న మాస్కోలో, 3వ తేదీన సెయింట్ పీటర్స్‌బర్గ్‌లో ప్రీమియర్ షోలను ప్లాన్ చేశారు మేకర్స్. మాస్కోలో జరిగే ప్రీమియర్ షోలో అల్లు అర్జున్, రష్మికాతో పాటు దర్శకుడు సుకుమార్, నిర్మాత రవిశంకర్ పాల్గొని అక్కడి మీడియాతో మాట్లాడనున్నారు. మరి రష్యాలో ఈ చిత్రం ఎన్ని రికార్డులను సృష్టించనుందో వేచి చూడాలి.

ప్రస్తుతం అల్లు అర్జున్, సుకుమార్ పుష్ప-2 చిత్రీకరణలో బిజీగా ఉన్నారు. రష్యాలో రీ రిలీజ్ చేయనుండటంతో కాస్త గ్యాప్ ఇచ్చారు. మైత్రీ మూవీ మేకర్స్ పతాకంపై నవీన్ యర్నేనీ, వై రవిశంకర్ ఈ సినిమాను నిర్మించారు. దేవిశ్రీ ప్రసాద్ సంగీతాన్ని సమకూర్చారు. అల్లు అర్జున్, రష్మికా మందన్నా, ఫహాద్ ఫాజిల్ తదితరులు ఇందులో కీలక పాత్రలు పోషించారు.