Curd for weight loss: పెరుగును ఇలా తిన్నారంటే.. సులువుగా బరువు తగ్గుతారు..
Curd for weight loss: బరువు తగ్గించే చాలా ఆహారాల్లో పెరుగును వాడతారు. కానీ దాని ఉపయోగాల్ని పూర్తిగా అర్థం చేసుకోం. ఆహారంలో పెరుగును ఇలా చేర్చుకుంటే బరువు తగ్గుతారు.
పెరుగులో ప్రొబయాటిక్స్, ప్రొటీన్ ఎక్కువగా ఉంటాయి. దీంట్లో ఉండే మరిన్ని లక్షణాల వల్ల ఇది బరువు తగ్గించడానికి సాయపడుతుంది. కేలరీలు తక్కువగా ఉండడం వల్ల వెయిట్ లాస్ డైట్ లో దీన్ని చేర్చుకోవచ్చు. దీన్ని ఆహారంలో ఎలా చేర్చుకుంటే ఫలితాలుంటాయో, దీని ఉపయోగాలేంటో చూడండి.
బరువు తగ్గించడానికి పెరుగు:
1. ప్రొటీన్ ఎక్కువ:
పెరుగులో ప్రొటీన్ ఎక్కువగా ఉంటుంది. ఇది మజిల్ మాస్ పెంచుతుంది. అలాగే ఎక్కువ సేపు కడుపు నిండిన బావననిస్తుంది. దాంతో మనం తినే కేలరీలు తగ్గుతాయి. ప్రొటీన్ ఎక్కువున్న ఆహారం తినడం వల్ల బరువు తగ్గుతారని చాలా పరిశోధనలు చెబుతున్నాయి.
2. ప్రొబయాటిక్స్:
పెరుగులో ప్రొబయాటిక్స్ పేగు ఆరోగ్యాన్ని మెరుగుపరుస్తాయి. జీర్ణశక్తిని పెంచుతాయి. జీవక్రియ మెరుగుపడుతుంది. ఇవన్నీ బరువు తగ్గించే లక్షణాలు. ఆకలిని తగ్గించి హార్మోన్ల స్థాయుల్ని నియంత్రణలో ఉంచుతాయి. ఆరోగ్య కరమైన పేగు ఆరోగ్యం ప్రభావం బరువు మీద ఉంటుంది.
3. కేలరీలు తక్కువ:
కేలరీలు ఎక్కువ తీసుకుంటే బరువు ఎక్కువగా పెరుగుతారు. సాదా పెరుగులో కేలరీలు తక్కువుంటాయి. వంద గ్రాముల పెరుగులో 98 కేలరీలుంటాయి. కాబట్టి బరువు తగ్గాలనుకునే వారికి ఇది మంచి ఆహారం.
ఆహారంలో పెరుగు ఎలా చేర్చుకోవాలి?
- పండ్లతో పెరుగు: తాజా బెర్రీలు, యాపిల్స్, అరటిపండ్ల ముక్కల్లో పెరుగు కలుపుకుని తినాలి. దీంతో పీచు, విటమిన్లు, యాంటీ ఆక్సిడెంట్లు అందుతాయి. మంచి ఆరోగ్యకరమైన స్నాక్ ఇది.
- స్మూతీలు: మీకిష్టమైన కూరగాయలు లేదా పండ్లు తీసుకోవాలి. దాంతో పాటే పాలకూర లేదా ఇంకేదైనా ఆకుకూర గుప్పెడు, కాస్త పెరుగు వేసుకుని మెత్తగా మిక్సీ పట్టుకోవాలి. ఇది అల్పాహారం లాగా, వర్కవుట్ తినే స్నాక్ లాగా ఉత్తమమైన ఎంపిక.
- సలాడ్ డ్రెస్సింగ్: సలాడ్లలో మాయోనైజ్ లేదా క్రీం ను సలాడ్ డ్రెస్సింగ్ లాగా వాడతారు. దీంట్లో కేలరీలు ఎక్కువ. బదులుగా తియ్యటి పెరుగును సలాడ్ డ్రెస్సింగ్ లాగా వాడుకోవాలి. నిమ్మరసం, ఆలివ్ ఆయిల్ వేసి తింటే సలాడ్ రుచి చాలా బాగుంటుంది.
- ఫ్లేవర్డ్ పెరుగు: పెరుగులో దాల్చిన చెక్క పొడి, జీలకర్ర పొడి, పసుపు కలుపుకుని తినొచ్చు. రుచితో పాటూ జీవక్రియ పెంచుతాయివి.
- వంటల్లో: మాంసం, టోఫు లాంటివి మ్యారినేషన్ చేయడంలో వీలైనంత ఎక్కువ పెరుగు వాడాలి. ప్రొటీన్ తో పాటూ మంచి రుచి కూడా వస్తుంది. ఎలాంటి ఎక్కువ కేలరీలు చేర్చినట్లు ఉండదు.
ఈ జాగ్రత్తలు:
సాధారణంగా పెరుగు తినడం వల్ల ఎలాంటి సైడ్ ఎఫెక్ట్స్ ఉండవు. కానీ కొందరిలో గ్యాస్, బ్లోటింగ్ లాంటి సమస్యలు రావచ్చు. ముఖ్యంగా ల్యాక్టోజ్ పడనివాళ్లలో ఈ సమస్య రావచ్చు.
బయట దొరికే ఫ్లేవర్డ్, స్వీటెన్డ్ పెరుగులో ఎక్కువ పంచదార ఉంటుంది. ఇది మీ బరువు తగ్గించే ప్రయత్నానికి ఆటంకమే. అందుకే ఇంట్లో పెరుగు లేదంటే ఎలాంటి ఫ్లేవరింగ్, పంచదార లేని పెరుగు తినాలి.
కేలరీలు తక్కువ కదాని ఎక్కువగా పెరుగు తినకూడదు. అనవసరమైన కేలరీలు చేరి బరువు పెరిగిపోతారు. ఏదైనా మితంగా తీసుకుంటేనే ఆరోగ్యం.