Tomato Oats: కమ్మగా, పుల్లగా టమాటా ఓట్స్.. చలికాలంలో బెస్ట్ బ్రేక్‌ఫాస్ట్..

చలికాలంలో వేడిగా, కారంగా, నోటికి రుచిగా ఏదైనా తినాలనిపిస్తుంటుంది. అలాంటప్పుడు సింపుల్‌గా అయిపోయే ఈ టమాటా ఓట్స్ ప్రయత్నించండి. ఎప్పుడూ తినే ఓట్స్ కాకుండా ఇవి కాస్త పుల్లగా ఉంటాయి. రుచిని బట్టి టమాటాలు ఎక్కువా, తక్కువా వేసుకోవచ్చు. వాటి తయారీ ఎలాగో వివరంగా చూసేయండి.

టమాటా ఓట్స్ కోసం కావాల్సిన పదార్థాలు:

1 కప్పు ఓట్స్

2 పెద్ద టమటాలు, సన్నటి ముక్కలు

2 చెంచాల నెయ్యి

పావు చెంచా జీలకర్ర

చిన్న అంగుళం ముక్క

2 పచ్చిమిర్చి

1 ఉల్లిపాయ, సన్నటి ముక్కలు

పావు టీస్పూన్ పసుపు

పావు చెంచా కారం

పావు చెంచా ధనియాల పొడి

పావు చెంచా గరం మసాలా

తగినంత ఉప్పు

గుప్పెడు బటానీలు

కొద్దిగా కొత్తిమీర తరుగు

టమాటా ఓట్స్ తయారీ విధానం:

1. ఒక కడాయిలో నెయ్యి లేదా నూనె వేసుకోవాలి. నూనె వేడెక్కాక జీలకర్ర, అల్లం, పచ్చిమిర్చి ముక్కలు వేసుకుని కాస్త పచ్చివాసన పోయేదాకా వేయించాలి.
2. అందులో ఉల్లిపాయ ముక్కలు కూడా వేసుకుని రంగు మారేదాకా వేయించుకోవాలి.
3. కాసేపాగి మసాలాలన్నీ వేసుకోవాలి. పసుపు, కారం, ధనియాల పొడి, గరం మసాలా వేసుకుని వేగనివ్వాలి. ఒక నిమిషం వేగాక సన్నటి టమాటా ముక్కలు, ఉప్పు కూడా వేసుకుని కలుపుకోవాలి.
4. అవి మగ్గేదాకా మూత పెట్టుకోవాలి. కాస్త ముక్క మెత్తబడ్డాక బటానీలు కూడా వేసుకుని ఒక కప్పు ఓట్స్‌కు నాలుగు కప్పుల నీళ్లు పోసుకోవాలి. అవి ఒక ఉడుకు వచ్చేదాకా ఆగాలి.
5. అందులో కప్పు ఓట్స్ వేసుకొని ఉండలు కట్టకుండా కలుపుకోవాలి. ఒక నిమిషంలో ఓట్స్ మెత్తగా ఉడికిపోతాయి. చివరగా కొత్తిమీర చల్లుకుని దించేసుకుంటే సరిపోతుంది. టమాటా ఓట్స్ రెడీ.