Podi or Karam Idli: ఇంట్లోనే టేస్టీగా కారం ఇడ్లీ ఎలా చేసుకోవచ్చంటే..

ఈ మధ్య సోషల్ మీడియాలో ఎక్కువగా కనిపిస్తున్న పొడి ఇడ్లీ లేదా కారం ఇడ్లీ ఇంట్లోనే చేసుకోవచ్చు. దానికోసం ఒక స్పెషల్ మసాలా పొడి సిద్ధం చేసి పెట్టుకుంటే చాలు. దాన్నే చాలా రోజులు వాడుకోవచ్చు. ఈ పొడి చల్లి కాస్త నెయ్యి వేసి సర్వ్ చేసుకుంటే గీ కారం ఇడ్లీ కూడా రెడీ అయినట్లే. దాని తయారీ ఎలాగో వివరంగా చూసేయండి.

కావాల్సిన పదార్థాలు:

1/8 కప్పు నువ్వులు

4 చెంచాల నువ్వుల నూనె లేదా ఏదైనా వంటనూనె

10 ఎండుమిర్చి

1 కరివేపాకు రెమ్మ

పావు కప్పు శనగపప్పు

సగం కప్పు మినప్పప్పు

సగం టీస్పూన్ ఇంగువ

తగినంత ఉప్పు

తాలింపు కోసం:

పావు టీస్పూన్ ఆవాలు

కరివేపాకు రెబ్బ

సగం చెంచా కారం

తయారీ విధానం:

1. ముందుగా నూనె లేకుండా కడాయిలో నువ్వులను వేయించుకోవాలి. కాస్త రంగు మారాక బయటకు ప్లేట్ లో తీసుకోవాలి.
2. అందులోనే శనగపప్పు, మినప్పప్పు కూడా వేసుకుని రంగు మారేదాకా వేయించుకోవాలి. వీటని కూడా ప్లేట్ లోకి తీసుకోవాలి.
3. అదే కడాయిలో 1 చెంచా నూనె వేసుకుని ఎండు మిర్చి వేసుకుని వేగనివ్వాలి. కరివేపాకు కూడా వేసుకుని కరకరలాడేదాకా వేయించుకుని, వేగాక తీసి పక్కన పెట్టుకోవాలి.
4. ఇవన్నీ చల్లారాక మిక్సీ జార్లో వేసుకుని బాగా మిక్సీ పట్టుకోవాలి. ఇదే ఇడ్లీ కారం లేదా ఇడ్లీ పొడి.
5. ఇప్పుడు ఇడ్లీలను తాలింపు పెట్టుకోడానికి ముందుగా పెద్ద సైజు ఇడ్లీలు లేదా బటన్ ఇడ్లీలు రెడీ చేసుకొని పెట్టుకోవాలి.
6. కడాయిలో నూనె వేసుకుని వేడెక్కాక ఆవాలు, కరివేపాకు వేసుకోవాలి. అందులోనే ముందుగా మిక్సీ పట్టుకున్న పొడి ఒక చెంచాడు, కాస్త కారం కూడా వేసుకుని కలుపుకోవాలి.
7. ఇప్పుడు ఇడ్లీలు వేసుకుని బాగా కలియబెట్టాలి. పొడి అంతా ఇడ్లీలకు బాగా అంటుకునే లాగా కలపాలి. ఒక నిమిషం అలా కలియబెట్టాక సర్వ్ చేసుకుంటే సరి. కాస్త నెయ్యి కూడా వేసుకుని సర్వ్ చేసుకుంటే నెయ్యి కారం ఇడ్లీ రెడీ అయినట్లే.