IND vs SA: నేడు ఇండియా, సౌతాఫ్రికా మ్యాచ్ - రికార్డ్‌పై క‌న్నేసిన కోహ్లి

IND vs SA: టీ20 వ‌ర‌ల్డ్‌క‌ప్‌లో వ‌రుస‌గా రెండు విజ‌యాల‌తో జోరుమీదున్న‌ది రోహిత్ సేన‌. పాకిస్థాన్‌తో జ‌రిగిన మ్యాచ్‌లో నాట‌కీయ ప‌రిణామాల మ‌ధ్య చివ‌రి బాల్‌కు గ‌ట్టెక్కింది టీమ్ ఇండియా. నెద‌ర్లాండ్స్‌తో జ‌రిగిన మ్యాచ్‌లో సుల‌భంగా విజ‌యాన్ని అందుకొంది. నేడు సౌతాఫ్రికాతో పోరుకు సిద్ధ‌మైంది. హ్యాట్రిక్ విజ‌యాన్ని అందుకోవాల‌నే ఉత్సాహంతో బ‌రిలో దిగుతోంది. పాకిస్థాన్‌, నెద‌ర్లాండ్స్ మ్యాచ్‌ల‌లో హాఫ్ సెంచ‌రీల‌తో అద‌ర‌గొట్టిన విరాట్ కోహ్లిపైనే క్రికెట్ అభిమానుల దృష్టి ఉంది.

సౌతాఫ్రికాతో మ్యాచ్‌లో అత‌డు ఎలా ఆడుతాడో అని ఆస‌క్తిగా ఎదురుచూస్తున్నారు. మ‌రో 28 ప‌రుగులు చేస్తే టీ20 క్రికెట్‌లో అత్య‌ధిక ర‌న్స్ చేసిన క్రికెట‌ర్‌గా కోహ్లి నిలుస్తాడు.

ప్ర‌స్తుతం ఈ రికార్డ్ శ్రీలంక మాజీ క్రికెట‌ర్ మ‌హేలా జ‌య‌వ‌ర్ధ‌నే పేరుమీద ఉన్న‌ది. 31 మ్యాచుల్లో జ‌య‌వ‌ర్ధ‌నే 1016 ర‌న్స్ చేశాడు. ప్ర‌స్తుతం కోహ్లి 23 మ్యాచుల్లో 989 ర‌న్స్‌తో సెకండ్ ప్లేస్‌లో ఉన్నాడు. మ‌రో 28 ర‌న్స్ చేస్తే జ‌య‌వ‌ర్ధ‌నే రికార్డ్‌ను బ్రేక్ చేసి కోహ్లి టాప్ ప్లేస్‌లోకి చేరుకుంటాడు.

గ‌త రెండు మ్యాచ్‌ల‌లో కె.ఎల్ రాహుల్ విఫ‌ల‌మ‌య్యాడు. మ‌రోసారి అత‌డికి ఛాన్స్ ఇస్తారా లేదా అన్న‌ది ఆస‌క్తిక‌రంగా మారింది. నెద‌ర్లాండ్స్‌తో మ్యాచ్‌లో కెప్టెన్ రోహిత్‌శ‌ర్మ‌తో పాటు సూర్య‌కుమార్ ధ‌నాధ‌న్ బ్యాటింగ్‌తో ఆక‌ట్టుకున్నాడు.

కార్తిక్‌ను ప‌క్క‌న‌పెట్టి తుది జ‌ట్టులోకి పంత్‌ను తీసుకునే అవ‌కాశాలు క‌నిపిస్తున్నాయి. పేస‌ర్లుగా భువ‌నేశ్వ‌ర్‌, అర్ష‌దీప్‌సింగ్‌, ష‌మీపైనే బౌలింగ్ భారం ఉంది. మ‌రోవైపు సౌతాఫ్రికాను కూడా త‌క్కువ‌గా అంచ‌నా వేయ‌డానికి వీలులేదు. డికాక్‌, రూసో, మార్‌క్ర‌మ్‌, మిల్ల‌ర్ లాంటి హిట్ట‌ర్ల‌తో జ‌ట్టు బ‌లంగా ఉంది.