Mahalaya pakshalu: మహాలయపక్షాల ప్రాధాన్యత ఏంటి? ఈరోజు ఏం చేయాలి?

Mahalaya pakshalu: భాద్రపద మాసంలోని శుక్లపక్షం దేవతా పూజలకు, బహుళ పక్షం పితృ దేవతా పూజకు విశిష్టమైనది అని ప్రముఖ ఆధ్యాత్మికవేత్త, పంచాంగకర్త బ్రహ్మశ్రీ చిలకమర్తి ప్రభాకర చక్రవర్తి శర్మ తెలిపారు. ఈ బహుళ నుంచి భాద్రపద మాసం బహుళ పక్షం ప్రారంభమవుతుంది. పితృదేవతలకు ఇష్టమైన పక్షం కనుక దీనిని పితృపక్షం అనంటారు. అలాగే ఈ పక్షాన్ని 'మహాలయ పక్షం' అని కూడా అంటారు.

ఈ రోజుల్లో ఎలాంటి శుభకార్యాన్నీ చేయరు. ఈ రోజు నుండి ఈ పక్షం ముగిసేంతవరకు ప్రతిరోజూ పితృదేవతలకు తర్పణ, శ్రాద్ధ విధులను నిర్వహించాలని శాస్త్రవచనం. ఒకవేళ అలా కుదరనప్పుడు తమ పితృదేవతలు ఏ తిథినాడు మృతి చెందారో, ఈ పక్షంలో వచ్చే అదే తిథినాడు శ్రాద్ధం నిర్వర్తించాలి. తండ్రి జీవించి ఉండగా తల్లిని కోల్పోయినవారైతే ఈ పక్షం నవమినాడు తర్పణ, శ్రాద్ధ విధులను ఆచరించవచ్చు అని ప్రముఖ ఆధ్యాత్మికవేత్త, పంచాంగకర్త బ్రహ్మశ్రీ చిలకమర్తి ప్రభాకర చక్రవర్తి శర్మ తెలిపారు.

ఈ పదిహేను రోజులూ నియమ పూర్వకంగా పితృదేవతలకు తర్పణాదుల ద్వారా తృప్తి కలిగించాలి. మాతాపితృ వర్జితులైన వారు ఈ పక్షాన తప్పక పితృకర్మలు చేయాలి. ప్రతి సంవత్సరం చేసే శ్రాద్ధం కన్నా, అతి ముఖ్యం ఈ పక్షం. ఈ పక్షమంతా చేయలేనివారు ఒక్క మహాలయమైనా చేసి తీరాలి. ఆ ఒక్కరోజు కూడా అన్నశ్రాద్ధం చేయలేనివారు హిరణ్య శ్రాద్ధం చేయాలి. ఏమీ చేయలేని నిష్ఠ దరిద్రుడు, అరణ్యంలోకి వెళ్లి, ముళ్లకంచెను హత్తుకొని, పితృదేవతలనుద్దేశించి కన్నీరైనా కార్చవలెనని ధర్మశాస్త్రం చెప్తోంది అని ప్రముఖ ఆధ్యాత్మికవేత్త, పంచాంగకర్త బ్రహ్మశ్రీ చిలకమర్తి ప్రభాకర చక్రవర్తి శర్మ తెలిపారు.