Sai Pallavi: నెట్‌ఫ్లిక్స్‌లో విరాటపర్వం.. ఫ్యాన్స్‌కు సాయిపల్లవి స్పెషల్ రిక్వెస్ట్‌

నెట్‌ఫ్లిక్స్‌ ఓటీటీలోకి విరాట్‌పర్వం మూవీ వచ్చేసింది. శుక్రవారమే (జులై 1) ఈ సినిమా అందుబాటులోకి వచ్చింది. గత నెల 17న రిలీజైన ఈ మూవీ ఊహించినదాని కంటే చాలా త్వరగానే ఓటీటీలోకి రావడం విశేషం. సాయిపల్లవి, రానా నటించిన ఈ సినిమాకు పాజిటివ్‌ టాక్ వచ్చినా.. బాక్సాఫీస్‌ దగ్గర మాత్రం పెద్దగా కలెక్షన్లు రాబట్టలేకపోయింది.

తెలంగాణలో 1990లనాటి నక్సలిజం బ్యాక్‌డ్రాప్‌లో వచ్చిన ఈ సినిమా ఇప్పటి యూత్‌కు పెద్దగా ఎక్కినట్లు లేదు. అన్నల్లో చేరాలనుకొని వచ్చి, వాళ్ల చేతుల్లోనే బలైన తూము సరళ అనే నిజ జీవిత పాత్ర ఆధారంగా ఈ సినిమా తెరకెక్కింది. ఇందులో ఆమె పాత్రలో సాయి పల్లవి నటించింది. ఈ సినిమాలో ఈ క్యారెక్టర్‌ పేరు వెన్నెల.

విరాట పర్వంతో తన నటనలోని మరో కోణాన్ని ఆమె చూపించింది. ఇప్పుడీ మూవీ నెట్‌ఫ్లిక్స్‌లో రిలీజైన సందర్భంగా తన ఇన్‌స్టాగ్రామ్‌ ద్వారా అభిమానులకు ఓ రిక్వెస్ట్‌ చేసింది. విరాటపర్వంలో తాను పోషించిన వెన్నెల పాత్ర తాను పోషించిన అత్యంత చిరస్మరణీయమైన పాత్రల్లో ఒకటని ఆమె చెప్పింది. ప్రస్తుతం ఈ సినిమా నెట్‌ఫ్లిక్స్‌లో స్ట్రీమింగ్ అవుతోందని, ప్రతి ఒక్కరూ ఆమె ప్రయాణాన్ని చూడాలని సాయిపల్లవి కోరింది.

ఈ సందర్భంగా విరాట పర్వం సినిమాకు సంబంధించిన కొన్ని ఫొటోలను ఆమె పంచుకుంది. అందులో కొన్ని షూటింగ్‌ స్పాట్‌కు సంబంధించినవి కూడా ఉన్నాయి. ఈ సినిమా చేసే అవకాశం తనకు ఇచ్చిన మూవీ యూనిట్‌ అందరికీ సాయిపల్లవి థ్యాంక్స్‌ చెప్పింది. వేణు ఊడుగుల ఈ సినిమాకు డైరెక్టర్‌. వెన్నెల పాత్రను ప్రేక్షకులకు దగ్గర చేయడంలో అతడు సక్సెసయ్యాడని విమర్శకుల ప్రశంసలు కూడా అందుకున్నాడు.