Neethone Dance Launch Date: స్టార్ మాలో నీతోనే డ్యాన్స్.. లాంచ్ డేట్ అనౌన్స్ చేసిన ఛానెల్

Neethone Dance Launch Date: తెలుగులోని టాప్ ఛానెల్ స్టార్ మా సరికొత్త డ్యాన్స్ రియాల్టీ షోతో ప్రేక్షకుల ముందుకు రాబోతోంది. ఈ రియాల్టీ షో పేరు నీతోనే డ్యాన్స్ (Neethone Dance). కొన్ని రోజుల కిందటే ఈ డ్యాన్స్ షోని ప్రారంభించబోతున్నట్లు స్టార్ మా అనౌన్స్ చేసింది. అయితే తాజాగా సోమవారం (జూన్ 5) ఈ రియాల్టీ షో లాంచ్ డేట్ ను కూడా వెల్లడించింది.

ఓ సరికొత్త ప్రోమోలోను తమ ట్విటర్ లో పోస్ట్ చేస్తూ నీతోనే డ్యాన్స్ లాంచ్ డేట్ ను స్టార్ మా ప్రకటించింది. ఈ రియాల్టీ షో వచ్చే ఆదివారం (జూన్ 11) సాయంత్రం 6 గంటలకు ఘనంగా ప్రారంభం కానుంది. ఆ తర్వాత ప్రతి శని, ఆదివారాలు రాత్రి 9 గంటలకు ఈ షో టెలికాస్ట్ అవనున్నట్లు కూడా స్టార్ మా తెలిపింది. ఈ కొత్త ప్రోమోలో నీతోనే డ్యాన్స్ అంటూ ఓ ప్రత్యేకమైన పాటను కూడా రూపొందించడం విశేషం.

వెల్కమ్ టు ద బిగ్గెస్ట్ డ్యాన్స్ రియాల్టీ షో అంటూ ఈ ప్రోమో ప్రారంభమవుతుంది. నాచో నాచో రే.. మన జోడీ సూపరే.. సీటీ కొట్టాలే.. నీతోనే డ్యాన్స్ అంటూ ఈ సాంగ్ లిరిక్స్ సాగిపోతుంటాయి. ఎన్నో జంటలు స్టైలిష్ స్టెప్పులతో అలరించాయి. మొదట నిఖిల్, కావ్య జోడీ స్టెప్పులేసింది. ఆ తర్వాత పవన్, అంజలి.. అమర్‌దీప్, తేజస్విని.. సందీప్, జ్యోతిరాజ్.. శివకుమార్, ప్రియాంకా.. నటరాజ్, నీతూ.. యాదమ్మ రాజు, స్టెల్లా.. సాగర్, దీపా జోడీలు స్టెప్పులేయడం చూడొచ్చు.

ఇన్నాళ్లూ సీరియల్స్ తోనే తెలుగులో టాప్ లో నిలిచిన స్టార్ మా ఛానెల్ ఇక ఇప్పుడు డ్యాన్స్ రియాల్టీ షోతోనూ అదరగొట్టడానికి సిద్ధమైంది. ఇప్పటికే ఈటీవీ, జీ తెలుగులాంటి ఛానెల్స్ లోనూ డ్యాన్స్ షోలు వస్తున్నాయి. ఇప్పుడు వాటికి పోటీగా స్టార్ మా ఈ నీతోనే డ్యాన్స్ తో రాబోతోంది. మరి ప్రేక్షకులను ఈ రియాల్టీ షో ఎంత వరకూ ఆకట్టుకుంటుందో చూడాలి.