14 hours working : ‘ఉద్యోగులు రోజుకు 14 గంటలు పనిచేయాలి'- ప్రభుత్వాన్ని కోరిన ఐటీ కంపెనీలు..

ఇప్పటికే ఉద్యోగంలో నలిగిపోయి అనేక ఆరోగ్య సమస్యలు ఎదుర్కొంటున్న ఐటీ ఉద్యోగులకు చేదు వార్త! ఉద్యోగులు ఇక నుంచి రోజుకు 14 గంటలు పని చేయాలని కర్ణాటకలోని అనేక ఐటీ సంస్థలు అభిప్రాయపడుతున్నారు. ఈ మేరకు అనుమతులు ఇవ్వాలని రాష్ట్ర ప్రభుత్వాన్ని డిమాండ్​ చేస్తున్నాయి.

రోజుకు 14 గంటల పని..!

పలు మీడియా కథనాల ప్రకారం.. కర్ణాటక షాప్స్​- కమర్షియల్​ ఎస్టాబ్లిష్​మెంట్స్​ యాక్ట్​ 1961ని సవరించేందుకు ప్రభుత్వం యోచిస్తోంది. ఈ నేపథ్యంలోనే ఉద్యోగులు ఇక నుంచి 14 గంటలు పనిచేసే విధంగా చట్టంలో సవరణలు తీసుకురావాలని ఐటీ సంస్థలు డిమాండ్​ చేస్తున్నాయి. ఇది కార్యరూపం దాల్చితే.. ఉద్యోగులు 14 గంటలు (12 గంటల పని+ 2 గంటల ఓవర్​ డ్యూటీ) పని చేయాల్సి ఉంటుంది.

"ఐటీ/ఐటీఈఎస్​/బీపీఓ సెక్టార్​లలో ఉద్యోగులు 12 గంటలకు మించి పనిచేసే విధంగా చట్టాన్ని సవరించాలి. కానీ వరుసగా 3 నెలల పాటు 125 గంటల పనిని మించకూడదు," అని ఐటీ సెక్టార్​లోని కంపెనీలు ప్రతిపాదించాయి.

ప్రస్తుతం లేబర్​ చట్టాల ప్రకారం 12గంటల (10 గంటల పని+ 2 గంటల ఓవర్​ డ్యూటీ) పాటు పని చేసేందుకే అనుమతి ఉంటుంది.

ఐటీ సెక్టార్​ ప్రతిపాదనలపై ప్రభుత్వం ఇప్పటికే చర్చలు మొదలుపెట్టిందని సమాచారం. దీనిపై త్వరలోనే ఓ నిర్ణయం తీసుకునే అవకాశం ఉంది. కేబినెట్​ సమావేశాల్లో ఈ విషయం చర్చకు రావచ్చు.

వ్యతిరేకించిన ఐటీ ఉద్యోగ సంఘాలు..

ఉద్యోగులకు 14 గంటల పనిని తీసుకురావాలని ఐటీ సంస్థలు చేసిన ప్రతిపాదనను కర్ణాటక రాష్ట్ర ఐటీ/ఐటీఈఎస్​ ఎంప్లాయీస్​ యూనియన్​ (కేఐటీయూ) వ్యతిరేకించింది. వర్కింగ్​ గంటలను పెంచితే షిఫ్ట్​ టైమింగ్స్​ పెరుగుతాయని, ఫలితంగా ఉద్యోగులను తగ్గించుకునేందుకు సంస్థ ప్రయత్నిస్తుందని అభిప్రాయపడింది.

"ప్రస్తుతం 3 షిఫ్ట్​లు ఉన్నాయి. 14 గంటల పని అంటే అది 2 షిఫ్ట్​లు అవుతుంది. ఫలితంగా మూడింట ఒక వంతు ఉద్యోగులు ఉద్యోగాలు కోల్పోతారు," అని కేఐటీయూ పేర్కొంది.

ఇలా పని గంటలను పెంచేస్తే ఉద్యోగుల మానసిక ఆరోగ్యం దెబ్బతింటుందని యూనియన్​ ఆందోళన వ్యక్తం చేసింది.

"నివేదికల ప్రకారం ఐటీ రంగంలోని 45శాతం మంది ఉద్యోగుల మానసిక ఆరోగ్యం బాలేదు. 55శాతం భౌతికంగా అనారోగ్యంతో ఉన్నారు. పని గంటలు పెంచితే, ఈ సమస్యలు మరింత పెరుగుతాయి," అని యూనియన్​ ఓ ప్రకటన విడుదల చేసింది.

రాష్ట్రం, ఐటీ కంపెనీలు.. ఉద్యోగులను మనుషులుగా కాకుండా, గంటల తరబడి పనిచేసే మెషిన్​లుగా పరిగణిస్తున్నాయని యూనియన్​ ఆగ్రహం వ్యక్తం చేసింది. ఐటీ సంస్థల ప్రతిపాదనను అస్సలు అంగీకరించకూడదని తేల్చిచెప్పింది.

"ఉద్యోగులను మనుషులగా పరిగణించేందుకు కర్ణాటక ప్రభుత్వం సిద్ధంగా లేదని తాజా పరిణామాలు సూచిస్తున్నాయి. ఉద్యోగుల వ్యక్తిగత జీవితాన్ని పరిగణించడం లేదు. కార్పొరేట్​ సంస్థలకు లాభాలను తెచ్చిపెట్టే మెషిన్​లుగానే చూస్తున్నారు," అని యూనియన్​ తెలిపింది.

వాస్తవానికి ఐటీ సెక్టార్​లో జీతాలతో పాటు పని గంటల సమయం కూడా అధికంగానే ఉంటుంది. చాలా మందికి లాగిన్​ అయిన తర్వాత ఎప్పుడు లాగౌట్​ అవుతారో కూడా తెలియడం లేదు. ఇప్పుడే పరిస్థితి ఇలా ఉంది! ఇక 14 గంటల పని అంటే.. ఉద్యోగుల ఆరోగ్యం దెబ్బతినే అవకాశాలే ఎక్కువ.

మరి ఈ 14 గంటల పని ప్రతిపాదనపై మీరేం అంటారు?