Tuesday Motivation : బంధంలో వాస్తవాన్ని అంగీకరించాలి.. అప్పుడే జీవితంలో ఆనందం

మనసును అద్దంతో పోలుస్తారు. పగిలిన అద్దాన్ని చక్కదిద్దలేనట్లే, విరిగిన మనసును సరిదిద్దడం కూడా చాలా కష్టం. అలా అయితే సమస్యల నుంచి బయటపడాలి అంటే వాస్తవాన్ని అంగీకరించాలి. అప్పుడే జీవితం బాగుంటుంది. లేదంటే అనవసర సమస్యల్లో ఇరుక్కుంటారు. మానసికంగా దెబ్బతింటారు.

మీరు చాలా అనుబంధంగా ఉన్న వ్యక్తి మీ గురించి పట్టించుకోకపోతే మీరు చాలా నిరాశ చెందుతారు. అప్పుడే ఎమోషనల్ గా డిస్టర్బ్ అవుతారు. మీరు సున్నితమైన వ్యక్తి అయితే, మీరు కొన్ని సంబంధాల విషయంలో జాగ్రత్తగా ఉండటం మంచిది.

జీవితంలో కొన్ని విషయాలు మనకు నచ్చినట్లుగా పనిచేసినప్పటికీ, కొన్ని విషయాలు మన ఇష్టానుసారంగా లేదా మన కోరిక మేరకు జరగకపోవచ్చు. మనకే జరుగుతాయని మీరు అనుకోకూడదు. చాలా మందికి ఇలానే జరుగుతుంది. అయితే తక్కువ మంది మాత్రం రియాలిటీని యాక్సెప్ట్ చేస్తారు. కఠినమైన వాస్తవాలను మనం ఎంత చక్కగా ఎదుర్కొంటాం అనేది చాలా ముఖ్యం.

ఈ విరుద్ధమైన వాస్తవాలు మనం మరింత శక్తితో జీవితంలో ముందుకు సాగడానికి సహాయపడతాయి. సంబంధాల విషయానికి వస్తే మనలో చాలామంది వాస్తవికతను అంగీకరించడానికి ఇష్టపడరు. మన జీవితాలను గందరగోళానికి గురి చేస్తూ బతుకుతారు. నిజాన్ని ఒప్పుకోరు. నేను ప్రేమించిన వ్యక్తి చాలా మంచివారు అని చెబుతారు. అవతలివారు మనసులో ఏముందో మాత్రం గ్రహించరు. దీనితో మానసికంగా కుంగిపోతారు.

సంబంధంలో భాగస్వామి నుండి కొన్ని అంచనాలు ఉండటం సహజం. కానీ ఈ ఆలోచనలో ఏదైనా సమస్య ఉంటే మన భారీ అంచనాల వల్ల చాలా నిరాశలు ఎదురవుతాయి. మీరు మీ అంచనాలను తగ్గించగలిగితే, మీరు నిరాశ చెందే అవకాశం కూడా తక్కువగా ఉంటుంది. సాధ్యమైనంతవరకు సంబంధంలో వాస్తవికతను గుర్తించండి. తప్పుడు అంచనాల నుండి బయటపడుతారు. పెద్దగా బాధపడరు.

ప్రేమ బంధం బలంగా ఉన్నప్పుడు ప్రతిదీ సాధారణంగా జరుగుతుంది. కానీ రిలేషన్ షిప్ లో ప్రేమ లోపిస్తే ఎంత అరిచినా, కేకలు వేసినా ఏమీ జరగదు. మీరు సంబంధంలో ఉన్నప్పుడు, మీకోసం ప్రేమించిన వారి నుంచి పెద్దగా రెస్పాన్స్ లేనప్పుడు మీరు గుర్తుంచుకోవలసిన విషయం ఇది. మీరు మీ భాగస్వామిపై డిమాండ్లు చేయడం ప్రారంభించే ముందు ఈ కఠినమైన వాస్తవాన్ని గ్రహించాలి.

ఏ బంధమైనా దాని పరిమితులు ఉంటాయి. మీరు ఎదుటివారిని కొనుగోలు చేసినట్టుగా ఫీల్ అవ్వకూడదు. వారిపై అన్ని హక్కులు మీకే ఉన్నాయని భ్రమలో ఉండకూడదు. మీ భాగస్వామిని, అలాగే వారి వ్యక్తిత్వాన్ని గౌరవించడం అలవాటు చేసుకోవాలి. సంబంధంలో మీ పాత్ర గురించి మీకు మంచి అవగాహన ఉండాలి. దానిని ఎలా సరిగ్గా నిర్వహించాలో తెలుసుకోవాలి. అప్పుడే ఆనందంగా ఉంటారు.

సంబంధాలు సహజంగా ప్రారంభమవుతాయి, కానీ ముగియడం మాత్రం అసహజంగానే జరుగుతుంది. కొన్ని సంబంధాలు జీవితాంతం ఉంటాయి. మరికొన్ని అనుకున్నదానికంటే త్వరగా ముగుస్తాయి. అందువల్ల, సంబంధంలో అసూయపడటం లేదా అభద్రతాభావంతో బాధపడటంలో అర్థం లేదు. ఎందుకంటే నీకు చెందినది ఎప్పుడూ నీదే, నీది కానిది ఏదో ఒకరోజు జారిపోవాల్సిందే..