Panakam Recipe । చలువ గుణాల పానకం.. ఇది రామ నవమికి ప్రత్యేక పానీయం!

Sri Rama Navami 2023: ప్రతి పండగకు ఏదో ఒక ప్రత్యేకత ఉన్నట్లే, ఆ పండగ కోసం చేసుకునే కొన్ని సాంప్రదాయ వంటకాలు కూడా ప్రత్యేకంగా ఉంటాయి. వీటిని దైవుడికి నైవేద్యంగా సమర్పిస్తారు, అనంతరం ప్రసాదంగా స్వీకరిస్తారు. ఈరోజు శ్రీరామ నవమి , ఇది హిందువులకు అత్యంత పవిత్రమైన పండగ. శ్రీరామ నవమి రోజున దేవుడికి నైవైద్యంగా 'పానకం' తయారు చేస్తారు. ఈ పానకం అనేది చలువ గుణాలు కలిగిన ఒక పానీయం.

సాధారణంగా శ్రీరామ నవమి ఎండాకాలంలో వస్తుంది. ఈ సమయంలో చలువ గుణాలు ఉండే ఈ పానకం (Summer Refreshing Drink)తాగడం ద్వారా వేసవి వేడి నుంచి బయటపడవచ్చు. పానకంను నిమ్మరసం, అల్లం, బెల్లం, ఏలకులు, మిరియాలు వంటి సుగంధ ద్రవ్యాలను ఉపయోగించి చేస్తారు. దీంతో ఇది రుచిగా ఉండటమే కాకుండా, ఎంతో ఆరోగ్యకరమైన పానీయం కూడా. ఈ పానకం తాగడం ద్వారా అమ్మవారు పోయడం లేదా చికెన్ పాక్స్ వంటి సమస్యలు రాకుండా చేస్తుంది. పానకం మీకు మీరుగా ఇంట్లోనే సులభంగా చేసుకోవచ్చు, పానకం రెసిపీని ఈ కింద చూడండి.

Panakam Recipe కోసం కావలసినవి

• 1/2 కప్పు బెల్లం - తరిగినది
• 2-3 కప్పుల నీరు
• 1/4 టీస్పూన్ శొంఠి
• చిటికెడు నల్ల మిరియాల పొడి
• 1/2 టీస్పూన్ పచ్చి ఏలకుల పొడి
• 2 టేబుల్ స్పూన్లు నిమ్మరసం
• 1 చిటికెడు ఉప్పు
• 1 చిటికెడు కర్పూరం (తినదగినది, ఐచ్ఛికం)
• 4 - 5 తాజా తులసి ఆకులు
• ఐస్ క్యూబ్స్ - ఐచ్ఛికం

పానకం ఎలా చేయాలి?

1. ముందుగా ఒక గిన్నెలో నీరు తీసుకొని అందులో బెల్లం వేయండి, అది కరిగేపోయేంతవరకు నీటిలో నాననివ్వండి.
2. బెల్లం నీటిలో కరిగాక ఆ సిరప్‌ను వడకట్టి మలినాలను ఫిల్టర్ చేయండి.
3. ఇప్పుడు సిరప్‌లో నిమ్మరసం కలపండి.
4. ఆ తరువాత శొంఠి పొడి, పచ్చి యాలకుల పొడి, నల్ల మిరియాల పొడి, ఉప్పు, కర్పూరం వేసి బాగా కలపాలి.
5. చివరగా తులసి ఆకులను పైనుంచి కలపండి.

అంతే, సాంప్రదాయమైన పానకం రెడీ. దీనిని మీరు ఈ ఎండాకాలంలో ఎప్పుడైనా చేసుకొని తాగవచ్చు. మీరు ఈ పానకంలో కొన్ని ఐస్ క్యూబ్‌లను వేసి రుచిని ఆస్వాదిస్తూ రిఫ్రెష్ అవ్వొచ్చు.