First Class in train: ఫ్లైట్ టిక్కెట్‌తో సమానంగా ట్రైన్ ఫస్ట్ క్లాస్ టిక్కెట్ ధర ఎందుకు? ఈ వసతులే కారణం

రైలు ప్రయాణం ఎంత సేపు చేసినా బోర్ కొట్టదు. ఆ ప్రయాణంలో ఏదో సరదా, ప్రశాంతత ఉంటాయి. ఇక రైళ్లలోని ఫస్ట్ క్లాస్ బోగీలు ఈ ప్రయాణాన్ని మరింత ఆహ్లాదకరంగా మారుస్తాయి. వీటి ధర కాస్త ఎక్కువే ఉంటుంది. అంతెందుకనే ప్రశ్న మీకూ ఉంటే వీటి వసతుల గురించి తెల్సుకోవాల్సిందే.

భారత్ లో కొన్ని రూట్లలోని రైళ్లలో మాత్రమే ఏసీ ఫస్ట్ క్లాస్ బోగీలు ఉంటాయి. ఇందులో మెట్రోపాలిటన్ నగరాలు కూడా ఉన్నాయి. ఈ బోగీల్లో చాలా సౌకర్యాలు ఉంటాయి. వీటిలో ప్రయాణం మరింత సౌకర్యంగా, సురక్షితంగానూ ఉంటుంది. మీరు ఇంకా ఈ బోగీలలో ప్రయాణించకపోతే, అందులో అందుబాటులో ఉన్న ఈ సౌకర్యాల గురించి ఖచ్చితంగా తెల్సుకోవాల్సిందే.

పరిశుభ్రత:

ఏసీ ఫస్ట్ క్లాస్ బోగీల్లో పరిశుభ్రత చాలా ఎక్కువగా ఉంటుంది. సిట్టింగ్ సీటు నుంచి టాయిలెట్ వరకు చాలా శుభ్రంగా ఉంటాయి. దీన్ని మీరు ఎప్పుడు కావాలంటే అప్పుడు సౌకర్యవంతంగా ఉపయోగించుకోవచ్చు.

ప్రైవసీ:

ఫస్ట్ క్లాస్ క్యాబిన్‌లో ప్రైవసీ కూడా దొరుకుతుంది. మీరు మీ పిల్లలు లేదా భాగస్వామితో ప్రయాణిస్తుంటే, భద్రత, గోప్యత విషయాల్లో ఇలాంటి బోగీలు మంచివి. వీటి వల్ల సుదీర్ఘ ప్రయాణం కూడా హాయిగా గడిచిపోతుంది.

ఆహారం:

ఆహారం, పానీయాల ధర ఫస్ట్ క్లాస్ కోచ్ టికెట్‌తో పాటే కలిపి ఉంటుంది. అందుకే ఉచిత ఆహారం, పానీయాలు లభిస్తాయి. వీటితో మొత్తం ప్రయాణాన్ని ఆస్వాదిస్తారు. ఉదయం టీ, బిస్కెట్ల నుంచి పకోడీలు, శాండ్ విచ్ లతో పాటూ మరిన్ని ఆహారాలను కూడా కూడా ఈ మెన్యూలో చేరుస్తారు. అల్పాహారం, స్నాక్స్ లో కూడా మీరు వెరైటీ ఆప్షన్లుంటాయి. వీటితో పాటు లంచ్, డిన్నర్ కూడా ఉంటాయి.

డెజర్ట్:

ఫస్ట్ క్లాస్ కంపార్ట్ మెంట్లలో డెజర్ట్ కూడా ఉంటుందని మర్చిపోవద్దు. ఐస్ క్రీం నుండి గులాబ్ జామూన్ వరకు లభిస్తాయి. కాబట్టి ఈ ప్రయాణ అనుభూతి చాలా ప్రత్యేకమైనది.

సౌకర్యం:

ఎసి ఫస్ట్ క్లాస్ బోగీల సీట్లు మిగిలిన బోగీల సీట్ల కంటే మరింత సౌకర్యవంతంగా, విశాలంగా, మృదువుగా ఉంటాయి. ఇది కూర్చోవడానికి, పడుకోవడానికి చాలా సౌకర్యాన్ని ఇస్తుంది.

పెంపుడు జంతువులు:

మీ పెంపుడు కుక్క లేదా పిల్లి ఉంటే, మీ పెంపుడు జంతువులను కూడా మొదటి తరగతి కంపార్ట్మెంట్లో తీసుకెళ్లవచ్చు. అయితే ఈ విషయంలో ఇతర ప్రయాణీకుల సౌకర్యం పట్ల శ్రద్ధ వహించాలి.

సీటింగ్:

రైలులోని ఫస్ట్ క్లాస్ బోగీలో సీటింగ్ అమరిక మిగతా బోగీల కంటే భిన్నంగా ఉంటుంది. ఇందులో ఇద్దరు, నలుగురు కూర్చునేందుకు వీలుగా సీటింగ్ ఏర్పాటు చేశారు. దీన్నే కూపే అంటారు. మిగతా బోగీల్లాగా ఈ రైలు టికెట్ లో సీటు నంబర్లు ముందుగా రాయరు. బుకింగ్ అయ్యాక తర్వాత సీట్ నంబర్ కన్ఫర్మ్ చేస్తారు. ముందుగా వీఐపీలకు ఈ బోగీల్లో సీట్లు ఇస్తారు. ఆ తర్వాత మిగిలిన వారికి సీట్లు కేటాయిస్తారు.