Air Pollution in Winter । చలికాలంలో కాలుష్యం, పొగమంచుతో జర భద్రం.. ఈ జాగ్రత్తలు తప్పనిసరి!

భారతదేశంలో ఇతర సీజన్ లతో పోలిస్తే శీతాకాలం కాస్త ఆహ్లాదకరంగానే ఉంటుంది. వెచ్చని స్వెటర్ లు, పొడవాటి హుడీ జాకెట్లు, హిమపాతంలో అడ్వెంచర్లు, విహారయాత్రలకు ఇది చాలా మంచి సీజన్. అదే సమయంలో ఈ సీజన్ కొన్ని కష్టనష్టాలను కలిగిస్తుంది.

ముఖ్యంగా వాయు కాలుష్యం అనేది ఈ కాలంలో ఇబ్బంది పెట్టే ప్రధాన సమస్య. ఈ గాలి కాలుష్యం అనేది ఏడాది పొడవునా ఉంటుంది, అయితే శీతాకాలంలో మాత్రం దీనితో ప్రమాదం ఎక్కువ ఉంటుంది. ఎందుకంటే ఈ సీజన్ లో వాతావరణం చల్లగా, పొడిగా ఉంటుంది. ఈ చల్లని గాలి, వేసవిలో వీచేటు వంటి వేడి గాలుల కంటే నెమ్మదిగా కదులుతుంది. అలాగే మగమంచు కారణంగా గాలి మరింత దట్టంగా మారి కాలుష్య కారకాలను పట్టుకొని ఉంటుంది. దీనివల్ల వీచే గాలి అంతా చాలావరకు కాలుష్య కారకాలతో నిండి ఉంటుంది.

ఈ గాలిని పీల్చడం వలన శ్వాస సంబంధ సమస్యలు ఎక్కువవుతాయి. ఉబ్బసం, జలుబు, దగ్గు, బ్రోంకైటిస్, న్యుమోనియా, ఊపిరితిత్తుల ఫైబ్రోసిస్, హృదయ సంబంధ సమస్యలు తలెత్తుతాయి. ఆస్తమా ఉన్నవారికి ఇంకా కష్టంగా ఉంటుంది.

శీతాకాలపు పొగమంచు తల నుండి కాలి వరకు మానవ శరీరంపై ప్రభావం చూపుతుంది. ఈ పొగమంచుతో అంటువ్యాధులు, స్ట్రోక్, ఛాతీ నొప్పి, ఉబ్బసం, కంటి సమస్యలు, ముక్కు సమస్యలు, గొంతులో చికాకు మొదలుకొని క్రానిక్ అబ్స్ట్రక్టివ్ పల్మనరీ డిసీజ్ (COPD), ఊపిరితిత్తుల క్యాన్సర్, ఎంఫిసెమాకు వంటి తీవ్రమైన అనారోగ్యాలకు దారితీస్తుంది. అంతిమంగా, ఈ అనారోగ్యాలు ఊపిరితిత్తులను దెబ్బతీసి, మరణాల రేటును పెంచుతాయి. ఇప్పటికే ఊపిరితిత్తుల సమస్యలు ఉన్నవారు, గర్భిణీ స్త్రీలు, వృద్ధులు ఈ శీతాకాలంలో బయట తిరగేటపుడు చాలా జాగ్రత్తలు తీసుకోవాలి.

Winter Air Pollution Precautions- శీతాకాలంలో శ్వాసకోశ సమస్యలను ఎలా అధిగమించాలి

• చలికాలంలో మీ ఊపిరితిత్తులను ఆరోగ్యంగా, ఇన్ఫెక్షన్లు సోకకుండా ఉంచడానికి ఫ్లూ, న్యుమోనియా వ్యాక్సిన్‌ను తీసుకోవడం ఉత్తమం.
• పొగమంచు, వాయు కాలుష్యం ఎక్కువగా ఉన్నట్లయితే, బయటకు వెళ్లకండి. మార్నింగ్ వాక్, ఇతర వ్యాయామాలను బయట కాకుండా ఇండోర్ కే పరిమితం చేయండి.
• బయటకు వెళ్లాల్సి వస్తే మాస్క్ ధరించడం మరిచిపోవద్దు. కరోనా, పొగమంచు, కాలుష్యం దుష్ప్రభావాల నుండి కూడా మిమ్మల్ని రక్షించుకోవడానికి మాస్క్ తప్పనిసరి.
• మీ ఇంటిని ప్రతిరోజూ శుభ్రం చేసుకోండి. దుమ్ము, అలెర్జీ కారకాలు లేకుండా ఇంటిని వాక్యూమ్ క్లీన్ చేయండి.
• పరుపులు, రగ్గులు, తివాచీలు ఉతకండి, ఫర్నిచర్, కిటికీ కర్టెన్లను క్రిమిసంహారకం చేయండి.
• స్వచ్ఛమైన గాలి పీల్చుకోవడానికి ఇంట్లో ఎయిర్ ప్యూరిఫైయర్ లేదా ఎయిర్ హ్యూమిడిఫైయర్‌ని సెట్ చేయండి.
• తగినంత నీరు తీసుకోవడం వల్ల మీ వాయుమార్గాలు శుభ్రంగా , స్పష్టంగా ఉంటాయి. ఆస్తమా రోగులు, ఇన్ హేలర్ ఎల్లప్పుడూ అందుబాటులో ఉంచుకోండి.
• మీ చేతులను శుభ్రంగా ఉంచుకోండి. మురికి చేతులతో మీ నోరు, ముక్కు లేదా కళ్లను తాకవద్దు. పొగత్రాగ వద్దు, చలికాలంలో పొగత్రాగడం వలన గొంతు అలర్జీలు, ఊపిరి సమస్యలు ఎక్కువవుతాయి.
• యాపిల్, గ్రీన్ లీఫీ వెజిటేబుల్స్, వాల్‌నట్స్, కివీ, క్యాబేజీ, బీన్స్, బెర్రీలు, బ్రోకలీ, బొప్పాయి, పైనాపిల్, క్యారెట్, పసుపు , అల్లం వంటి పదార్థాలు ఆహారంలో చేర్చుకుంటే అవి ఊపిరితిత్తులకు మంచివి, రోగనిరోధక శక్తిని మెరుగుపరుస్తాయి.

జాగ్రత్తగా ఉండండి, ఆరోగ్యకరమైన జీవనశైలిని కలిగి ఉండండి. ఆరోగ్యంగా ఉన్నప్పుడే ఆనందం ఉంటుందని గ్రహించండి.