Kannappa Release: కన్నప్ప రిలీజ్ ఎప్పుడో చెప్పేసిన మంచు విష్ణు.. ఆ సినిమాలపై ఎఫెక్ట్ పడుతుందా?

భారీ బడ్జెట్‍తో చాలా మంది స్టార్ నటులతో రూపొందుతున్న కన్నప్ప చిత్రంపై చాలా అంచనాలు ఉన్నాయి. ఈ మైథలాజికల్ ఫ్యాంటసీ మూవీలో మంచు విష్ణు టైటిల్‍ రోల్‍లో ప్రధాన పాత్ర పోషిస్తున్నారు. పాన్ ఇండియా రెబల్ స్టార్ ప్రభాస్, బాలీవుడ్ హీరో అక్షయ్ కుమార్, మలయాళ సూపర్ స్టార్ మోహన్‍లాల్, కన్నడ స్టార్ శివ రాజ్ కుమార్ కూడా కీలకపాత్రలు చేస్తుండటంతో కన్నప్ప చిత్రంపై దేశవ్యాప్తంగా హైప్ ఉంది. దీంతో ఎప్పుడు ఈ చిత్రం రిలీజ్ అవుతుందా అనే ఆసక్తి నెలకొంది. ఈ తరుణంలో కన్నప్ప రిలీజ్‍పై హీరో మంచు విష్ణు నేడు (జూలై 18) అప్‍డేట్ ఇచ్చారు.

డిసెంబర్‌లో..

కన్నప్ప సినిమాను ఈ ఏడాది డిసెంబర్‌లో రిలీజ్ చేయాలని అనుకుంటున్నట్టు మంచు విష్ణు నేడు ట్వీట్ చేశారు. “డిసెంబర్ 2024 కన్నప్ప, హరహర మహాదేవ్” అని ఆయన పోస్ట్ చేశారు. అయితే, డిసెంబర్‌లో ఏ తేదీ అన్నది మాత్రం చెప్పలేదు. నెల మాత్రమే వెల్లడించారు.

పుష్ప 2పై కన్ను!

స్టార్ డైరెక్టర్ సుకుమార్ దర్శకత్వంలో ఐకాన్ స్టార్ అల్లు అర్జున్ హీరోగా నటిస్తున్న పుష్ప 2 చిత్రం డిసెంబర్ 6వ తేదీన రిలీజ్ కావాల్సి ఉంది. ఆగస్టు 15న రావాల్సిన ఈ చిత్రం డిసెంబర్‌కు వెళ్లింది. అయితే, ఈ చిత్రంపై ప్రస్తుతం చాలా పుకార్లు వస్తున్నాయి. అల్లు అర్జున్, సుకుమార్ మధ్య విభేదాలతో షూటింగ్ ఆలస్యమవుతోందంటూ రూమర్లు చక్కర్లు కొడుతున్నాయి. దీంతో డిసెంబర్లో అయినా పుష్ప 2 వస్తుందా అనే సందేహాలు వ్యక్తమవుతున్నాయి. అయితే, మూవీ టీమ్ మాత్రం చెప్పినట్టు డిసెంబర్ 6న కచ్చితంగా పుష్ప 2 వస్తుందని చెబుతోంది. ఒకవేళ పుష్ప 2 వాయిదా పడితే ఆ డేట్‍కు రావాలని కూడా కన్నప్ప టీమ్ ఆలోచన. అందుకే ఇప్పుడు డేట్‍ను వెల్లడించలేదని ఇండస్ట్రీ వర్గాల టాక్.

మూడో వారమైతే ఈ సినిమాలపై ఎఫెక్ట్

పుష్ప 2 చిత్రం అనుకున్న డేట్‍కు రిలీజ్ అయితే డిసెంబర్ మూడో వారాన్నే కన్నప్ప టార్గెట్ చేసే అవకాశం ఉంది. క్రిస్మస్, న్యూఇయర్ సీజన్ కలిసి వచ్చేలా డిసెంబర్ 19 లేకపోతే 20వ తేదీన రిలీజ్ చేసే ప్లాన్ చేయవచ్చు. అయితే, ఇప్పటికే నాగచైతన్య ‘తండేల్’, నితిన్ ‘రాబిన్‍హుడ్’ డిసెంబర్ మూడో వారంలో వచ్చేందుకు డిసైడ్ అయ్యాయి. ఒకవేళ కన్నప్ప చిత్రం అప్పుడే రావాలనుకుంటే ఆ సినిమాలపై ప్రభావం పడుతుంది. ఆ చిత్రాలు రిలీజ్ ప్లాన్‍ను మార్చుకునే అవకాశం కూడా ఉంటుంది.

బాబీ కొల్లి దర్శకత్వంలో బాలకృష్ణ హీరోగా నటిస్తున్న మూవీ కూడా డిసెంబర్‌లోనే రావాలనుకుంటున్నట్టు టాక్. మొత్తంగా డిసెంబర్ రేసులో కన్నప్ప ఎంటర్ అవడంతో పరిస్థితులు హీటెక్కేశాయి. ఏం జరుగుతుందో చూడాలి.

కన్నప్ప చిత్రంలో ప్రభాస్ ఉండటంతో పాన్ ఇండియా రేంజ్‍లో క్రేజ్ ఉండడం ఖాయంగా కనిపిస్తోంది. శివుడి పరమభక్తుడైన కన్నప్ప పాత్రను మంచు విష్ణు పోషిస్తున్నారు. ఈ చిత్రానికి ముకేశ్ కుమార్ సింగ్ దర్శకత్వం వహిస్తున్నారు. మంచు మోహన్ బాబు ఈ మూవీని భారీ బడ్జెట్‍తో రూపొందిస్తున్నారు. మంచు ఫ్యామిలీకి కన్నప్ప చిత్రం చాలా కీలకంగా ఉంది.