Maruti Suzuki e Vitara : సింగిల్​ ఛార్జ్​తో 400కి.మీ రేంజ్​- మారుతీ సుజుకీ తొలి ఈవీపై కీలక అప్డేట్​..

మారుతీ సుజుకీ తొలి ఎలక్ట్రిక్​ కారు అయిన ఈ విటారాకు సంబంధించిన కీలక అప్డేట్​! ఈ ఈవీ ప్రొడక్షన్ వర్షెన్​ని.. జనవరిలో జరగనున్న భారత్ మొబిలిటీ గ్లోబల్ ఎక్స్​పో 2025లో ప్రదర్శించనున్నారు. సుజుకీ ఈ విటారా మిలాన్​లో జరిగిన ఒక అంతర్జాతీయ ఈవెంట్​లో మొట్టమొదటిసారి గ్లోబల్ అరంగేట్రం చేసింది. ఇప్పటివరకు ఈవీఎక్స్​గా పిలిచిన ఈ మారుతీ సుజుకీ ఈ విటారాను 2025 మధ్య నాటికి భారత మార్కెట్​లో సంస్థ విడుదల చేస్తుందని తెలుస్తోంది.

మరోవైపు కొత్త ఛార్జింగ్ స్టేషన్లను ప్రారంభించనున్నట్లు మారుతీ సుజుకీ ప్రకటించింది. ఇందులో హోమ్ ఛార్జింగ్ సొల్యూషన్స్​తో పాటు మారుతీ సుజుకీ డీలర్​షిప్ లు, సర్వీస్ టచ్ పాయింట్ల వద్ద లభించే ఫాస్ట్ ఛార్జర్ల దేశవ్యాప్త నెట్​వర్క్ కూడా ఉంటుంది. 

మారుతీ సుజుకీ ఇండియా లిమిటెడ్ మార్కెటింగ్ అండ్​ సేల్స్ సీనియర్ ఎగ్జిక్యూటివ్ ఆఫీసర్ పార్థో బెనర్జీ మాట్లాడుతూ.. “ఎలక్ట్రిక్ వాహనాలను అందుబాటులో, సౌకర్యవంతంగా, విస్తృత వినియోగదారులను ఆకర్షించడమే మా లక్ష్యం. ఈ విటారాతో మేము ఇదే సాధించాలని నిర్ణయించుకున్నాము,” అని అన్నారు.

మారుతీ సుజుకీ ఈ విటారా- ప్లాట్​ఫామ్​..

మారుతీ సుజుకీ ఈ విటారా ఎలక్ట్రిక్​ వాహనాన్ని హార్ట్​టెక్-ఈ అని పిలిచే ప్లాట్​ఫామ్​పై నిర్మించారు. ఇది బ్యాటరీ ఎలక్ట్రిక్ వాహనాల కోసం ప్రత్యేకంగా తయారైంది. ఈ ప్లాట్​ఫామ్​ అధిక-వోల్టేజ్ రక్షణ, కాంపాక్ట్ ఓవర్ హాంగ్​ను ఉన్న తేలికపాటి ఫ్రేమ్​వర్క్​ను కలిగి ఉంది. ఇది ఇంటీరియర్​ను సులభతరం చేస్తుంది.

మారుతీ సుజుకీ ఈ విటారా- డైమెన్షన్స్​..

మారుతీ సుజుకీ ఈ విటారా ఎలక్ట్రిక్​ ఎస్​యూవీ పొడవు 4,275 ఎంఎం. వెడల్పు 1,800 ఎంఎం, ఎత్తు 1,635 ఎంఎం. ఇది 2,700 ఎంఎం పొడవైన వీల్​బేస్​ని కలిగి ఉంది. ఎంచుకున్న వేరియంట్​ను బట్టి 18-ఇంచ్​ లేదా 19-ఇంచ్​ అల్లాయ్ వీల్స్​పై ఈ ఈవీ ప్రయాణిస్తుంది. ఇది 180 ఎంఎం గ్రౌండ్ క్లియరెన్స్, 5.2 మీటర్ల టర్నింగ్ రేడియస్ కలిగి ఉంది.

మారుతీ సుజుకీ ఈ విటారా- ఇంజిన్​, బ్యాటరీ..

ఈ విటారా ఎలక్ట్రిక్​ ఎస్​యూవీ.. ప్రపంచవ్యాప్తంగా రెండు బ్యాటరీ ప్యాక్ ఆప్షన్స్​తో లభిస్తుంది. అవి.. 49 కిలోవాట్, 61 కిలోవాట్. భారతీయ వినియోగదారులకు ఈ రెండు ఆప్షన్స్​ లభిస్తాయో లేదో చూడాలి. ఇక ఈ కారును ఒక్కసారి ఛార్జ్ చేస్తే 400 కిలోమీటర్లు రేంజ్​ని అందిస్తుందని తెలుస్తోంది. 49 కిలోవాట్ల బ్యాటరీ 142బీహెచ్​పీ పవర్, 189ఎన్ఎమ్ టార్క్ ప్రొడ్యూస్ చేస్తుంది. 2 డబ్ల్యూడీ మోడల్​లో 61 కిలోవాట్ల బ్యాటరీ 172 బీహెచ్​పీ పవర్, 189 ఎన్ఎమ్ టార్క్​ను జనరేట్​ చేస్తుంది. ఇది 300 ఎన్ఎమ్ టార్క్​ను ఉత్పత్తి చేస్తుంది. లిథియం ఐరన్-ఫాస్ఫేట్ బ్యాటరీలతో పాటు మోటారు. ఇన్వర్టర్లను అనుసంధానించే అత్యంత సమర్థవంతమైన ఈయాక్సిల్​తో ఇంజిన్​ తయారైందని సుజుకీ తెలిపింది.