Tomato salan: నోరూరించే టమాటా సాలన్

టమాటా కూరంటే ఇంట్లో ఏ కూరగాయలూ లేనప్పుడోె, లేదా సమయం లేనప్పుడో చేస్తుంటాం. కానీ టమాటాతో కూడా అదిరిపోయే మసాలా కూర చేయొచ్చు. అదే టమాటా సాలన్. ఇది బిర్యానీ లోకి కూడా పులపుల్లగా చాలా బాగుంటుంది. ఒకసారి ప్రయత్నించి చూడండి.

కావాల్సిన పదార్థాలు:

4 టమటాలు (ఒక్కోటి రెండు ముక్కలు చేసుకోవాలి)

3 చెంచాల పల్లీలు

1 చెంచా నువ్వులు

2 చెంచాల కొబ్బరి తురుము

సగం చెంచా ధనియాలు

1 చెంచా జీలకర్ర

3 కప్పుల నీళ్లు

31 చెంచాల నూనె

సగం చెంచా ఆవాలు

కొద్దిగా ఇంగువః

చిన్న ఉల్లిపాయ తరుగు

10 వెల్లుల్లి

సగం చెంచా పసుపు

1 చెంచా కారం పొడి

1 చెంచా గరం మసాలా

1 చెంచా ఉప్పు

1 రెమ్మ కరివేపాకు

2 పచ్చిమిర్చి

సగం కప్పు చింతపండు గుజ్జు

కొద్దిగా కొత్తిమీర

తయారీ విధానం:

1. ముందుగా ఒక ప్యాన్ లో నూనె లేకుండా పల్లీలు వేయించుకోండి. నువ్వులు, కొబ్బరి తురుము, ధనియాలు, జీలకర్ర కూడా వేసుకుని వేయించుకోవాలి.
2. సగం కప్పు నీల్లు పోసుకుని మసాలాలన్నీ మెత్తగా మిక్సీ పట్టుకోవాలి.
3. ఒక ప్యాన్ లో 2 చెంచాల నూనె తీసుకుని, చెంచా ఆవాలు, ఇంగువ, జీలకర్ర, ఉల్లిపాయముక్కలు, వెల్లుల్లి వేసి వేగనివ్వండి.
4. కాసేపయ్యాక పసుపు, కారం, గరం మసాలా, ఉప్పు కూడా వేసుకోండి. ఇపుడు మిక్సీ పట్టుకున్న మసాలా పేస్ట్ వేసుకోండి.
5. నూనె తేలేదాక వేగనిచ్చి, ఇపుడు రెండు కప్పుల నీళ్లు, చిన్న బెల్లం ముక్క వేసుకోండి. పదినిమిషాలు ఉడకనిచ్చి టమాటా ముక్కలు, చింతపండు గుజ్జు వేసుకుని 5 నిమిషాలు మూత పెట్టి ఉడకనివ్వాలి.
6. చివరగా టమటాలు మగ్గాక రెండు స్పూన్ల కొత్తిమీర వేసుకుని దించేసుకుంటే చాలు. టమాటా సాలన్ రెడీ. బిర్యానీ లోకి, చపాతీ లోకి చాలా బాగుంటుంది.