moongdal dhokla: పొట్టు పెసరపప్పుతో.. డోక్లా

శనగపిండితో చేసే దోక్లా, లేదంటే బయట దొరికే ఇన్స్ట్ంట్ దోక్లా కన్నా ఇంట్లోనే ఆరోగ్యకరంగా చేసుకునే పొట్టు పెసరపప్పు దోక్లా తయారీ చూసేయండి. నూనె లేకుండా ఆవిరి మీద ఉడికించి చేసే ఈ గుజరాతీ అల్పాహారం ఎంతో ఆరోగ్యకరం. పిండిని ఆవిరి మీద ఉడికించి ఉల్లిపాయ ముక్కల తాలింపుతో దీన్ని వడ్డిస్తారు.మామూలుగా డోక్లాను శనగపిండితో చేస్తారు. కానీ ఇంకాస్త ఆరోగ్య కరంగా చేయడానికి శనగపిండికి బదులుగా పొట్టు పెసరపప్పును వాడుతున్నాం.

కావాల్సిన పదార్థాలు:

పొట్టు పెసరపప్పు - ఒకటిన్నర కప్పు

అల్లం ముద్ద - సగం టేబుల్ స్పూన్

పచ్చిమిర్చి ముద్ద - సగం టేబుల్ స్పూన్

సన్నగా తరిగిన ఉల్లిపాయ ముక్కలు - అరకప్పు

తరిగిన కొత్తిమీర - 2 టేబుల్ స్పూన్లు

నూనె - 2 టేబుల్ స్పూన్లు

ఉప్పు - తగినంత

వంటసోడా - సగం టీస్పూను

ఆవాలు - సగం టీస్పూను

జీలకర్ర - సగం టీస్పూను

ఇంగువ - చిటికెడు

కరివేపావు - రెండు రెబ్బలు

తయారీ విధానం:

step1: పొట్టు పెసరపప్పును శుభ్రంగా కడుక్కోవాలి. 7 నుంచి 8 గంటల దాకా నానబెట్టుకోవాలి. నీళ్లు వంపేసి కొద్దిగా కొత్తిమీర వేసుకుని మిక్సీ పట్టుకోవాలి. కాస్త గరుకుగానే ఉండాలి. అవసరమైతే ఒక స్పూను నీళ్లు వేసుకోండి.

step2: ఈ పిండిలో అల్ల ముద్ద, పచ్చి మిర్చి ముద్ద, ఉప్పు వేసుకోవాలి. బాగా కలుపుకున్నాక వంటసోడా కూడా కలుపుకోవాలి.

step3: ఇప్పుడు వెడల్పుగా లోతుగా ఉన్న ఒక పెద్ద పాత్ర తీసుకోండి. దీంట్లో మూడు కప్పుల నీళ్లు పోసుకోవాలి. మధ్యలో ఒక స్టాండ్ పెట్టుకోవాలి. పెద్ద మంట మీద నీళ్లు మరిగే దాకా వేడి చేయాలి.

step4: నీళ్లు మరిగిస్తున్న పాత్రలో పట్టేట్లు మరో లోతైన పళ్లెం తీసుకుని అంతటా నూనె రాసుకోవాలి. ఇందులో పిండి పోసుకోవాలి.

step5: ఇప్పుడు జాగ్రత్తగా స్టాండ్ మీద ఈ పిండి పోసుకున్న పాత్ర పెట్టుకోవాలి. మూత పెట్టుకుని కనీసం 15 నుంచి 20 నిమిషాలు ఆవిరికి ఉడకనివ్వాలి. ఆ తరువాత పొయ్యి కట్టేయొచ్చు.

step6: ఇది కేకులాగా బయటకు వచ్చేస్తుంది. దీన్ని చిన్న చిన్న ముక్కలుగా చతురస్రాకారంలో కట్ చేసుకోవాలి.

step7: మరో పాత్రలో కాస్త నూనె, ఆవాలు, జీలకర్ర వేసి వేగాక, ఉల్లిపాయ ముక్కలు వేసుకోవాలి. ఇవి కాస్త వేగాక కరివేపాకు కూడా వేసుకోవాలి. చివరిగా ఇంగువ కూడా వేసుకుని బాగా కలిపి కట్ చేసుకున్న డోక్లా ముక్కలు మీద ఈ తాలింపును వేసుకోవాలి. అంతే దోక్లా సిద్ధం.