Yash: కేజీఎఫ్ 3 పట్టాలెక్కేది ఆ తర్వాతే: కన్నడ స్టార్ యశ్.. రావణుడి పాత్ర చేస్తున్నానని క్లారిటీ.. టాక్సిక్ వాయిదా

కేజీఎఫ్ చాప్టర్ 1, 2 చిత్రాలతో కన్నడ హీరో యశ్.. పాన్ ఇండియా రేంజ్‍ స్టార్ అయ్యారు. ప్రశాంత్ నీల్ దర్శకత్వం వహించిన ఈ యాక్షన్ సినిమాలు భారీ బ్లాక్‍బస్టర్లు అయ్యాయి. కేజీఎఫ్ 2 మూవీ రూ.1,000కోట్లకు పైగా కలెక్షన్లతో దుమ్మురేపింది. దీంతో కేజీఎఫ్ 3 ఎప్పుడు వస్తుందా అనే ఆసక్తి విపరీతంగా నెలకొంది. అయితే, యశ్ ప్రస్తుతం రెండు వేరే సినిమాలు చేస్తున్నారు. తాజాగా ఇచ్చిన ఓ ఇంటర్వ్యూలో తన తదుపరి సినిమాలతో పాటు కేజీఎఫ్ 3 గురించి కూడా యశ్ మాట్లాడారు.

ఆ సినిమాల తర్వాత..

యశ్ ప్రస్తుతం టాక్సిక్ సినిమాలో నటిస్తున్నారు. అలాగే, రామాయణం మూవీ కూడా చేస్తున్నారు. ఈ రెండు చిత్రాల తర్వాతే కేజీఎఫ్ 3 పట్టాలెక్కుతుందనేలా యశ్ చెప్పారు. హాలీవుడ్ రిపోర్టర్ ఇండియా యూట్యూబ్ ఛానెల్‍కు యశ్ ఇంటర్వ్యూ ఇచ్చారు. దీంట్లో చాలా విషయాల గురించి వెల్లడించారు.

కేజీఎఫ్ 3 ఎప్పుడు అని తమను అభిమానించే క్రికెటర్ శుభ్‍మన్ గిల్ అడిగారంటూ యశ్‍కు ప్రశ్న ఎదురైంది. దీనికి యశ్ స్పందించారు. “కేజీఎఫ్ 3 కచ్చితంగా ఉంటుంది. అయితే ప్రస్తుతం ఆ రెండు ప్రాజెక్టులపై ఫోకస్ చేశా. మాకు ఐడియా ఉంది. సరైన సమయంలో పట్టాలెక్కుతుంది. చాలా భారీగా ఉంటుంది” అని యశ్ చెప్పారు.

డబ్బు చేసుకోవాలనుకోవడం లేదు

కేజీఎఫ్ 3ని డబ్బు చేసుకోవాలని తాము అనుకోవడం లేదని, ఇప్పటికే ఆడియన్స్ కావాల్సినంత ఇచ్చారని యశ్ చెప్పారు. అందరూ గర్వపడేలా ఆ మూవీ ఉండాలని అనుకుంటున్నామని అన్నారు. ఈ చిత్రం గురించి తాను, దర్శకుడు ప్రశాంత్ మాట్లాడుకుంటున్నామని తెలిపారు. కేజీఎఫ్‍తో సలార్‌కు లింక్ లేదని చెప్పారు.

రావణుడిగా నటిస్తున్నా

బాలీవుడ్ దర్శకుడు నితేశ్ తివారీ తెరకెక్కిస్తున్న రామాణయం చిత్రంలో యశ్ రావణుడిగా నటిస్తున్నారని కొంతకాలంగా వినిపిస్తోంది. అయితే, అధికారిక ప్రకటన రాలేదు. ఈ విషయంపై ఈ ఇంటర్వ్యూలో ఎదురైన ప్రశ్నకు యశ్ స్పందించారు. తాను ఈ చిత్రంలో రావణుడిగా నటిస్తున్నానని స్పష్టంగా చెప్పేశారు.

ఈ రామాయణం మూవీలో రాముడిగా రణ్‍బీర్ కపూర్, సీతగా సాయిపల్లవి నటిస్తున్నారు. సాయి పల్లవిపై యశ్ ప్రశంసల వర్షం కురిపించారు. సీతగా ఆమె బాగుంటారని తామంతా కలిసి నిర్ణయం తీసుకున్నామని చెప్పారు. రామాయణం చిత్రానికి సహ నిర్మాతగానూ యశ్ ఉన్నారు. నమీత్ మల్హోత్రాతో కలిసి నిర్మిస్తున్నారు. రామాయణం మూవీని గ్లోబల్ రేంజ్‍లో రూపొందించాలని తాము నిర్ణయించుకున్నామని తెలిపారు.

టాక్సిక్ వాయిదా

కేజీఎఫ్ 2 లాంటి భారీ బ్లాక్ బస్టర్ తర్వాత.. టాక్సిక్ సినిమా చేస్తున్నారు యశ్. ఈ మూవీకి నేషనల్ అవార్డు విన్నింగ్ డైరెక్టర్ గీతూ మోహన్ దాస్ దర్శకత్వం వహిస్తున్నారు. టాక్సిక్ చిత్రం కూడా హైవోల్టేజ్ యాక్షన్ మూవీగానే ఉండనుంది. ప్రస్తుతం షూటింగ్ జరుగుతోంది. టాక్సిక్ మూవీని 2025 ఏప్రిల్ 10వ తేదీన రిలీజ్ చేస్తామని గతంలోనే టీమ్ ప్రకటించింది. అయితే, ఈ చిత్రం వాయిదా పడనుందని యశ్ ఇప్పుడు వెల్లడించారు. ఇతర నటీనటుల షెడ్యూల్‍లను పరిగణనలోకి తీసుకోకుండా షూటింగ్‍కు ముందే ఆ డేట్ ప్రకటించామని అన్నారు. 2025 ఏప్రిల్‍లో టాక్సిక్ రిలీజ్ కాదని తెలిపారు. ఎప్పుడు విడుదల అవుతుందో ఇప్పుడే చెప్పలేమని అన్నారు.