RRR Movie: ఆర్ఆర్ఆర్ నా ఫేవరెట్ మూవీ.. మూడు నెలలకోసారి చూస్తూనే ఉంటాను: బ్రిటీష్ నటి కామెంట్స్ వైరల్
RRR Movie: ఆర్ఆర్ఆర్ మూవీ తన ఫేవరెట్ అని చెబుతోంది బ్రిటీష్ నటీ మిన్నీ డ్రైవర్. అంతేకాదు ఇప్పటికీ ప్రతి మూడు నెలలకోసారి ఆ సినిమా చూస్తూనే ఉంటానని ఆమె చెప్పడ విశేషం. ఈ మూవీ ప్రపంచ సినిమాపై ఎంతటి ప్రభావం చూపిందో ఈ కామెంట్స్ ను బట్టి అర్థం చేసుకోవచ్చు.
RRR Movie: ఆర్ఆర్ఆర్ మూవీ రిలీజైన రెండున్నరేళ్లకుపైనే అయింది. అయితే ఇప్పటికీ ఈ మూవీ గురించి ఏదో ఒక విధంగా చర్చ జరుగుతూనే ఉంది. తాజాగా బ్రిటీష్ నటి మిన్నీ డ్రైవర్ ఈ సినిమాపై చేసిన కామెంట్స్ వైరల్ అవుతున్నాయి. ఏఎన్ఐకి ఇచ్చిన ఇంటర్వ్యూలో మన దేశం గురించి, ఈ మూవీ గురించి ఆమె కొన్ని ఇంట్రెస్టింగ్ కామెంట్స్ చేసింది.
ఆర్ఆర్ఆర్‌లాంటి సినిమా చూడలేదు: మిన్నీ
ఆర్ఆర్ఆర్ సినిమాపై మిన్నీ డ్రైవర్ ప్రశంసల వర్షం కురిపించింది. "ఆర్ఆర్ఆర్ నా ఫేవరెట్. నా కొడుకుతో కలిసి ఈ సినిమా చూడటం నాకిష్టం. నా ఆల్ టైమ్ ఫేవరెట్ మూవీ ఇది.
మూడు గంటల పాటు ఉండే ఈ మూవీని ప్రతి మూడు నెలలకోసారి చూస్తూనే ఉంటాం. సినిమా చరిత్రలో తీసిన అత్యంత అందమైన సినిమాల్లో ఇదీ ఒకటి" అని మిన్నీ అనడం విశేషం.
ఈ సినిమా మార్చి 25, 2022లో ప్రపంచవ్యాప్తంగా రిలీజై రూ.1200 కోట్లకుపైనే వసూలు చేసింది. అంతేకాదు 2023 ఆస్కార్స్ లో బెస్ట్ ఒరిజినల్ సాంగ్ కేటగిరీలో నాటు నాటు పాటకు అవార్డు గెలుచుకుంది. ఈ సినిమాకు తాను కూడా అభిమానినే అని గతంలో జేమ్స్ కామెరాన్ లాంటి హాలీవుడ్ దిగ్గజ దర్శకులు కూడా చెప్పడం విశేషం.
ఇండియా కల్చర్ ఇష్టం
ఇక ఆర్ఆర్ఆర్ సినిమా గురించే కాదు భారతీయ సంస్కృతి గురించి కూడా మిన్నీ డ్రైవర్ మాట్లాడింది. ఇండియన్ చెఫ్ రోమీ గిల్ తో తనకు మంచి స్నేహం ఉందని చెప్పింది. "నేను ఇక్కడి అద్భుతమైన బెంగాలీ, పంజాబీ ఫ్యామిలీకి చెందిన చెఫ్ రోమీ గిల్ కి మంచి స్నేహితురాలిని. ఆమెతో తరచూ మాట్లాడుతుంటాను.
అంతేకాదు ఇండియా మొత్తం తిరిగి ఇక్కడి సంస్కృతి సాంప్రదాయాల గురించి తెలుసుకోవాలని అనుకుంటాను" అని మిన్నీ డ్రైవర్ తెలిపింది. మిన్నీ డ్రైవర్ ఈ మధ్యే ది సెర్పెంట్ క్వీన్ సీజన్ 2 లో నటించింది. ఇందులో ఆమె క్వీన్ ఎలిజబెత్ 1 పాత్రలో నటించింది. ఈ షో ప్రస్తుతం లయన్స్‌గేట్ ప్లేలో స్ట్రీమింగ్ అవుతోంది.
ఇక ఆర్ఆర్ఆర్ మూవీ విషయానికి వస్తే రామ్ చరణ్, జూనియర్ ఎన్టీఆర్ కలిసి నటించిన ఈ సినిమా ఓ సంచలనం. దర్శక ధీరుడు రాజమౌళి డైరెక్ట్ చేసిన ఈ సినిమా ఇండియాలోనే కాదు ప్రపంచవ్యాప్తంగా వసూళ్ల వర్షం కురిపించింది. ముఖ్యంగా జపాన్, అమెరికా లాంటి దేశాల్లో ఎంతో మంది అభిమానులను సంపాదించుకుంది.
ఈ మూవీ తర్వాత రాజమౌళి ఇప్పటి వరకూ మరో సినిమా మొదలు పెట్టలేదు. ప్రస్తుతం మహేష్ బాబుతో మూవీ ప్రీప్రొడక్షన్ పనుల్లో రాజమౌళి బిజీగా ఉన్నాడు. ఈ సినిమా వచ్చే ఏడాది సెట్స్ పైకి వెళ్లే అవకాశం కనిపిస్తోంది.
