Netflix Rajamouli Documentary: రాజమౌళి ఓ పిచ్చోడంటున్న జూనియర్ ఎన్టీఆర్, ప్రభాస్.. నెట్‌ఫ్లిక్స్ డాక్యుమెంటరీ ట్రైలర్

Netflix Rajamouli Documentary: ప్రముఖ ఓటీటీ నెట్‌ఫ్లిక్స్ మోడర్న్ మాస్టర్స్ పేరుతో తీస్తున్న సిరీస్ లో తాజాగా దర్శక ధీరుడు రాజమౌళిపైనా ఓ డాక్యుమెంటరీ తీసింది. ఈ విషయాన్ని గతంలోనే అనౌన్స్ చేసిన ఆ ఓటీటీ తాజాగా సోమవారం (జులై 22) ట్రైలర్ రిలీజ్ చేసింది. ఇందులో అతనితో కలిసి పని చేసిన జూనియర్ ఎన్టీఆర్, ప్రభాస్, రామ్ చరణ్, కీరవాణి, రమా రాజమౌళిలాంటి వాళ్లు జక్కన గురించి ఇంట్రెస్టింగ్ విషయాలు చెప్పారు.

రాజమౌళి ఓ పిచ్చోడు

ఈ ట్రైలర్ లో ఎంతో ఆసక్తి కలిగించి విషయం.. జూనియర్ ఎన్టీఆర్, ప్రభాస్ లాంటి వాళ్లు రాజమౌళిని ఓ పిచ్చోడని అనడం. అయితే అతన్ని కించపరిచే ఉద్దేశంతో కాదుగానీ.. రాజమౌళితో కలిసి పని చేయడం ఎలా ఉంటుందన్న విషయాన్ని వాళ్లు ఇలా చెప్పారు. రాజమౌళిలాంటి మనిషిని ఇప్పటి వరకు నేను చూడలేదు.. అతడో పిచ్చి మనిషి అంతే అని ఈ ట్రైలర్ లో ప్రభాస్ చెప్పడం చూడొచ్చు.

ఇక రాజమౌళితో కలిసి పని చేయడంలో ఉన్న పెద్ద తలనొప్పి ఏంటి అనే ప్రశ్నకు జూనియర్ ఎన్టీఆర్ కూడా అలాగే స్పందించాడు. "అసలు అతనికి కనీసం సహానుభూతి లేదు అన్న ఫీలింగ్ మనకు కలుగుతుంది. అతడో పిచ్చోడు. అతనితో వాదించి అసలు ప్రయోజనం లేదు. అతనికి ఏం కావాలో ఇచ్చేసి అక్కడి నుంచి వెళ్లిపోవడమే" అని తారక్ నవ్వుతూ చెప్పాడు.

రాజమౌళి ఓ పని రాక్షసుడు

ఇక రాజమౌళి భార్య రమా రాజమౌళి కూడా ఈ ట్రైలర్ లో కనిపించింది. అతడో పని రాక్షసుడు అని ఆమె అనడం విశేషం. మరోవైపు మగధీర, ఆర్ఆర్ఆర్ లాంటి సినిమాల్లో జక్కన్నతో కలిసి పని చేసిన రామ్ చరణ్ కూడా తన అనుభవాన్ని పంచుకున్నాడు. "నేను అతని సినిమాల్లో పని చేస్తున్నా కూడా.. ఓ మూడో వ్యక్తిని అన్న ఫీలింగ్ నాకు కలుగుతుంది. పని సమయంలో మైకులు విరిగిపోయేవి" అని చెర్రీ అన్నాడు.

ఈ ట్రైలర్ మొదట్లో తాను ఓ అద్భుతమైన స్టోరీని ప్రేక్షకులకు అందించాలని అనుకుంటానని రాజమౌళి చెబుతాడు. ఇక చివర్లో మరోసారి వచ్చి.. తాను కేవలం తన స్టోరీకి మాత్రమే బానిసను అని అతడు అనడం విశేషం. రాజమౌళి సినిమాల్లాగే అతనిపై రూపొందిన ఈ డాక్యుమెంటరీ కూడా ఎంతో ఆసక్తికరంగా ఉండబోతున్నట్లు ట్రైలర్ చూస్తే స్పష్టమవుతోంది.

మోడర్న్ మాస్టర్స్ పేరుతో నెట్‌ఫ్లిక్స్ కొన్నాళ్లుగా ఓ సిరీస్ రూపొందిస్తోంది. అందులో భాగంగానే టాలీవుడ్ నుంచి ఎస్ఎస్ రాజమౌళిపై ఓ డాక్యుమెంటరీని క్రియేట్ చేసింది. ఈ డాక్యుమెంటరీ ఆగస్ట్ 2 నుంచి నెట్‌ఫ్లిక్స్ స్ట్రీమింగ్ కానుంది. ఆర్ఆర్ఆర్ తర్వాత రెండేళ్లుగా ఎలాంటి సినిమా చేయని జక్కన్న.. ప్రస్తుతం మహేష్ బాబుతో సినిమా ప్రీప్రొడక్షన్ పనుల్లో బిజీగా ఉన్న విషయం తెలిసిందే.

ప్రభాస్ తో బాహుబలి రెండు భాగాలు, తారక్, చరణ్ లతో ఆర్ఆర్ఆర్ లాంటి సినిమాలతో పాన్ ఇండియా స్టార్ డైరెక్టర్ గా మారిపోయిన రాజమౌళి.. ఇప్పుడు మహేష్ తో అంతకంటే పెద్దగా ఓ పాన్ వరల్డ్ మూవీని తీయబోతున్నాడు. అయితే అది ఎప్పటి వరకు ప్రేక్షకుల ముందుకు వస్తుందన్నది మాత్రం ఇంకా తెలియడం లేదు.