Tollywood: మరోసారి రవితేజ, రామ్ బాక్సాఫీస్ పోటీ.. అప్పుడు రెండూ హిట్.. మరి ఇప్పుడు?

మాస్ మహారాజ రవితేజ, ఎనర్జిటిక్ హీరో ఉస్తాద్ రామ్‍ పోతినేని రెండేళ్లుగా బ్యాక్‍ టు బ్యాక్ ప్లాఫ్‍లు ఎదుర్కొన్నారు. టైగర్ నాగేశ్వరరావు, ఈగల్ చిత్రాలు రవితేజను నిరాశ పరచగా.. స్కంద, వారియర్ రూపంలో రామ్‍కు ఎదురుదెబ్బలు తగిలాయి. దీంతో ఈ ఇద్దరు హీరోలకు ఇప్పుడు హిట్ చాలా ముఖ్యంగా ఉంది. ఈ తరుణంలో బాక్సాఫీస్ వద్ద రవితేజ, రామ్ పోటీపడనున్నారు. రవితేజ హీరోగా నటించిన మిస్టర్ బచ్చన్ మూవీ రిలీజ్ డేట్ తాజాగా ఖరారైంది.

మిస్టర్ బచ్చన్ వర్సెస్ డబుల్ ఇస్మార్ట్

మిస్టర్ బచ్చన్ సినిమాను ఆగస్టు 15వ తేదీన థియేటర్లలో రిలీజ్ చేయనున్నట్టు మూవీ టీమ్ నేడు (జూలై 21) వెల్లడించింది. స్వాతంత్య్ర దినోత్సవం సందర్భంగా ఈ మూవీ వస్తోంది. ఈ యాక్షన్ డ్రామా చిత్రానికి హరీశ్ శంకర్ దర్శకత్వం వహించారు. షో రీల్ అంటూ మిస్టర్ బచ్చన్ చిత్రం నుంచి వచ్చిన గ్లింప్స్ మంచి రెస్పాన్స్ దక్కించుకుంది. మిరపకాయ తర్వాత రవితేజ - హరీశ్ కాంబో రిపీట్ అవుతుండడంతో మిస్టర్ బచ్చన్ చిత్రంపై మరింత హైప్ ఉంది.

పూరి జగన్నాథ్ దర్శకత్వంలో రామ్ పోతినేని హీరోగా నటించిన డబుల్ ఇస్మార్ట్ సినిమా ఇప్పటికే ఆగస్టు 15 రిలీజ్ డేట్ కన్ఫార్మ్ చేసుకుంది. ఈ మూవీ నుంచి వచ్చిన రెండు మాస్ సాంగ్స్ బాగా పాపులర్ అయ్యాయి. మణిశర్మ ఈ చిత్రానికి సంగీతం అందిస్తున్నారు. సూపర్ హిట్ అయిన ఇస్మార్ట్ శంకర్ మూవీకి సీక్వెల్‍గా వస్తున్న డబుల్ ఇస్మార్ట్ చిత్రంపై అంచనాలు బాగానే ఉన్నాయి. బంపర్ ఓపెనింగ్ దక్కే అవకాశాలు కూడా ఉంటాయి.

ఇలా ఆగస్టు 15వ తేదీన మిస్టర్ బచ్చన్, డబుల్ ఇస్మార్ట్ సినిమాలతో రవితేజ, రామ్ బాక్సాఫీస్ ఫైట్ ఉండనుంది. 2021లో వీరిద్దరూ పోటీ పడగా.. రెండు చిత్రాలు హిట్ అయ్యాయి.

క్రాక్ వర్సెస్ రెడ్.. రెండూ హిట్

2021 సంక్రాంతికి రవితేజ హీరోగా నటించిన క్రాక్, రామ్ పోతినేని ‘రెడ్’ చిత్రాలు తలపడ్డాయి. నాలుగు రోజుల వ్యవధిలోనే రిలీజ్ అయ్యాయి. అప్పుడు ఈ రెండూ హిట్ అయ్యాయి. క్రాక్ చిత్రం బ్లాక్‍బస్టర్ కొట్టింది. రెడ్ మూవీ కూడా మోస్తరు హిట్ అయింది.

మరోసారి..!

ఇప్పుడు.. మిస్టర్ బచ్చన్, డబుల్ ఇస్మార్ట్ సినిమాలు కూడా మంచి బజ్‍తోనే వస్తున్నాయి. దీంతో ఈ ఏడాది ఆగస్టు 15న రిలీజ్ అయ్యే ఈ రెండు చిత్రాలకు ఓపెనింగ్ బాగానే ఉండే అవకాశం ఉంది. ఈసారి ఒకే రోజున రవితేజ, రామ్ వస్తున్నారు. పాజిటివ్ టాక్ వస్తే ఈ మరోసారి బాక్సాఫీస్ వద్ద రెండు సక్సెస్ సాధించే అవకాశం ఉంటుంది. మరి ఏం జరుగుతుందో చూడాలి.

ఆగస్టు 15న మరిన్ని..

నార్నే నితిన్, నయన్ సారిక హీరోహీరోయిన్లుగా నటించిన ఆయ్ చిత్రం కూడా ఆగస్టు 15వ తేదీన రిలీజ్ కానుంది. మ్యాడ్ మూవీతో నితిన్‍కు మంచి క్రేజ్ రావడం, జీఏ2 పిక్చర్స్ నిర్మిస్తుండటంతో ఆయ్‍పై కూడా ఆసక్తి ఉంది. నివేదా థామస్ ప్రధాన పాత్ర పోషిస్తున్న ‘35 చిన్న కథ కాదు’ కూడా ఆగస్టు 15న రిలీజ్ కానుంది. తమిళ స్టార్ విక్రమ్ హీరోగా నటించిన భారీ బడ్జెట్ చిత్రం తంగలాన్ కూడా తెలుగులో ఆగస్టు 15న విడుదల కానుంది. దీంతో ఈసారి ఇండిపెండెన్స్ డే రోజున బాక్సాఫీస్ పోరు రసవత్తరంగా మారింది. బాలీవుడ్ హారర్ మూవీ స్త్రీ 2 కూడా అదే రోజున రిలీజ్ కానుంది.