Devara OTT: ఓటీటీలో దుమ్ముదులిపేస్తున్న దేవర.. టాప్ ట్రెండింగ్‌లో జూనియర్ ఎన్టీఆర్ మూవీ
Netflix Top Trending: సెప్టెంబరులో విడుదలై రూ.500 కోట్లకి పైగా వసూళ్లు రాబట్టిన దేవర పార్ట్-1 మూవీ.. ఓటీటీలోనూ అదరగొట్టేస్తోంది. టాప్ ట్రెండింగ్‌లో కొనసాగుతోంది.
జూనియర్ ఎన్టీఆర్, కొరటాల శివ కాంబినేషన్‌లో వచ్చిన దేవర పార్ట్-1 ఓటీటీలోనూ దుమ్ముదులిపేస్తోంది. థియేటర్లలో సెప్టెంబరు 27న విడుదలైన ఈ సినిమా తొలుత మిక్సెడ్ టాక్ తెచ్చుకున్నా.. ప్రపంచ వ్యాప్తంగా దాదాపు రూ.500 కోట్లు వసూళ్లు రాబట్టింది. రెండు రోజుల క్రితం ఓటీటీలోకి వచ్చిన దేవర పార్ట్-1 మూవీ.. ఇప్పుడు టాప్ ట్రెండింగ్‌లో దూసుకెళ్తోంది.
జూనియర్ ఎన్టీఆర్తో కలిసి ఈ సినిమాలో జాన్వీకపూర్‌ ఆడిపాడగా.. బాలీవుడ్ నటుడు సైఫ్‌ అలీఖాన్‌, శ్రుతి మరాఠే, ప్రకాశ్‌రాజ్‌, సీనియర్ హీరో శ్రీకాంత్‌, షైన్‌ టామ్‌ చాకో తదితరులు ఈ సినిమాలో నటించారు.
ఈ మూవీకి అనిరుధ్‌ రవిచందర్‌ సంగీతం అందించగా.. సినిమా రిలీజ్‌కి ముందే సాంగ్స్‌ సూపర్ హిట్‌గా నిలిచిన విషయం తెలిసిందే. మరీ ముఖ్యంగా ఎన్టీఆర్, జాన్వీ కపూర్ మధ్య ‘‘చుట్టమల్లే చుట్టేస్తాందె తుంటరి చూపు’’ రొమాంటిక్ సాంగ్ అప్పట్లో టాప్ ట్రెండింగ్‌లో నిలిచింది.
నెట్ఫ్లిక్స్లో స్ట్రీమింగ్
దేవర పార్ట్-1 సినిమా నవంబరు 8 నుంచి ఓటీటీ ప్లాట్‌ఫామ్ నెట్ఫ్లిక్స్లో స్ట్రీమింగ్ అవుతుండగా.. రెండు రోజుల్లోనే ఈ మూవీ ట్రెండింగ్‌లో నెం.1గా నిలిచింది .ఈ మేరకు నెట్‌ప్లిక్స్‌ ఒక అధికారిక ప్రకటనని విడుదల చేసింది.
దేవర మూవీ తెలుగు, తమిళ్, కన్నడ, మలయాళం భాషల్లోనూ నెట్ఫ్లిక్స్లో అందుబాటులో ఉంది. అయితే హిందీ వెర్షన్‌పై మాత్రం క్లారిటీ రావడం లేదు. నవంబరు మూడో వారంలో హిందీ వెర్షన్‌లోనూ విడుదల చేసే అవకాశం ఉన్నట్లు వార్తలు వస్తున్నాయి.
దేవర-2పై పెరిగిన అంచనాలు
దేవర పార్ట్-2 సినిమాపై ఇప్పటికే అభిమానుల్లో భారీగా అంచనాలు ఏర్పడ్డాయి. పార్ట్-1లో జాన్వీ కపూర్ పాత్రని చాలా పరిమితంగా చూపించారు.దాంతో పార్ట్-2లో ఆమె పాత్ర పవర్‌పుల్‌గా ఉండటమే కాదు.. నిడివి కూడా పెరుగుతుందని చిత్ర యూనిట్ చెప్తోంది.
ఎన్టీఆర్ నెక్ట్స్ నెల్సన్ దిలీప్‌కుమార్‌‌తో సినిమా తీయబోతున్నట్లు వార్తలు వస్తున్నాయి. జైలర్ సినిమాతో సూపర్ హిట్ అందుకున్న నెల్సన్ దిలీప్ కుమార్ ఇటీవల ఎన్టీఆర్‌కి కథ చెప్పగా.. ఓకే చెప్పినట్లు తెలుస్తోంది. ప్రస్తుతం జైలర్-2 పనిలో నెల్సన్ బిజీగా ఉన్నాడు. ఆ మూవీ కంప్లీట్ అయిన తర్వాత ఎన్టీఆర్తో సినిమా పట్టాలెక్కే అవకాశం ఉంది.
జాన్వీ కపూర్ నెక్ట్స్ మూవీ
జాన్వీ కపూర్ ప్రస్తుతం రామ్ చరణ్ సినిమాలో నటిస్తోంది. బుచ్చిబాబు దర్శకత్వం వహిస్తున్న ఈ సినిమా త్వరలోనే సెట్స్‌పైకి వెళ్లనుండగా.. ఇటీవల హైదరాబాద్‌లోని అన్నపూర్ణ సూడియోలో ఫొటో షూట్ జరిగింది.
