Lucky Bhaskar: సీతారామం హీరో దుల్కర్ సల్మాన్ కొత్త మూవీ లక్కీ భాస్కర్.. సార్ డైరెక్టర్‌తో క్రేజీ కాంబినేషన్

Dulquer Salmaan Venky Atluri Lucky Bhaskar: ప్రముఖ నటుడు, మలయాళ మెగాస్టార్ మమ్ముట్టి వారసుడిగా కెరీర్‌ను ప్రారంభించిన దుల్కర్ సల్మాన్ అనతి కాలంలోనే తన ప్రత్యేకతను చాటుకొని, వివిధ భాషల ప్రేక్షకుల మనసు గెలుచుకున్నాడు. పాన్-ఇండియా హీరోగా ఎదిగాడు. గత 12 సంవత్సరాలుగా తన నటనతో ఎంతో పేరు ప్రఖ్యాతలు సంపాదించుకున్న దుల్కర్ సల్మాన్ ఇప్పటికే చిరస్థాయిగా నిలిచిపోయే పలు చిత్రాల్లో నటించి తన నటనతో అలరించాడు.

దుల్కర్ సల్మాన్ నటించిన లేటెస్ట్ మూవీ 'లక్కీ భాస్కర్'. ఈ సినిమాను అన్ని వర్గాల ప్రేక్షకులను మెప్పించే అద్భుతమైన చిత్రాలను అందించే ప్రముఖ నిర్మాణ సంస్థ సితార ఎంటర్‌టైన్‌మెంట్స్‌ నిర్మిస్తోంది. వినోదభరితమైన, హృదయాన్ని కదిలించే కథలతో తనకంటూ ప్రత్యేక గుర్తింపు తెచ్చుకున్న రచయిత, దర్శకుడు వెంకీ అట్లూరి లక్కీ భాస్కర్‌ మూవీకి దర్శకత్వం వహిస్తున్నారు. ఇలా సితార ఎంటర్టైన్‌మెంట్స్, వెంకీ అట్లూరి, దుల్కర్ సల్మాన్ వంటీ క్రేజీ కాంబినేషన్‌లో వస్తున్న లక్కీ భాస్కర్‌పై ఇప్పుడే అంచనాలు పెరిగిపోయాయి.

నటుడిగా దుల్కర్ సల్మాన్ 12 సంవత్సరాలు పూర్తి చేసుకున్న సందర్భంగా 'లక్కీ భాస్కర్' ఫస్ట్ లుక్ పోస్టర్‌ను విడుదల చేశారు మేకర్స్. మగధ బ్యాంక్‌లో క్యాషియర్‌గా పని చేస్తున్న లుక్‌లో దుల్కర్ కనిపిస్తున్నారు. 80ల కాలం నాటి బొంబాయి(ముంబై) నేపథ్యంలో ఈ సినిమా తెరకెక్కుతోందని మేకర్స్ తెలిపారు. ఈ సినిమా అంతా ఒక సాధారణ మనిషి చేసిన అసాధారణమైన ప్రయాణం గురించి అని నిర్మాతలు చెబుతున్నారు. విభిన్న కథతో ప్రేక్షకులకు కొత్త అనుభూతిని అందించడానికి దుల్కర్ సల్మాన్, వెంకీ అట్లూరి సరికొత్తగా సినిమాను తెరకెక్కిస్తున్నారని టాక్.

ప్రస్తుతం లక్కీ భాస్కర్ సినిమా చిత్రీకరణ శరవేగంగా జరుగుతోంది. మేకర్స్ ఏ విషయంలోనూ రాజీ పడకుండా, ఎంతో ప్రతిష్టాత్మకంగా ఈ చిత్రాన్ని రూపొందిస్తున్నారు. సార్(వాతి) వంటి ఘన విజయం తర్వాత వెంకీ అట్లూరి, సితార ఎంటర్‌టైన్‌మెంట్స్‌ కలయికలో తెరకెక్కుతోన్న సినిమా కావడంతో ప్రేక్షకుల అంచనాలకు ఏమాత్రం తగ్గకుండా అద్భుతమైన చిత్రాన్ని అందించాలని నిర్మాతలు భావిస్తున్నారు. 'లక్కీ భాస్కర్' ఎలాంటి సందేహం లేకుండా ప్రేక్షకులను మెప్పించే గొప్ప చిత్రం అవుతుందని మేకర్స్ నమ్మకంగా ఉన్నారు.

అంతేకాకుండా జాతీయ అవార్డు గ్రహీత జీవీ ప్రకాష్ కుమార్ లక్కీ భాస్కర్ మూవీకి సంగీతం అందిస్తున్నారు. జీవీ ప్రకాష్ కుమార్-వెంకీ అట్లూరి కలయికలో వచ్చిన సార్ (వాతి) సినిమా మ్యూజిక్ ఆల్బమ్ ఎలాంటి హిట్ కొట్టిందో తెలిసిందే. ఈ ఆల్బమ్ తర్వాత 'లక్కీ భాస్కర్‌'తో మరో చార్ట్‌బస్టర్ ఆల్బమ్ అందించాలని ప్రయత్నిస్తున్నారు. సితార ఎంటర్‌టైన్‌మెంట్స్‌, ఫార్చూన్ ఫోర్ సినిమాస్‌ పతాకాలపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు. శ్రీకర స్టూడియోస్ ఈ చిత్రాన్ని సమర్పిస్తోంది.

లక్కీ భాస్కర్ మూవీలో బ్యూటిఫుల్ మీనాక్షి చౌదరి హీరోయిన్‌గా చేస్తోంది. ఈ చిత్రానికి నిమిష్ రవి సినిమాటోగ్రాఫర్‌గా వ్యవహరించగా.. జాతీయ అవార్డు గ్రహీత నవీన్ నూలి ఎడిటింగ్ బాధ్యతలు చేపట్టారు. లక్కీ భాస్కర్ సినిమాను తెలుగు, మలయాళం, తమిళం, హిందీ భాషల్లో విడుదల చేయడానికి సన్నాహాలు చేస్తున్నారు. ఈ చిత్రానికి సంబంధించిన మరిన్ని వివరాలను మేకర్స్ త్వరలో వెల్లడించనున్నారు.