Dulquer Salmaan: దుల్కర్ - వెంకీ అట్లూరి మూవీ టైటిల్ ఖరారు.. ఇంట్రెస్టింగ్‍గా పోస్టర్

dulquer salmaan: సీతారామం సినిమాతో మలయాళ హీరో దుల్కర్ సల్మాన్.. తెలుగులోనూ చాలా పాపులర్ అయ్యాడు. అంతకు ముందు డబ్బింగ్ మూవీలతో తెలుగు ప్రేక్షకులను అలరించినా.. అతడు నేరుగా తెలుగులో చేసిన చిత్రం మాత్రం సీతారామం. ఈ సినిమా బాక్సాఫీస్ వద్ద భారీ విజయాన్ని సాధించటంతో పాటు క్లాసిస్ లవ్ స్టోరీగా నిలిచిపోయింది. కాగా, ఇప్పుడు దుల్కర్ మరోసారి డైరెక్ట్ తెలుగు సినిమా చేస్తున్నాడు. సార్ మూవీతో సూపర్ హిట్ కొట్టిన వెంకీ అట్లూరి దర్శకత్వంలో హీరోగా నటిస్తున్నాడు. ఈ సినిమా టైటిల్‍ను చిత్ర యూనిట్ నేడు (జూలై 28) ఖరారు చేసింది. దుల్కర్ సల్మాన్ పుట్టిన రోజు సందర్భంగా నేడు ఈ మూవీ పేరును వెల్లడించింది.

దుల్కర్ సల్మాన్ - వెంకీ అట్లూరి సినిమాకు ‘లక్కీ భాస్కర్’ (Lucky Baskhar) అనే టైటిల్‍ను చిత్ర బృందం ఖరారు చేసింది. ఈ మేరకు ఈ చిత్రాన్ని నిర్మిస్తున్న సితార ఎంటర్‌టైన్మెంట్స్ ఓ పోస్టర్‌ను ట్వీట్ చేసింది. ఇందులో దుల్కర్ ముఖంపై పాత వంద రూపాయల నోట్ ఉంటుంది. బ్యాక్ గ్రౌండ్లోనూ నోట్లు ఉన్నాయి. ‘లక్కీ భాస్కర్’ టైటిల్‍లో భాస్కర్ అనే ఇంగ్లిష్ పేరుకు చివర్లో రూపాయి సింబల్ ఉంది. భాస్కర్ అనే స్పెల్లింగ్ కూడా విభిన్నంగా ఉంది. దీంతో ‘లక్కీ భాస్కర్’ కథ డబ్బు చుట్టూ తిరుగుతుందని అర్థమవుతోంది.

ఈ ‘లక్కీ భాస్కర్’ చిత్రాన్ని సితారా ఎంటర్‌టైన్మెంట్స్, ఫార్చ్యూన్ ఫోర్ సినిమాస్ పతాకంపై నాగవంశీ, సాయి సౌజన్య సంయుక్తంగా నిర్మిస్తున్నారు. జీవీ ప్రకాశ్ కుమార్ సంగీతం అందించనున్నాడు. పాన్ ఇండియా రేంజ్లో ఈ చిత్రం రూపొందనుంది. అక్టోబర్ నెలలో ఈ సినిమా షూటింగ్ ప్రారంభమవుతుందని తెలుస్తోంది. వచ్చే ఏడాది వేసవికి లక్కీ భాస్కర్ మూవీని విడుదల చేయాలని చిత్ర యూనిట్ భావిస్తోంది.

దుల్కర్ సల్మాన్ ప్రస్తుతం కింగ్ ఆఫ్ కోథా అనే పాన్ ఇండియా మూవీ చేస్తున్నాడు. ఈ చిత్రంలో అతడు గ్యాంగ్‍స్టర్‌ పాత్రను పోషిస్తున్నాడు. అభిలాష్ జోశీ చిత్రానికి దర్శకత్వం వహిస్తున్నాడు. తన సొంత వేఫార్ బ్యానర్‌పై ఈ చిత్రాన్ని దుల్కర్ నిర్మిస్తున్నాడు. ఈ ఏడాది ఆగస్టు 25వ తేదీన ఈ సినిమా విడుదల కానుంది. దుల్కర్ సల్మాన్ పుట్టిన రోజు సందర్భంగా నేడు (జూలై 28) కింగ్ ఆఫ్ కోథా నుంచి మొదటి పాట విడుదల కానుంది.