Double Ismart Collection: తుస్సుమన్న డబుల్ ఇస్మార్ట్ కలెక్షన్స్- వచ్చింది ఇంతే- 5 డేస్ కలెక్షన్స్ ఇవే!

Double Ismart Box Office Collection: రామ్ పోతినేని, కావ్య థాపర్, సంజయ్ దత్ ప్రధాన పాత్రధారులుగా నటించిన పక్కా కమర్శియల్ యాక్షన్ థ్రిల్లర్ మూవీ డబుల్ ఇస్మార్ట్. ఇస్మార్ట్ శంకర్ సినిమాకు సీక్వెల్‌గా పూరి జగన్నాథ్ తెరకెక్కించిన డబుల్ ఇస్మార్ట్ ఆగస్ట్ 15న విడుదలై బాక్సాఫీస్ వద్ద హెచ్చు తగ్గులతో కలెక్షన్స్ తెచ్చుకుంటోంది.

పడిపోయిన వసూళ్లు

థియేటర్లలో మిక్స్‌డ్ టాక్ తెచ్చుకుంటోన్న డబుల్ ఇస్మార్ట్ మూవీ ఐదో రోజు కలెక్షన్స్ ఒక్కసారిగా తుస్సుమన్నాయి. అంటే 5వ రోజున ఇండియాలో డబుల్ ఇస్మార్ట్ చిత్రానికి వసూళ్లు దారుణంగా పడిపోయాయి. అందుకు సోమవారమే కారణం అని తెలుస్తోంది. సాధారణంగా మంచి హిట్ టాక్ తెచ్చుకున్న సినిమాలకు సైతం వీక్ డే అయిన మండే పెద్దగా కలెక్షన్స్ రావు.

5 రోజుల్లో వచ్చింది

అలాంటిది మిశ్రమ స్పందన వస్తోన్న డబుల్ ఇస్మార్ట్‌కు మరింత పేలవంగా కలెక్షన్స్ వచ్చాయి. ఐదో రోజున ఇండియాలో ఈ సినిమాకు రూ. 1.05 కోట్ల నికర వసూళ్లు మాత్రమే వచ్చాయి. అంటే నాలుగో రోజుతో పోలిస్తే ఐదో రోజున 34.38 శాతం కలెక్షన్స్ పడిపోయాయి. ఇక ఇండియా వైడ్‌గా మొత్తం 5 రోజుల్లో రూ. 12.8 కోట్ల నెట్ కలెక్షన్స్ డబుల్ ఇస్మార్ట్ మూవీకి వచ్చాయి.

వరల్డ్ వైడ్‌ కలెక్షన్స్

ఈ 12.8 కోట్లల్లో రూ. 11.7 కోట్ల నెట్ కలెక్షన్స్ తెలుగు నుంచి, 1.1 కోట్లు హిందీ బెల్ట్ నుంచి వచ్చాయి. అలాగే భారతదేశంలో ఐదు రోజుల్లో ఈ సినిమా రూ. 14.60 డొమెస్టిక్ గ్రాస్ కలెక్షన్స్ రాబట్టింది. ఓవర్సీస్‌లో రూ. 2.40 కోట్ల వసూళ్లు సాధించుకుంది డబుల్ ఇస్మార్ట్ సినిమా. ఇక వరల్డ్ వైడ్‌గా 17 కోట్ల నెట్ కలెక్షన్స్ రాగా.. 17.85 కోట్ల గ్రాస్ కలెక్ట్ అయింది.

బ్రేక్ ఈవెన్ పూర్తి కావాలంటే

ప్రపంచవ్యాప్తంగా డబుల్ ఇస్మార్ట్ చిత్రానికి రూ. 10.97 కోట్ల షేర్ కలెక్షన్స్ వచ్చాయి. అయితే, ఈ సినిమాకు బ్రేక్ ఈవెన్ టార్గెట్ 49 కోట్లుగా ఏర్పడిన విషయం తెలిసిందే. బ్రేక్ ఈవెన్ టార్గెట్ నుంచి వచ్చిన షేర్ కలెక్షన్స్ తీసేస్తే.. ఇంకా ఈ సినిమాకు రూ. 38.03 కోట్లు రావాలి. అలా వస్తేనే డబుల్ ఇస్మార్ట్ సినిమా బ్రేక్ ఈవెన్ పూర్తి చేసుకుని హిట్ బాటలో పయనిస్తుంది.

హిట్ కొడతారా?

ఇంకా 38 కోట్లకుపైగా వస్తేనే అటు పూరి జగన్నాథ్, ఇటు రామ్ పోతినేని కమర్షియల్ హిట్ కొట్టిన వాళ్లు అవుతారు. మరి రానున్న రోజుల్లో ఈ కలెక్షన్స్‌ను డబుల్ ఇస్మార్ట్ చేరుకుంటుందా అనేది చూడాలి. ఇదిలా ఉంటే, చాలా గ్యాప్ తర్వాత పూరి జగన్నాథ్ సినిమాలో కమెడియన్ అలీ నటించారు. అయితే, ఆయన ట్రాక్ అంతగా బాగోలేదని టాక్ వస్తోంది.