NKR 21: 1,000 మంది ఆర్టిస్టులతో భారీగా క్లైమాక్స్.. ఒక్క సీక్వెన్స్‌ కోసం ఎన్ని కోట్లు ఖర్చు పెట్టారంటే..

హీరో నందమూరి కల్యాణ్ రామ్ రెండేళ్ల కిందట బింబిసార చిత్రంతో బ్లాక్‍బస్టర్ సాధించారు. తన కెరీర్లోనే బిగ్గెస్ట్ హిట్ అందుకున్నారు. ఆ తర్వాత గతేడాది అమిగోస్ నిరాశపరిచింది. గతేడాది చివర్లోనే డెవిల్ చిత్రంతో కల్యాణ్ రామ్ ప్రేక్షకుల ముందుకు వచ్చారు. ఈ మూవీకి పాజిటివ్ టాకే వచ్చినా కలెక్షన్లు పెద్దగా రాలేదు. ప్రస్తుతం ప్రదీప్ చిలుకూరి దర్శకత్వంలో కల్యాణ్ రామ్ ఓ యాక్షన్ థ్రిల్లర్ సినిమా (NKR 21) చేస్తున్నారు. ఇది భారీ బడ్జెట్‍తోనే రూపొందుతోంది. తాజాగా ఈ ఎన్‍కేఆర్21 సినిమా క్లైమాక్స్ షూటింగ్ పూర్తయింది. దీనికి భారీగానే ఖర్చు పెట్టారు మేకర్స్.

క్లైమాక్స్ కోసం భారీ సెట్

ఎన్‍కేఆర్ 21 క్లైమాక్స్ షూటింగ్ పూర్తయిందని మూవీ టీమ్ వెల్లడించింది. హైదరాబాద్ శివార్లలో సుమారు 30 రోజుల పాటు క్లైమాక్స్ సీక్వెన్స్ చిత్రీకరణ జరిగింది. ఈ క్లైమాక్స్‌ భారీగా రూపొందింది. దీని కోసం విశాలమైన ప్రదేశంలో భారీ సెట్ వేశారు. ఈ సెట్‍ను బ్రహ్మకడలి డిజైన్ చేశారు. క్లైమాక్స్ కోసం కల్యాణ్ రామ్ కొన్ని రిస్కీ స్టంట్స్ కూడా చేశారని సమాచారం.

1,000 మంది.. రూ.8కోట్లు

క్లైమాక్స్ సీక్వెన్స్‌ను సుమారు 1000 మంది ఆర్టిస్టులతో భారీగా చిత్రీకరించారు మేకర్స్. సుమారు నెల రోజుల పాటు సాగిన ఈ క్లైమాక్స్ సీక్వెన్స్ కోసం రూ.8కోట్ల భారీ బడ్జెట్ ఖర్చయింది. సినిమాకు ఇది ముఖ్యమైన అట్రాక్షన్‍గా ఉంటుందని టాక్. క్లైమాక్స్‌కే ఇంత భారీస్థాయిలో ఖర్చు చేయటంతో ఎలా ఉంటుందోననే క్యూరియాసిటీ పెరిగిపోయింది.

ఎన్‍కేఆర్ 21 చిత్రంలో సీనియర్ నటి విజయశాంతి కీలక పాత్ర చేస్తున్నారు. ఐపీఎల్ ఆఫీసర్‌గా నటిస్తున్నారు. సోహాలీ ఖాన్, సయీ మంజ్రేకర్, శ్రీకాంత్ కీరోల్స్ పోషిస్తున్నారు. మొత్తంగా భారీ స్థాయిలో ఈ చిత్రం తెరకెక్కుతోంది. కల్యాణ్ రామ్ కెరీర్లోనే అత్యధిక బడ్జెట్ చిత్రంగా ఉండనుంది. అశోక క్రియేషన్స్, ఎన్టీఆర్స్ పతాకాలపై అశోక్ వర్దన్ ముప్పా, సునీల్ బలుసు ఈ చిత్రాన్ని నిర్మిస్తున్నారు.

ఈ మూవీకి అజ్నీష్ లోకనాథ్ సంగీతం అందిస్తుండగా.. వెంకయ్య చౌదరి సినిమాటోగ్రాఫర్‌గా ఉన్నారు. టెక్నికల్‍గా ఈ చిత్రం గ్రాండ్‍గా ఉండేలా దర్శకుడు ప్రదీప్ చిలుకూరి తెరకెక్కిస్తున్నారని తెలుస్తోంది. ఈ మూవీ వచ్చే ఏడాది విడుదల కానుంది.

కల్యాణ్ రామ్ పుట్టిన రోజు సందర్భంగా ఈ జూలై 5వ తేదీన ఎన్‍కేఆర్21 నుంచి ఫస్ట్ లుక్ వచ్చింది. రగెడ్ లుక్‍లో చేతితో అగ్గితో కల్యాణ్ రామ్ లుక్ అదిరిపోయింది. మాస్ యాక్షన్‍తో ఈ చిత్రం ఉండనుందని అర్థమైపోయింది. ఈ మూవీపై అంచనాలు అంతకంతకూ పెరిగిపోతున్నాయి.