RAPO22: రామ్ పోతినేని రాపో22 మూవీకి తమిళ టాప్ మ్యూజిక్ డైరెక్టర్స్.. సరికొత్త సంగీత సంచలనం అంటూ హీరో ట్వీట్

Ram Pothineni Rapo 22 Music Directors: తెలుగులో ఎనర్జిటిక్ స్టార్‌గా పాపులారిటీ తెచ్చుకుని ఉస్తాద్‌గా ఎదిగాడు రామ్ పోతినేని. దేవదాసు సినిమాతో హీరోగా ఎంట్రీ ఇచ్చిన రామ్ పోతినేని ఎన్నో హిట్స్ అందుకున్నాడు. చివరిగా డబుల్ ఇస్మార్ట్ 2 సినిమాతో ప్రేక్షకుల ముందుకు వచ్చిన రామ్ పోతినేని తన తర్వాతి మూవీ కోసం బిజీగా ఉన్నాడు.

అగ్ర నిర్మాణ సంస్థ

ప్రస్తుతం రామ్ పోతినేని సినీ కెరీర్‌లో వస్తోన్న అప్‌కమింగ్ మూవీ రాపో 22 (RAPO 22 Movie). ఇంకా టైటిల్ ఫిక్స్ కానీ ఈ సినిమాను ప్రముఖ అగ్ర నిర్మాణ సంస్థ మైత్రీ మూవీ మేకర్స్ నిర్మిస్తోంది. తెలుగు చలనచిత్ర పరిశ్రమకు ప్రతిభావంతులను పరిచయం చేసిన మైత్రీ మూవీ మేకర్స్ ప్రతిభకు పట్టం కడుతూ కొత్తవారికి స్వాగతం పలుకుతుంది.

కొత్త సంగీత దర్శకులు

రామ్ పోతినేని హీరోగా మైత్రి మూవీ మేకర్స్ పతాకంపై మహేష్ బాబు పి దర్శకత్వంలో నవీన్ ఎర్నేని, రవిశంకర్ యలమంచిలి నిర్మిస్తున్న సినిమాతో తెలుగు పరిశ్రమకు కొత్త సంగీత దర్శకులను పరిచయం చేస్తున్నారు. ఈ చిత్రానికి టాలెంటెడ్ అండ్ కోలీవుడ్ సెన్సేషనల్ మ్యూజిక్ డైరెక్టర్స్ వివేక్ - మెర్విన్ సంగీతం అందించనున్నట్లు సోమవారం (నవంబర్ 25) తెలిపారు.

సంగీత సంచలనం

ఈ సంచలన సంగీత ద్వయానికి రామ్ సోషల్ మీడియా ద్వారా స్వాగతం పలికారు. ''తెలుగు తెరపై సరికొత్త సంగీత సంచలనానికి స్వాగతం'' అని రామ్ పోతినేని ట్వీట్ చేశారు. వివేక్ శివ, మెర్విన్ సాల్మన్ ఇద్దరూ కలిసి వివేక్ - మెర్విన్ పేరుతో మ్యూజిక్ చేయడం మొదలు పెట్టారు. తమిళంలో తొలి సినిమా 'వడా కర్రీ'తో మంచి పేరు తెచ్చుకున్నారు.

ధనుష్, కార్తీ సినిమాలకు

అయితే, వాళ్లిద్దరూ సంగీతం అందించిన ప్రైవేట్ మ్యూజిక్ ఆల్బమ్ సాంగ్ 'ఓర్శాడా..', 'పక్కం నీయుమ్ ఇళ్లై..' చార్ట్ బస్టర్లుగా నిలిచాయి. కోలీవుడ్ స్టార్ హీరో ధనుష్ హీరోగా నటించిన 'పటాస్' చిత్రానికి సంగీతం అందించారు ఈ సంగీత ద్వయం. ఆ సినిమాలోని 'చిల్ బ్రో..' సాంగ్, ఇంకా ప్రభుదేవా 'గులేబకావళి'లోని గులేబా సాంగ్, కార్తీ 'సుల్తాన్' సినిమాలోని సాంగ్స్.. ఇలా వివేక్ - మెర్విన్ సూపర్ డూపర్ హిట్ పాటలకు మ్యూజిక్ అందించారు.

టాలీవుడ్‌కు పరిచయం

ఇప్పుడు ఈ సంగీత ద్వయాన్ని తెలుగు ప్రేక్షకులకు పరిచయం చేస్తున్నారు రామ్ పోతినేని, దర్శకుడు మహేష్ బాబు పి. తమిళ సంగీతం వినే ప్రేక్షకులకు వివేక్ - మెర్విన్ పరిచయమే. రామ్ పోతినేని సినిమాతో వివేక్-మెర్విన్ టాలీవుడ్ ఇండస్ట్రీకి ఇంట్రడ్యూస్ అవుతుండడంతో సంగీత ప్రియులు సంతోషం వ్యక్తం చేస్తున్నారు.‌

హీరోయిన్‌గా భాగ్యశ్రీ

తెలుగులో తమ తొలి సినిమాకు వాళ్లిద్దరు ఎటువంటి పాటలు అందిస్తారోననే ఆసక్తి మొదలైంది. రాపో22లో రామ్ పోతినేని సరసన న్యూ నేషనల్ క్రష్ భాగ్యశ్రీ బోర్సే హీరోయిన్‌గా నటిస్తోంది. రవితేజ మిస్టర్ బచ్చన్ సినిమాతో భాగ్యశ్రీ బోర్సే హీరోయిన్‌గా ఎంట్రీ ఇచ్చిన విషయం తెలిసిందే. కాగా.. ప్రస్తుతం రాపో 22 ఇతర నటీనటులు, సాంకేతిక నిపుణుల ఎంపిక చేస్తే పనుల్లో దర్శక నిర్మాతలు బిజీగా ఉన్నారు.