HT Telugu Chat With Pawan Kalyan : వైసీపీ ఫ్యాన్ స్విచ్ ఆఫ్, కూటమిదే విజయం- హెచ్.టి.తెలుగుతో పవన్ కల్యాణ్

HT Telugu Chat With Pawan Kalyan : తెలుగు చలనచిత్ర పరిశ్రమలో అగ్రశ్రేణి తారలలో ఒకరు, 2024లో ప్రతిష్టాత్మకమైన మిషన్‌లో ఉన్న రాజకీయ నాయకుడు... జనసేన పార్టీ వ్యవస్థాపక అధ్యక్షుడు పవన్ కల్యాణ్. 2024 ఏపీ అసెంబ్లీ ఎన్నికలకు తెలుగుదేశం, బీజేపీ జట్టుకట్టేలా చేసి కూటమి ఏర్పాటుకు కారకుడయ్యారు పవన్. టీడీపీ, బీజేపీ, జనసేనల ఉమ్మడి లక్ష్యం జగన్ మోహన్ రెడ్డిని, వైఎస్సార్‌సీపీ (వైసీపీ)ని అధికారం నుంచి దింపడమేనని పవన్ కల్యాణ్ స్పష్టం చేశారు. లతా శ్రీనివాసన్​తో జరిగిన ఈ ప్రత్యేక చాట్‌లో జనసేన అధ్యక్షుడు పవన్ కల్యాణ్ మాట్లాడారు.

ఈ ఎన్నికలపై మీరు దృష్టి సారించిన ప్రధాన అంశాలు ఏమిటి?

PK: మేము ప్రధానంగా ఆంధ్రప్రదేశ్‌లో ప్రజాస్వామ్యాన్ని పునరుద్ధరించాలనుకుంటున్నాము. జగన్ ఏకవ్యక్తి పాలన సాగిస్తున్నారు, సంస్థలను నాశనం చేస్తున్నారు, ప్రతీకార రాజకీయాలు చేస్తున్నారు. పౌరుల వ్యక్తిగత స్వేచ్ఛలు, ప్రాథమిక హక్కులను హరిస్తున్నారు. ఉదాహరణకు రాష్ట్రంలో తప్పిపోయిన 30,000 మంది మహిళలకు ఎవరు బాధ్యత వహిస్తారు. మేము ఆంధ్రప్రదేశ్ బ్రాండ్‌ను పునరుద్ధరించడం, సమతుల్య అభివృద్ధి, సంక్షేమాన్ని అందించడంపై దృష్టి పెట్టాలనుకుంటున్నాము. సంపద సృష్టించాలని, రాజధానిని నిర్మించాలని, పోలవరం ప్రాజెక్టును వేగవంతం చేయాలనుకుంటున్నాము. రాష్ట్రంలో శాంతిభద్రతలు పటిష్టంగా ఉండేలా చూడాలనుకుంటున్నాము.

వైఎస్సార్‌సీపీ ప్రభుత్వం ఎక్కడ విఫలమైందని అనుకుంటున్నారా?

PK: వైసీపీ ప్రభుత్వం చేసిన మూడు అగ్ర వైఫల్యాలు ఇవే - మొదటిది, ఆంధ్రప్రదేశ్ యువతను నిరుద్యోగులుగా మార్చడం. రాష్ట్రం డ్రగ్ క్యాపిటల్‌గా మారిపోయింది. నేరాల రేటు కూడా పెరుగుతోంది. ప్రభుత్వం యువత సృజనాత్మకత, ఆశయాన్ని కేవలం రూ. 5000 బహుమతిగా ఇచ్చే స్వచ్ఛంద ఉద్యోగానికి పరిమితం చేసింది. ఇది NREGA రోజువారీ వేతనం కంటే తక్కువ. రెండోది, మద్యపాన నిషేధం విధించకుండా మద్యాన్ని గుత్తాధిపత్యం చేస్తూ ప్రభుత్వం మహిళలను మోసం చేసింది. లక్షలాది ప్రజల ఆరోగ్యాన్ని, ప్రాణాలను పణంగా పెట్టి రూ.41,000 కోట్ల సంపదను జగన్ దోచుకున్నారు. మూడోది, జగన్ రాష్ట్రంలో గందరగోళం, భయం, అనిశ్చితి వాతావరణాన్ని సృష్టించారు. భూసేకరణ చట్టం, మూడు రాజధానులు, పెట్టుబడిదారుల్లో ఆందోళన, పోలవరం ప్రాజెక్టు పట్టాలెక్కకపోవడం, ప్రభుత్వ ఉద్యోగులను బెదిరించడం, (IAS/IPSతో సహా), CJIకి వ్యతిరేకంగా లేఖలు రాయడం అతని ప్రధాన వైఫల్యాలలో కొన్ని.

ఇంతకు ముందు బీజేపీకి వ్యతిరేకంగా మాట్లాడిన మీరు టీడీపీ, బీజేపీలతో పొత్తు పెట్టుకోవాలని నిర్ణయించుకున్నారు. ఈ నిర్ణయం వెనుక ఉన్న హేతుబద్ధత ఏమిటి?

PK: జనసేనకు రాష్ట్ర సంక్షేమమే మొదటి స్థానం. రాష్ట్ర విభజనతో ఆంధ్రప్రదేశ్ ఇప్పటికే చాలా నష్టపోయింది. వైసీపీ పాలన ఆంధ్రప్రదేశ్ ప్రజల ఆశలను దాదాపుగా చంపేసింది. రాష్ట్రంలో రైతులు, మత్స్యకారులు, ఉపాధ్యాయులు, మహిళలు, యువకులు, ప్రభుత్వ ఉద్యోగులు, వ్యాపార వర్గాలు ఇలా ఏ వర్గాన్ని వదిలిపెట్టలేదు. మరో ఐదేళ్ల వైసీపీ విధ్వంసక పాలనను ఆంధ్రప్రదేశ్ భరించదు. అందుకే టీడీపీ, బీజేపీతో పొత్తుకు శ్రీకారం చుట్టింది జనసేన. 70వ దశకంలో జరిగిన జేపీ ఉద్యమం మాదిరిగానే, ఆంధ్రప్రదేశ్‌లో వైసీపీ దుందుడుకు పాలన నుంచి రాష్ట్రాన్ని కాపాడేందుకు అందరూ కలిసి రావాల్సిన అవసరం ఉంది. జనసేన అన్ని కీలక సమస్యలపై దాని సంకీర్ణ భాగస్వాములపై ​​తన వైఖరి గురించి ఎల్లప్పుడూ చాలా స్పష్టంగా ఉంటుంది.

బీజేపీ-టీడీపీ-జనసేన కూటమిలో తాను పెట్టిన సంక్షేమ పథకాలన్నీ తొలగిపోతాయని, కూటమి అధికారంలోకి వస్తే ప్రజలకు నష్టం వాటిల్లుతుందని జగన్ ఆరోపించారు. మీ స్పందన ఏమిటి?

PK: సంక్షేమ పథకాలను రూపొందించిన మొదటి ముఖ్యమంత్రి జగన్ కాదు. సంక్షేమం ప్రతి స్థాయిలో భారతీయ పాలనలో భాగం. రాష్ట్రంలోని ప్రజలకు సంక్షేమ చర్యలు అందించడంలో రాష్ట్రం పాత్రను ఆదేశ సూత్రాలు స్పష్టంగా పేర్కొంటున్నాయి. విపరీతంగా అప్పులు చేసి సంక్షేమం చేస్తున్న జగన్‌లా కాకుండా బీజేపీ-టీడీపీ-జనసేన కూటమి సంక్షేమం, అభివృద్ధి రెండింటిపైనా దృష్టి పెడుతుంది. నేను డబుల్ ఇంజిన్ ప్రభుత్వానికి మద్దతు ఇస్తున్నాను. మేము మరింత అభివృద్ధి, మరింత సంపద , సంక్షేమాన్ని సృష్టిస్తాము. సమాజంలోని ఏ వర్గాన్ని వదిలిపెట్టము. మహిళలకు ఉచిత బస్సు ప్రయాణం, ప్రతి సంవత్సరం మూడు ఉచిత గ్యాస్ సిలిండర్లు, 18-59 సంవత్సరాల వయస్సు గల మహిళలకు నెలవారీ రూ.1,500 ఆర్థిక సహాయం, ఐదేళ్లలో 20 లక్షల ఉద్యోగాల కల్పన, పెన్షనరీ ప్రయోజనాలు మరెన్నో హామీలు ఇచ్చాము.

కూటమి అధికారంలోకి వస్తే ఆంధ్రప్రదేశ్‌కి ప్రత్యేక హోదా కేంద్రం మంజూరు చేస్తుందని భావిస్తున్నారా?

PK: కూటమి ఆంధ్రప్రదేశ్ అభివృద్ధి, సంక్షేమం రెండింటిపై దృష్టి పెడుతుంది. మోదీ దృష్టి వికసిత భారత్ 2047పై ఉంది. ఆ వృద్ధి కథనంలో ఏపీ కూడా భాగం అయ్యేలా చూస్తాం. విజన్ 2047కి రాష్ట్రం కీలక సహకారిగా మారుతుంది. ఎన్డీయేలో భాగమైనందున, మన రాష్ట్ర నాయకత్వానికి కేంద్రం నుంచి ఏపీకి అన్ని రకాల ప్రోత్సాహకాలు, సంక్షేమ చర్యలు, అభివృద్ధి కార్యకలాపాలు తీసుకురావడానికి మరిన్ని అవకాశాలు ఉంటాయి. మన ఓడరేవులను నిర్మించడం నుంచి సాగర్ మాల ప్రాజెక్ట్ ద్వారా బ్లూ ఎకానమీను పెంచడం వరకు, స్మార్ట్ సిటీస్ మిషన్ కోసం కేంద్రం నిధులను ఉపయోగించుకుంటాము. పట్టణీకరణ కోసం అమృత్, ప్రసాద్ వంటి పథకాల ప్రయోజనాన్ని పొందుతాము. పీఎల్‌ఐ, మేక్ ఇన్ ఇండియా, డిజిటల్ ఇండియా వంటి పథకాల ద్వారా ఆంధ్రప్రదేశ్‌ను దేశంలోనే సేవలు, తయారీ రంగాలలో పోటీపడేలా చేస్తామని హామీ ఇస్తున్నాము. ఈ ప్రక్రియలో, వచ్చే 5 సంవత్సరాలలో స్టార్టప్‌లతో సహా 20 లక్షల ఉద్యోగాలను సృష్టించాలని భావిస్తున్నాము. మా మ్యానిఫెస్టోలో ప్రత్యేక హోదా గురించి ఎటువంటి ప్రస్తావన చేయలేదు, కానీ మా ప్రయత్నాలు చాలా పెద్దవి. ప్రత్యేక హోదా పొందడం కంటే మించినది. మన రాష్ట్రాన్ని ఆత్మనిర్భర్ ఆంధ్రప్రదేశ్‌గా మార్చడానికి, 2047 విజన్‌లో భాగం కావడానికి సిద్ధంగా ఉన్నాము.

రాజకీయ నాయకుడిగా మీరు అధికారంలోకి వస్తే ఆంధ్రప్రదేశ్ ప్రజలకు ఏం చేయాలనుకుంటున్నారు?

PK: ముందుగా, నేను బలమైన లా అండ్ ఆర్డర్‌ని సృష్టించాలనుకుంటున్నాను. రెండోది, రాష్ట్రంలోని యువత కోసం పెట్టుబడులు పెట్టాలి. యువత ఆకాంక్షలను బాగా అర్థం చేసుకోవడానికి రాష్ట్రంలో నైపుణ్య గణన అవసరం. మేము ప్రతి ఒక్కరికీ మంచి నాణ్యమైన జీవితాన్ని అందించాలని కోరుకుంటున్నాము. విద్య, ఉద్యోగాలపై దృష్టి పెడతాం. ప్రజల వ్యక్తిగత స్వేచ్ఛలు, ప్రాథమిక హక్కులు ఉల్లంఘనలు ఉండని వాతావరణాన్ని సృష్టించాలని నేను కోరుకుంటున్నాను. ప్రతి పౌరుడు ఎదగడానికి, అభివృద్ధి చెందడానికి అవకాశం కల్పిస్తాం.

బీజేపీని చాలా మంది మైనారిటీ వ్యతిరేకిగా చూస్తున్నారు. దీంతో ఏపీలో పొత్తు, ఓట్లపై ప్రభావం పడదా?

PK: బీజేపీ, టీడీపీ, జనసేనల వల్ల ముస్లిం సమాజం ఎప్పుడూ సమస్యలు ఎదుర్కోలేదు. ముస్లింలు బలమైన సమాజం, వారి సహకారం రాష్ట్రానికి, దేశానికి విలువైనది. ముస్లింలు ఇతర మతాలకు చెందిన ఇతర వ్యక్తుల మాదిరిగానే గౌరవంగా చూస్తాము. కొంతమంది నకిలీ మేధావులు పాశ్చాత్య ఆలోచనలను ముందుకు తెస్తున్నారు. ఇండియా కూటమి ద్వారా ఆందోళన వాతావరణం ఏర్పడుతోంది. కాంగ్రెస్ ఎప్పుడూ మైనారిటీలను మభ్యపెడుతూ వారిని పేదలుగా ఉంచి కేవలం ఓటు బ్యాంకుగా వాడుకుంటోందన్నారు. అయోధ్య రామమందిరం భారతదేశాన్ని మతపరమైన అల్లర్లకు దారి తీస్తుందని, అయితే మోదీ అలాంటిదేమీ జరగకుండా చూసుకున్నారన్నారు. ముస్లింలు, హిందువులు ఆర్థిక వ్యవస్థ నుంచి ప్రయోజనం పొందుతున్నారు. భారతదేశంలోని ముస్లింలకు సమాజంలో వారి స్థితి గురించి ఏ రాజకీయ పార్టీ నుంచి ఎటువంటి సర్టిఫికేట్ అవసరం లేదు. ముస్లింలు కాంగ్రెస్, మిత్రపక్షాల బుజ్జగింపు రాజకీయాలకు పడిపోకూడదు. ముస్లింలు భారతదేశ అభివృద్ధిలో భాగం కావాలి. షాదీదుల్హన్ పథకాన్ని నిలిపివేసి, స్కాలర్‌షిప్‌లు తొలగించి, ముస్లిం యువత పారిశ్రామికవేత్తలు కావడానికి సహకరించని జగన్ రెడ్డిలా కాకుండా, జనసేన, టీడీపీ, బీజేపీలు ఏపీలో ముస్లింలకు వారి సంక్షేమం, అభివృద్ధి పరంగా గొప్ప భవిష్యత్తు ఉండేలా చూస్తాయి.

చివరగా మీ పోల్ అంచనా ఏమిటి?

PK : నా అంచనా ఇదే - ఏపీలో కూటమి, కేంద్రంలో ఎన్డీయే గెలిచి ప్రభుత్వాన్ని ఏర్పాటు చేస్తున్నాం. వైసీపీకి వ్యతిరేకంగా పెద్ద విప్లవం రాబోతుంది. ఏపీ ప్రజలు వైసీపీ ఫ్యాన్‌ని స్విచ్ ఆఫ్ చేయబోతున్నారు.