Guntur Crime : గుంటూరులో దారుణం.. అప్పు ఇచ్చిన వారిని సైనేడ్‌తో చంపుతున్న మహిళలు.. పోలీసుల విచారణలో ట్విస్ట్

గుంటూరులో తాజాగా దారుణం వెలుగులోకి వచ్చింది. అప్పులు ఎగ్గొట్టేందుకు హత్యలు చేస్తున్నారు. అప్పు ఇచ్చిన వారిని టార్గెట్ చేసి మహిళలు సైనేడ్‌తో చంపుతున్నారు. గుంటూరులో మొత్తం నలుగురిని చంపారు. ఈ వ్యవహారంలో ముగ్గురు మహిళలు కీలకంగా ఉన్నట్టు పోలీసులు గుర్తించారు. ఆ మహిళలు మరో ముగ్గురిపై హత్యాయత్నం చేశారని చెబుతున్నారు. జూన్‌లో జరిగిన మహిళ హత్య కేసుతో ఈ దారుణాలు వెలుగులోకి వచ్చారు. ముగ్గురు మహిళలతో పాటు.. సైనేడ్ విక్రయిస్తున్న వ్యక్తిని అరెస్ట్ చేసినట్టు ఎస్పీ సతీష్ వెల్లడించారు. ఈ ఘటన వెలుగులోకి రావడంతో.. గుంటూరు ఉలిక్కిపడింది.

వరుస హత్యల కలకలం..

ఇటీవలి కాలంలో గుంటూరు నగరంలో వరుస హత్యలు కలకలం సృష్టించాయి. ఈ హత్యలపై ఫోకస్ పెట్టిన పోలీసులు.. హత్యలు చేస్తున్న మహిళల ముఠాను అరెస్ట్ చేశారు. అటు పోలీసుల విచారణలో విస్తుపోయే విషయాలు తెలిశాయి. ఆ విషయాలు తెలిసి పోలీసులు కూడా షాక్ అయ్యారు. మహిళలు ఇంత దారుణంగా ఆలోచిస్తారా అని ఆశ్చర్యపోయారు.

బ్రీజర్‌లో సైనేడ్ కలిపి..

'2023 జూన్‎లో నాగూర్‎బీ అనే మహిళ అనుమానాస్పదంగా మృతిచెందారు. ఆమె మృతిపై కేసు నమోదు చేశాం. బ్రీజర్‎లో సైనైడ్ కలిపి ఇవ్వడంతోనే మహిళ మృతి చెందింది. సదరు మహిళను హత్య చేసినట్లు గుర్తించి దర్యాప్తు చేపట్టాం. ఈ నేపథ్యంలో కీలక విషయాలు వెలుగులోకి వచ్చాయి. ఈ హత్యలు చేయడానికి గోల్డ్ షాపులో వాడే సైనైడ్‎ను ఉపయోగించారు' అని ఎస్పీ సతీష్ వెల్లడించారు.

ముగ్గురు తప్పించుకున్నారు..

'సైనేడ్‌తో ఇప్పటి వరకు నలుగురిని హత్య చేశారు. మరో ముగ్గురిపై హత్యాయత్నం చేసి విఫలమయ్యారు. ఆహారం‎, డ్రింక్‎లో సైనైడ్ కలిపి ఈ మహిళలు నేరాలకు పాల్పడ్డారు. 2022 నుంచి ఈ తరహా నేరాలను ముఠా కొనసాగిస్తోంది. డబ్బు కోసం, అప్పులు ఎగ్గొట్టేందుకు ఈ హత్యలు చేశారు' అని ఎస్పీ సతీష్ వివరించారు.

సైనేడ్ ఎక్కడిది..

ఈ నేరాలకు పాల్పడుతున్న ముగ్గురు మహిళలను అరెస్టు చేశామని ఎస్పీ వెల్లడించారు. ఈ ముగ్గురి మహిళల్లో ఒకరు గతంలో వాలంటీర్‎గా పని చేశారని తెలుస్తోంది. మహిళలకు సైనైడ్ విక్రయిస్తున్న వ్యక్తిని కూడా అరెస్టు చేశారు. అయితే.. అతనికి సైనేడ్ ఎక్కడిదనే కోణంలో పోలీసులు విచారణ జరుపుతున్నారు. ఈ కేసులో ఇంకా కీలక విషయాలు వెలుగులోకి వచ్చే అవకాశం ఉంది.