Ukraine | జవాను జీవితాన్ని కాపాడిన 'స్మార్ట్​ఫోన్'​.. ఎలా అంటే..!

Russia Ukraine war | రష్యా ఉక్రెయిన్​ యుద్ధం నేపథ్యంలో ఎన్నో కథలు బయటకొస్తున్నాయి. రష్యాపై ఉక్రెయిన్​ సైనికుల వీరోచిత పోరాటలకు సంబంధించిన వార్తలు.. ప్రపంచ దేశాలను చుట్టేస్తున్నాయి. ఈ యుద్ధంలో ఎందరో వీరులు సైతం ప్రాణాలు కోల్పోయారు. అయితే.. ఓ ఉక్రెయిన్​ సైనికుడు.. తృటిలో ప్రాణాపాయం నుంచి తప్పించుకున్న ఘటన.. తాజాగా వెలుగులోకి వచ్చింది. అతడిని రక్షించింది.. తోటి జవాను కాదు.. ఓ స్మార్ట్​ఫోన్​!

ఇందుకు సంబంధించిన దృశ్యాలను సామాజిక మాధ్యమం రెడిట్​లో పోస్ట్​ చేశారు. కాగా.. ఓ సైనికుడు.. మరో జవానుతో మాట్లాడటం అందులో కనిపిస్తుంది. ఆ సైనికుడు తన జేబులో నుంచి ఓ స్మార్ట్​ఫోన్​ బయటకు తీశాడు. దానికి ఓ పెద్ద బుల్లెట్​​ అతుక్కుని ఉండటం గమనార్హం. అంటే ప్రత్యర్థులు కాల్చిన బుల్లెట్లలో ఒకటి.. ఆ సైనికుడిని తాకింది. కానీ ఆ సమయంలో స్మార్ట్​ఫోన్​ అడ్డుగా ఉండటంతో ఆ సైనికుడు ప్రాణాలతో బ్రతికి బయటపడ్డాడు.

Ukraine soldiers | ఓ 7.2ఎంఎం సైజు బుల్లెట్​.. ఆ స్మార్ట్​ఫోన్​కు అతుక్కుపోయింది. దాదాపు ఆ బుల్లెట్​.. ఆ స్మార్ట్​ఫోన్​ను దాటేసినట్టుగానే ఉంది. కానీ అలా జరగలేదు. అదే జరిగి ఉంటే.. ఆ సైనికుడికి బుల్లెట్​ తగిలేది. అప్పుడేం జరిగేతే ఊహించుకునేందుకే చాలా బాధాకరంగా, భయంకరంగా ఉంది.

ఈ వార్త వెంటనే సామాజిక మాధ్యమాల్లో వైరల్​గా మారిపోయింది. కాగా నెటిజన్లు దీనిపై ఫన్నీ కామెంట్లు చేస్తున్నారు. 'అది నోకియా ఫోన్​ అయితే.. ఇంకా పనిచేస్తుంది,' అని కొందరు అంటుంటే.. 'అది నోకియా ఫోన్​ అయ్యుంటే.. ఆ బుల్లెట్​.. ఫోన్​ను తగిలి తిరిగి ప్రత్యర్థి మీదకే వెళ్లేది,' అని ఫన్నీగా రాసుకొస్తున్నారు.

రష్యా ఉక్రెయిన్​ యుద్ధం.. ఫిబ్రవరి 24న మొదలైంది. ఇంకా కొనసాగుతోంది. ఇందులో ఎన్నో హృదయ విదారక ఘటనలు, దృశ్యాలు వెలుగులోకి వస్తున్నాయి. ప్రజలు అల్లాడిపోతున్నారు. అంతర్జాతీయ సమాజం ఎంత ఒత్తిడి చేస్తున్నా.. రష్యా మాత్రం ఊచకోతను ఆపడం లేదు.

'లొంగిపోండి.. లేకపోతే..'

Ukraine crisis | రష్యా ఉక్రెయిన్​ యుద్ధం రోజురోజుకు ముదురుతోంది. తాజాగా.. ఉక్రెయిన్​ సైనికులకు రష్యా స్ట్రాంగ్​ వార్నింగ్​ ఇచ్చింది. తక్షణమే ఆయుధాలను వీడి లొంగిపోవాలని తేల్చిచెప్పింది. భీకర పోరాటం జరుగుతున్న మారియుపోల్​లోని ఉక్రెయిన్​ బలగాలను ఉద్దేశించి రష్యా ఈ ప్రకటన చేసింది.

"ఉక్రెయిన్​ దళాలు అర్థం లేని విధంగా పోరాటం చేస్తున్నాయి. వాటిని వెంటనే ఆపాలని ఉక్రెయిన్​ అధికారులు.. సైనికులకు చెబితే మంచిది. కానీ ఇలాంటి సూచనలు ఉక్రెయిన్​ అధికారులు చెయ్యరని మాకు తెలుసు. అందుకే.. సైనికులే స్వచ్ఛందంగా ఆయుధాలు వీడాలని, లొంగిపోవాలని మేము చెబుతున్నాము," అని రష్యా రక్షణశాఖ.. మంగళవారం ఓ ప్రకటనను విడుదల చేసింది.

తూర్పు ఉక్రెయిన్​లోని డాన్​బాస్​ ప్రాంతంలో రష్యా దాడులు మొదలుపెట్టిందని ఉక్రెయిన్​ ఆరోపించిన కొన్ని గంటల వ్యవధిలోనే ఆ దేశం ఇలాంటి ప్రకటనను విడుదల చేయడం ప్రాధాన్యం సంతరించుకుంది. మారియుపోల్​లో పరిస్థితులు దారుణంగా ఉన్నాయని, రష్యా దళాల చేతులో ఉక్రెయిన్​ సైనికులు ఉక్కిరిబిక్కిరి అవ్వడం ఖాయమని ఆ దేశ రక్షణశాఖ అభిప్రాయపడింది. అందువల్ల.. సైనికులు ఆయుధాలను వీడితే మంచిదని మరోమారు విజ్ఞప్తి చేస్తున్నట్టు పేర్కొంది. ఆయుధాలు వీడితే.. వదిలేస్తామని, బ్రతకనిస్తామని హామీనిచ్చింది.