Kerala rape case : 5ఏళ్ల చిన్నారి రేప్​.. చిత్రహింసలు పెట్టి హత్య.. గోనె సంచిలో మృతదేహం!

Kerala rape case : కేరళలో అత్యంత ఘోరమైన, హృదయ విదారక ఘటన వెలుగులోకి వచ్చింది. ఓ 5ఏళ్ల చిన్నారిని రేప్​ చేసిన ఓ వ్యక్తి, ఆమెను చంపేశాడు. ఆ తర్వాత.. ఓ గోనె సంచిలో మృతదేహాన్ని కుక్కాడు. ఆ సంచిని చెత్తతో నింపు, డంప్​ యార్డ్​లో పడేశాడు!

బాలిక అదృశ్యం.. హత్య..!

కేరళలోని కొచ్చిలో శుక్రవారం రాత్రి జరిగింది ఈ ఘటన. బిహార్​ నుంచి వలస వచ్చిన ఓ కుటుంబం.. గ్యారేజ్​ జంక్షన్​కు సమీపంలో నివాసముంటోంది. వారి 5ఏళ్ల బిడ్డ.. శుక్రవారం రాత్రి 7 గంటలకు హఠాత్తుగా కనిపించకుండా పోయింది. ఆందోళనకు గురైన తల్లిదండ్రులు.. వెంటనే పోలీసులకు ఫిర్యాదు చేశారు. ఘటనపై ఎఫ్​ఐఆర్​ నమోదు చేసుకున్న పోలీసులు.. వెంటనే రంగంలోకి దిగారు. చిన్నారి కోసం గాలింపు చర్యలు ముమ్మరం చేశారు. ఈ క్రమంలోనే స్థానిక సీసీటీవీ ఫుటేజ్​ను పరిశీలించారు. కొద్దిసేపటికే నిందితుడు దొరికిపోయాడు!

స్థానిక మార్కెట్​వైపు.. నిందితుడు, చిన్నారిని తీసుకెళుతుండటం సీసీటీవీ కెమెరాకు చిక్కింది. అదే రోజు రాత్రి 9:30 గంటల ప్రాంతంలో.. పోలీసులు అతడిని పట్టుకున్నారు. కానీ అతడితో పాటు చిన్నారి కనిపించలేదు! నిందితుడిని విచారిద్దామని పోలీసులు చేసిన ప్రయత్నం విఫలమైంది. మద్యం మత్తులో ఉన్న అతను.. అస్సలు మాట్లాడలేకపోయాడు.

Girl raped and killed in Kerala : మరోవైపు నిందితుడి ఐడెంటిటీని పోలీసులు తెలుసుకున్నారు. అతను కూడా బిహార్​ నుంచి వచ్చిన ఓ వలస కూలీ అని తేలింది. చిన్నారి తల్లిందడ్రులు ఉంటున్న బిల్డింగ్​లో, ఇతను మొదటి అంతస్తులో నివాసముంటున్నాడని పోలీసులు చెప్పారు.

నిందితుడు అపస్మారక స్థితిలో ఉండటంతో.. అతడిని విచారించలేకపోయిన పోలీసులు.. చిన్నారి కోసం మార్కెట్​ ప్రాంతాన్ని గాలించారు. కానీ ఫలితం దక్కలేదు. శనివారం అతడిని విచారించగా.. నిందితుడు నిజాన్ని ఒప్పుకున్నాడు.

"శుక్రవారం రాత్రే అతడిని పట్టుకున్నాము. కానీ మద్యం మత్తులో అతను మాట్లాడలేకపోయాడు. శనివారం అతడిని విచారించాము. చేసిన తప్పును ఒప్పుకున్నాడు. చిన్నారిని రేప్​ చేసినట్టు చెప్పాడు. కానీ దర్యాప్తును తప్పుదోవపట్టించే ప్రయత్నం చేశాడు," అని అధికారులు చెప్పారు.

Kerala crime news : కాగా.. శనివారం ఉదయం వరకు చిన్నారి మృతదేహాన్ని పోలీసులు కనుగొనలేకపోయారు. ఇంతలో మార్కెట్​లోని స్థానికుల నుంచి వారికి ఓ ఫోన్​ వచ్చింది. వెంటనే మార్కెట్​కు పరుగులు తీశారు అధికారులు. ఓ ట్రేడ్​ యూనియన్​ వర్కర్ సాయంతో చిన్నారిని ఆచూకీని కనుగొనేందుకు ప్రయత్నించారు. సీసీటీవీ ఫుటేజ్​ ఆధారంగా.. మార్కెట్​ యార్డు వెనుక ఉన్న ప్రాంతానికి వెళ్లారు. ఆ తర్వాత కనిపించిన దృశ్యాలు చూసి, పోలీసులు సైతం షాక్​కు గురయ్యారు.

మార్కెట్​ ప్రాంతం వెనుక చెత్త కుప్పలు ఉన్నాయి. వర్షం కారణంగా ఆ ప్రాంతం అంతా మట్టి, బురదతో నిండిపోయింది. అక్కడ గాలించిన అధికారులకు ఓ గొనె సంచి కనిపించింది. అందులో చెత్త బయట పడేయగా.. సంచిలో 5ఏళ్ల చిన్నారి మృతదేహం కనిపించింది.

"శుక్రవారం రాత్రి నిందితుడు ఓ చిన్నారితో అక్కడికి వెళుతండటం నేను చూశాను. సాధారణంగా మార్కెట్​ వెనుకకు చాలా మంది మందు తాగడానికి వెళుతుంటారు. ఆ చిన్నారి తన బిడ్డ అని, మద్యం తాగడానికి వెళుతున్నానని, నిందితుడు నాకు చెప్పాడు. శనివారం ఉదయం నేను సీసీటీవీ ఫుటేజ్​ చూసి, పోలీసులకు సమాచారం ఇచ్చాను," అని ట్రేడ్​ యూనియన్​ వర్కర్​ మీడియాకు తెలిపాడు.

మరోవైపు.. పోస్టుమార్టం కోసం చిన్నారి మృతదేహాన్ని ఆసుపత్రికి తరలించారు పోలీసులు. ఆమెపై దారుణంగా రేప్​ జరిగిందని, హత్యకు ముందు నిందితుడు చిత్రహింసకు గురిచేశాడని, చివరికి.. చిన్నారి గొంతు నులిమి చంపేశాడని పోస్టుమార్టంలో తేలింది. ఆ తర్వాత ఆమె మృతదేహాన్ని గోనె సంచిలో కుక్కి, పడేశాడు.

రాజకీయ దుమారం..

Child raped in Kerala : ఈ ఘటనపై సర్వత్రా ఆందోళనలు వ్యక్తమవుతున్నాయి. నిందితుడిని కఠినంగా శిక్షించాలని ప్రజలు డిమాండ్​ చేస్తున్నారు. మరోవైపు చిన్నారి అత్యాచారం, హత్యకు సంబంధించి, పోలీసులు.. బాధిత కుటుంబానికి క్షమాపణలు చెప్పారు. చిన్నారిని తల్లిదండ్రులతో కలపలేకపోయామని, తాము చేసిన ప్రయత్నాలు విఫలం అయ్యాయని సోషల్​ మీడియా ద్వారా క్షమాపణలు చెప్పారు.

మరోవైపు చిన్నారి అత్యాచారం ఘటనపై రాజకీయ దుమారం చెలరేగింది. విపక్ష కాంగ్రెస్​, ప్రభుత్వం, పోలీసు వ్యవస్థపై మండిపడింది. చిన్నారి నివాసముంటున్న చోటే, నేరం జరిగినా.. ప్రభుత్వం ఆపలేకపోయిందని, పోలీసులు ఏం చేయలేకపోయారని విరుచుకుపడింది. రాష్ట్రంలో చిన్న పిల్లలకు కూడా భద్రత, రక్షణ లేకుండా పోయిందని ఆరోపించింది.

కాంగ్రెస్​ ఆరోపణలను రాష్ట్ర పోలీసు ఉన్నతాధికారి ఖండించారు. దర్యాప్తులో ఎలాంటి లోపాలు లేవని, సమాచారం అందిన వెంటనే స్పందించామని స్పష్టం చేశారు.