Maharashtra crime news : రోజూ అనుమానిస్తున్నాడని.. భర్తను చంపించిన భార్య!

Maharashtra crime news : మహారాష్ట్రలో దారుణ ఘటన వెలుగులోకి వచ్చింది. తనను నిత్యం అనుమానిస్తూనే ఉంటున్నాడన్న కారణంతో.. భర్తను చంపించింది ఓ మహిళ. అనంతరం ఆ నేరాన్ని మరో వ్యక్తిపై మోపింది. చివరికి పోలీసులకు చిక్కింది.

ఇదీ జరిగింది..

మహారాష్ట్ర లాథుర్​లోని జోద్​జావాలా గ్రామంలో ఈ నెల 18న జరిగింది ఈ ఘటన. పోలీస్​ స్టేషన్​కు వెళ్లిన ఓ మహిళ.. తన భర్తను, అతని బంధువు చంపేశాడని ఫిర్యాదు చేసింది. భూ వివాదం కారణంగా గొడ్డలితో తల నరికేశాడని పేర్కొంది. ఆ వ్యక్తి పేరు చెప్పి, అతడిని వెంటనే అరెస్ట్​ చేయాలని డిమండ్​ చేసింది. ఘటనపై వెంటనే స్పందించిన గేట్​గావ్​ పోలీస్​ స్టేషన్​ అధికారులు.. మహిళ చెప్పిన వ్యక్తిని అరెస్ట్​ చేశారు. ఆ తర్వాతే పోలీసులకు అసలు విషయం తెలిసింది!

నిందితుడు అని భావించి అరెస్ట్​ చేసిన వ్యక్తిని పోలీసులు విచారించడం మొదలుపెట్టారు. అతడు చెప్పిన మాటలకు, మరణించిన వ్యక్తి భార్య ఇచ్చిన ఫిర్యాదుకు పొంతనలేకుండా పోయిందని పోలీసులు గ్రహించారు. ఈ క్రమంలోనే ఆ మహిళపై వారికి అనుమానం మొదలైంది. వారు అరెస్ట్​ చేసిన వ్యక్తిపై.. అసలేం జరిగి ఉంటుంది? అన్న కోణంలో విచారించడం మొదలుపెట్టారు.

Woman kills huband in Maharasthra : "మరణించిన వ్యక్తి పేరు హన్మంత్​ కటారే. నాకు బంధువు. కానీ నేను అతడిని చంపలేదు. కటారేకి అతని భార్యపై అనుమానాలు ఎక్కువ. రోజూ అనుమానిస్తూ ఉండేవాడు. ఆమె.. అతడిని చంపి ఉండొచ్చు. ఆమె తల్లి కూడా ఇందులో సాయం చేసి ఉండొచ్చు," అని సదరు వ్యక్తి పోలీసులకు వెల్లడించాడు. ఈ వ్యక్తి చెప్పిన విషయాల ఆధారంగా దర్యాప్తు చేపట్టిన అధికారులకు అసలు నిజం తెలిసింది. వెంటనే.. 30ఏళ్ల మహిళను, 50ఏళ్ల తల్లిని, మరో ఇద్దరిని అరెస్ట్​ చేశారు.

"అవును. నా భర్తను నేనే చంపేశాను. ఎప్పుడు చూసినా నన్ను అనుమానిస్తూ ఉంటాడు. వేరే పని లేదు. అందుకే చంపేశాను," అని విచారణలో భాగంగా ఒప్పుకుంది నిందితురాలు.

ఇలా చంపేశారు..!

Maharashtra latest news : కటారేను చంపేందుకు.. తల్లితో పాటు మరో ఇద్దరి సాయం తీసుకుంది ఆ మహిళ. ఈ మేరకు పక్కా ప్రణాళిక రచించింది. ఇందులో భాగంగా.. ఈ నెల 18న.. ఇంటికి తిరిగి వస్తుండగా.. గ్రామం శివారులో ఇద్దరు వ్యక్తులు కటారేను అడ్డుకున్నారు. రాడ్లతో కటేరాపై దాడి చేసి చంపేశారు. ఆ తర్వాత, ఆ మహిళ పోలీసుల వద్దకు వెళ్లి అబద్ధం చెప్పింది.

నిందితులపై కేసు నమోదు చేసుకున్న పోలీసులు.. దర్యాప్తు కొనసాగుతోందని వెల్లడించారు.